Apokalipsis 20:1-15
20 Laj kil yakal chyal talel ta vinajel jun anjel ti stsakojbe syaveal li xabe xchiʼuk ti stsakoj talel jlik mukʼta kadenae.
2 Vaʼun la stsak li dragone, li voʼneal chone,* ti jaʼ Diablo xchiʼuk Satanase, la xchuk jmil jabil.
3 Laje la sjip ochel ta xab, la sbaj xchiʼuk la smakbe lek stiʼ sventa mu xa sloʼla li lumetike, jaʼ to mi tsʼaki li jmil jabile. Mi laje chichʼ to koltael lokʼel kʼuk sjalil.
4 Laj kil chotlebaletik sventa ajvalilal xchiʼuk laj kil laj yichʼ yabtelik sventa chchapanvanik li buchʼutik te chotiike. Jech, laj kilbe xkuxlejalik li buchʼutik laj yichʼik milel* ta skoj ti laj yalbeik skʼoplal li Jesuse xchiʼuk ti laj yalbeik skʼoplal li Diose. Li buchʼutik taje muʼyuk laj yichʼik ta mukʼ li jtiʼaval chonbolome mi jaʼuk li slokʼole xchiʼuk muʼyuk laj yichʼ smarkail ta stibaik mi jaʼuk ta skʼobik. Vaʼun kuxiik xchiʼuk la spasik mantal jmil jabil xchiʼuk li Kristoe.*
5 (Pe li yantik buchʼutik chamemike muʼyuk to bu kuxiik jaʼ to mi tsʼaki li jmil jabile.) Taje jaʼ li baʼyel chaʼkuxesele.
6 Xmuyubajik noʼox* xchiʼuk chʼulik li buchʼutik te skʼoplalik li ta baʼyel chaʼkuxesele; muʼyuk xa tspasatik ta mantal yuʼun li xchibal velta lajelale, yuʼun chkʼotik ta yajpaletak Dios xchiʼuk Kristo xchiʼuk jmoj ch-ajvalilajik jmil jabil.
7 Vaʼun mi tsuts* xaʼox li jmil jabile chichʼ koltael lokʼel ta xchukinab li Satanase,
8 vaʼun chlokʼ sloʼla li lumetik ti oyik ta xchanjotal xchikin balumile, li Gog xchiʼuk Magogue, sventa xichʼik tsobel li ta paskʼope. Xkoʼolaj kʼuchaʼal jiʼ* ta nab ti kʼu yepalike.
9 La spuk sbaik batel ta spʼejel balumil xchiʼuk la sjoyibtabeik li skarpana buchʼutik chʼule xchiʼuk li kʼanbil jteklume. Pe yal talel kʼokʼ ta vinajel, vaʼun lajesatik.
10 Vaʼun li Diablo ti yakal chloʼlavane laj yichʼ jipel ochel ta nab ti oy skʼakʼal xchiʼuk s-asufreale, jaʼ ti bu xa onoʼox oyik li jtiʼaval chonbolom xchiʼuk li jloʼlavanej j-alkʼope; te chil-o svokolik ta kʼakʼal-akʼobal sbatel osil.
11 Laj kil jun mukʼta sakil chotlebal sventa ajvalilal xchiʼuk laj kil li buchʼu te chotole. Vaʼun li balumil xchiʼuk vinajele jatavik lokʼel ta stojolal xchiʼuk muʼyuk xa la sta yavilik.
12 Laj kil ta bikʼit ta mukʼ li buchʼutik chamemik ti te vaʼajtik ta yeloval li chotlebal sventa ajvalilale xchiʼuk lik jamuk balbalvunetik. Pe jam yan balbalvun; jaʼ li sbalbalvunal kuxlejale. Vaʼun li buchʼutik chamemike laj yichʼik chapanel jech kʼuchaʼal li kʼusi te tsʼibabil ta balbalvunetike, jaʼ ti kʼu yelan la spasike.
13 Vaʼun li nabe la skolta lokʼel li buchʼutik te chamemik ta stojolale, jech ek li lajelal xchiʼuk li Mukinale* la skoltaik lokʼel li buchʼutik te chamemik ta stojolalike, vaʼun ta jujuntal laj yichʼik chapanel jech kʼuchaʼal la spasike.
14 Li lajelal xchiʼuk Mukinale laj yichʼik jipel ochel ta nab ti oy skʼakʼale. Liʼe jaʼ skʼan xal li xchibal velta lajelale: nab ti oy skʼakʼale.
15 Jech xtok li buchʼutik muʼyuk te tsʼibabil skʼoplalik li ta slivroal kuxlejale laj yichʼik jipel ochel ta nab ti oy skʼakʼale.
Tsʼibetik ta yok vun
^ O: «kiletel chone».
^ S.gr.: «laj yichʼik milel ta ekʼel».
^ Kʼelo glosario.
^ O: «Pʼij noʼox yoʼnik»; «Nichim noʼox yoʼontonik».
^ O: «laj».
^ O: «yiʼ».
^ O: «Ades». Kʼelo glosario.
