Apokalipsis 22:1-21
22 Vaʼun li anjele laj yakʼbun kil jun ukʼum sventa kuxlejal ti sak tajek jech kʼuchaʼal nen* ti te chlik talel ta chotlebal sventa ajvalilal yuʼun Dios xchiʼuk li Chʼiom Chije,
2 ti te ch-echʼ ta smukʼta kayee. Li ta xchaʼjotal ukʼume oy te teʼetik sventa kuxlejal ti chakʼ lajcheb velta sate xchiʼuk jun velta ta u chakʼ li sate. Jaʼ sventa xpoxtaobil lumetik li yanaltake.
3 Muʼyuk xa kʼusi chichʼ chopol kʼoptael.* Yuʼun te xa ta jteklum li chotlebal sventa ajvalilal yuʼun Dios xchiʼuk li Chʼiom Chije, vaʼun li smosotak Diose tspasik chʼul abtelal ta stojolal Dios;
4 vaʼun chilbeik sat xchiʼuk chichʼik tsʼibabel ta stibaik li sbie.
5 Jech xtok chʼabal xa akʼobal, muʼyuk xa chtun yuʼunik li xojobal kantile xchiʼuk li xojobal Kʼakʼale, yuʼun chakʼ tal xojobal lus li Jeova Dios ta stojolalike xchiʼuk jech-o ch-ajvalilajik sbatel osil.
6 Xi laj yalbune: «Tukʼ skotol xchiʼuk melel skotol li kʼusitik laj yichʼ alele; jech, li Jeova Dios ti jaʼ laj yakʼbe snaʼ j-alkʼopetik li kʼusitik chalike la stak talel yaj-anjel sventa chakʼbe yil smosotak li kʼusitik poʼot xa xkʼot ta pasele.
7 Vaʼun, ¡kʼelo avil!, poʼot xa xital. Xmuyubaj noʼox* li buchʼutik chchʼunik li albil kʼop ti liʼ oy ta balbalvune».
8 Voʼon Juanun, voʼon laj kaʼi xchiʼuk laj kil li kʼusitik taje. Kʼalal laj xaʼox kaʼi xchiʼuk laj xaʼox kile, la jkejan jba ta yok li anjel sventa chkichʼ ta mukʼ ti jaʼ li buchʼu laj yakʼbun kil li kʼusitik taje.
9 Pe xi laj yalbune: «¡Kʼelo me aba! ¡Mu xapas jech! Yuʼun jaʼ noʼox jchiʼil jbatik ta mosoil xchiʼuk li avermanotak ti jaʼ j-alkʼopetike xchiʼuk li buchʼutik yakal chchʼunik li kʼusitik liʼ oy ta balbalvune. Jaʼ ichʼo ta mukʼ li Diose».
10 Xi laj yalbun xtoke: «Mu xapakʼ li albil kʼop liʼ oy ta balbalvune, yuʼun nopol xa li yorail albile.
11 Li buchʼu muʼyuk tukʼe jechuk-o muʼyuk tukʼ; li buchʼu oy yikʼobale jechuk-o oy yikʼobal; pe li buchʼu tukʼe jechuk-o tukʼ, li buchʼu chʼule jechuk-o chʼul.
12 »‹¡Kʼelo avil!, poʼot xa xital, liʼ kichʼoj talel li matanal chkakʼe, sventa jech ta jtojbe ta jujuntal ti kʼu yelan la spas yabtelike.
13 Alfaun xchiʼuk Omegaun,* li baʼyel xchiʼuk slajebe, li slikeb xchiʼuk stsutsebe.*
14 Xmuyubajik noʼox li buchʼutik chchukʼ snatil kʼuʼike, sventa oyuk sderecho xbatik ti bu oy li teʼetik sventa kuxlejale xchiʼuk sventa xuʼ x-ochik li ta stiʼtak jteklume.
15 Te oyik ta pana li tsʼiʼetike,* li buchʼutik tspasilanik espiritismoe,* li jmulivajeletike,* li jmilvanejetike, li buchʼutik chichʼik ta mukʼ santoetike xchiʼuk skotol li buchʼutik skʼanojik xchiʼuk ti nopem xaʼiik sjutel kʼope›.*
16 »‹Voʼon Jesusun ti la jtak talel kaj-anjel sventa xavichʼik albel li kʼusitik ta sventa li tsobobbailetike. Voʼon yutsʼ yalalun xchiʼuk snitilulalun* li Davide xchiʼuk voʼon li kʼanal chvinaj ta sob* ti stsʼayayete›».
17 Xi jech-o chalik li chʼul espiritu xchiʼuk li jnupunel tsebe: «¡Laʼ!». Jech xtok buchʼuuk noʼox ti chaʼie, akʼo xi yale: «¡Laʼ!». Akʼo taluk xtok ti buchʼuuk noʼox chaʼi takitiʼile; akʼo yuchʼ ta matanal li voʼ sventa kuxlejal ti buchʼu tskʼane.
18 «Jaʼ yakal chkalbe skotol li buchʼutik yakal chaʼiik li albil kʼopetik liʼ oy ta balbalvune. Mi oy buchʼu chakʼbe jpʼeluk xchiʼil li kʼusitik liʼe, ch-akʼbat xchiʼil svokol yuʼun Dios ek ti te tsʼibabil skʼoplal liʼ ta balbalvune;
19 mi oy buchʼu tslokʼes jpʼeluk li kʼusitik chal li albil kʼop liʼ ta balbalvune, chpojbat yuʼun Dios ek li teʼetik sventa kuxlejal ch-akʼbate xchiʼuk chpojbat li chʼul jteklume, ti jaʼ li kʼusitik tsʼibabil ti liʼ oy ta balbalvune.
20 »Xi chal li buchʼu chalbe skʼoplal li kʼusitike: ‹Jech; poʼot xa xital›.»
«¡Jechuk! Laʼ Kajval Jesus.»
21 Teuk oy ta stojolal buchʼutik chʼul li slekil yutsil yoʼonton Kajvaltik Jesuse.
Tsʼibetik ta yok vun
^ O: «kristal».
^ Kʼelo glosario.
^ O: «Pʼij noʼox yoʼn»; «Nichim noʼox yoʼonton».
^ Kʼelo glosario.
^ O: «slajebe».
^ Jaʼ xkaltik, li buchʼutik tspasilanik li kʼusitik ibalik sba ta sat Diose.
^ Kʼelo glosario.
^ Por·nei·a ta griego. Kʼelo glosario.
^ O: «snopel kʼope»; «ch-epal kʼopojike».
^ O: «smomnichʼonun»; «stsʼunbalun»; «stsʼakalulalun».
^ Kʼelo glosario.
