Apokalipsis 21:1-27
21 Vaʼun laj kil jun achʼ vinajel xchiʼuk jun achʼ balumil; yuʼun echʼ xa li mol vinajel xchiʼuk li mol balumile, jech xtok chʼabal xa li nabe.
2 Laj kil xtok li chʼul jteklume, li Achʼ Jerusalene, ti te lik talel ta stojolal Dios te ta vinajele xchiʼuk ti chapal xa kʼuchaʼal jnupunel tseb ti lek stsʼakubtasoj sba ta sventa li buchʼu chkʼot ta smalale.
3 Vaʼun laj kaʼi tsatsal yechʼomal eil ti te lik talel ta chotlebal sventa ajvalilal ti xi chale: «¡Kʼelo avil! Te oy ta stojolal krixchanoetik li skarpana Diose, vaʼun te chchiʼinatik ta naklej, jaʼ chkʼotik ta steklumal. Jech oxal te chchiʼinatik ta naklej yuʼun li Diose.
4 Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux ta aʼiel. Jelav xa skʼoplal skotol li kʼusitik oy toʼoxe».
5 Xi laj yal li buchʼu te chotol ta chotlebal sventa ajvalilale: «¡Kʼelo avil!, ta jpas ta achʼ skotol li kʼusitike». Xi laj yal xtoke: «Tsʼibao, yuʼun tukʼ xchiʼuk melel li kʼusitik laj yichʼ alele».
6 Xi laj yalbune: «¡Kʼot xa yorail! Alfaun xchiʼuk Omegaun,* li slikeb xchiʼuk slajebe. Skotol li buchʼu chaʼi takitiʼile chkakʼbe li nioʼ sventa kuxlejal ti jaʼ matanale.
7 Li buchʼu chkuch yuʼune jaʼ chuʼunin li kʼusitik taje, ta xikʼot ta Sdios xchiʼuk chkʼot ta jnichʼon ek.
8 Yan li jxiʼeletike, li buchʼutik chʼabal xchʼunel yoʼontonike, li buchʼutik ibal sbaik ta skoj yikʼobalike, li jmilvanejetike, li jmulivajeletike,* li buchʼutik tspasilanik espiritismoe,* li buchʼutik chichʼ ta mukʼ santoetike xchiʼuk skotol li jutkʼopetike* jaʼ chuʼuninik li nab ti oy skʼakʼal xchiʼuk ti chtil ta asufree. Taje jaʼ skʼan xal li xchibal velta lajelale».
9 Jun li ta svukvoʼal anjel ti yichʼojik li vukub setsʼe, ti noj li ta vuktos slajeb vokolile, tal xchiʼuk xi laj yalbune: «Laʼ, chkakʼ avil li jnupunel tsebe, li buchʼu chkʼot ta yajnil Chʼiom Chije».
10 Jaʼ yuʼun laj yikʼun batel ta sjuʼel chʼul espiritu ta jun mukʼta tayal vits, vaʼun laj yakʼbun kil li chʼul jteklum Jerusalen ti te lik talel ta stojolal Dios te ta vinajele
11 xchiʼuk ti te oy ta stojolal li smukʼulal Diose. Xkoʼolaj xojobal kʼuchaʼal xojobal jpʼej kʼupil sba ton, jech kʼuchaʼal jaspe ton ti stsʼayayet tajek ta bu xa noʼox kʼalale.
12 Oy jun smukʼta tayal muroal, oy lajcheb stiʼ, oy te lajchaʼvoʼ anjel li ta stiʼtake, jech xtok li ta stiʼtake te tsʼibabil li sbi lajchaʼvokʼ nitilulal* xnichʼnab Israele.
13 Oy oxib stiʼ li ta slokʼeb Kʼakʼale, oy oxib stiʼ li ta nortee, oy oxib stiʼ li ta sure xchiʼuk oy oxib stiʼ li ta smaleb Kʼakʼale.
14 Oy lajchaʼpʼej stanal sventa snakleb yok xtok li smuroal jteklume, jaʼ te ti bu oy sbiik li lajchaʼvoʼ yajtakboltak Chʼiom Chije.
15 Li buchʼu yakal chchiʼinun ta loʼile stsakoj jun aj ti pasbil ta oro sventa tspʼis-o li jteklume, li stiʼtake xchiʼuk li smuroale.
16 Kuadrado pasbil li jteklume, ti kʼu to snatil tajeke jaʼ jech sjamlej ek. Vaʼun la spʼis ta aj li jteklume, te van 2,200 kilometrouk;* ti kʼu snatile jaʼ jech sjamlej xchiʼuk staylej ek.
17 La spʼisbe xtok li smuroale, 144 xukʼubil* snatil, jech kʼuchaʼal tspʼisolaj li krixchanoe, jech kʼuchaʼal tspʼisolaj ek li anjele.
18 Pasbil ta jaspe ton li muroe, yan li jteklume ta batsʼi oro pasbil, xkoʼolaj kʼuchaʼal nen* ti xkiltik osil ta spate.
19 Li snakleb smuroal jteklume tsʼakubtasbil ta skotol tonetik ti toj kʼupilik sbae: li sbaʼyel naklebe ta jaspe ton; li xchibale ta safiro ton; li yoxibale ta kalsedonia ton; li xchanibale ta esmeralda ton;
20 li svoʼobale ta sardonika ton; li svakibale ta sardio ton; li svukubale ta krisolito ton; li xvaxakibale ta berilo ton; li sbalunebale ta topasio ton; li slajunebale ta krisoprasa ton; li xbuluchibale ta jasinto ton; li xlajchebale ta amatista ton.
21 Jech xtok li lajcheb tiʼ nae jaʼ lajchaʼpʼej perla ton; li jujun tiʼ nae pasbil ta jujupʼej perla ton. Yan li smukʼta kayeal jteklume ta batsʼi oro pasbil, jech kʼuchaʼal nen ti xkiltik jelavel osil ta spate.
22 Muʼyuk bu xkil templo te, yuʼun li Jeova Dios ti jaʼ li Buchʼu skotol xuʼ yuʼune xchiʼuk li Chʼiom Chije jaʼ templo kʼotemik.
23 Muʼyuk chtun yuʼun xojobal Kʼakʼal xchiʼuk xojobal U li jteklume, yuʼun chojobinaj smukʼulal Dios ta stojolal xchiʼuk jaʼ kʼotem ta kantil yuʼun jteklum li Chʼiom Chije.
24 Vaʼun li lumetike chanavik ta stojolal li sakil osil yuʼune, li ajvaliletik ta balumile chichʼbeik batel li smukʼulale.
25 Mi jaʼuk bu chmak ta kʼakʼaltik li stiʼtake, yuʼun chʼabal xa akʼobaltik te.
26 Vaʼun li ajvaliletike chichʼbeik batel li smukʼulal xchiʼuk li yichʼel ta mukʼ lumetike.
27 Pe mi oy kʼusi ti sokeme xchiʼuk mi oy buchʼu ti tspas li kʼusi ibal sbae xchiʼuk ti tsjut kʼope, mi jsetʼuk me bu ch-och te; jaʼ noʼox ch-ochik li buchʼutik te tsʼibabil skʼoplalik li ta balbalvun sventa kuxlejal yuʼun Chʼiom Chije.
Tsʼibetik ta yok vun
^ Kʼelo glosario.
^ Por·nei·a ta griego. Kʼelo glosario.
^ Kʼelo glosario.
^ O: «jnopkʼopetike»; «j-epalkʼopetike».
^ O: «momnichʼonil»; «tsʼunbalil»; «tsʼakalulil».
^ S.gr.: «12 mil estadio».
^ Kʼelo glosario.
^ O: «kristal».
