Apokalipsis 3:1-22
3 »Xi xatsʼibabe batel li anjel ti te oy ta tsobobbail ta Sardise: liʼe jaʼ li kʼusitik chal li buchʼu oy yuʼun li vukub xchʼul espiritu Diose xchiʼuk li buchʼu oy vukpʼej kʼanal yuʼune: ‹Jnaʼoj li kʼusitik chapase, ti xkoʼolaj kʼuchaʼal kuxulot yilele, pe chamemot un.
2 Vikʼiluk-o me asat, jech xtok tsatsubtaso me li skomenal kʼusitik jutuk xaʼox muʼyuk bu xchame, yuʼun muʼyuk bu apasoj skotol li kʼusi tskʼanbot Dios akʼo xapase.
3 Jech oxal chaʼa oyuk me ta ajol ti kʼu yelan laj avichʼe xchiʼuk ti kʼu yelan laj avaʼie, jech me xapas-o batel xtok xchiʼuk suteso me avoʼonton. Yuʼun ta me xital kʼuchaʼal j-elekʼ mi muʼyuk bu chajulave,* jech xtok mu me xanaʼ jayib ora chbat jkʼelot.
4 »›Pe oy jayvoʼuk buchʼutik avuʼun ta Sardis ti muʼyuk bu laj yikʼubtas li skʼuʼike, vaʼun sak skʼuʼ spokʼ tslapik kʼalal chchiʼinikun ta xanbale, yuʼun staik-o.
5 Li buchʼu chkuch yuʼune jaʼ jech chichʼ lapbel li sakil kʼuʼil pokʼile; vaʼun chʼabal me bu ta jtupʼbe jsetʼuk sbi li ta livro sventa kuxlejale, moʼoj, chkal ta yeloval Jtot ti xkojtikine xchiʼuk chkal ta yeloval yaj-anjeltak.
6 Li buchʼu oy xchikine akʼo yaʼi li kʼusi ch-albat yuʼun chʼul espiritu li tsobobbailetike›.
7 »Xi xatsʼibabe batel li anjel ti te oy ta tsobobbail ta Filadelfiae: liʼe jaʼ li kʼusitik chal li buchʼu chʼule,* li buchʼu jaʼ melele, li buchʼu yichʼojbe syave Davide, li buchʼu oy kʼusi tsjam ti muʼyuk buchʼu xmak yuʼune, jech xtok jaʼ li buchʼu oy kʼusi tsmak ti muʼyuk buchʼu xjam yuʼune:
8 ‹Jnaʼoj li kʼusitik chapase, ¡kʼelo avil!, kakʼoj ta atojolal jun tiʼ na ti jamale, ti muʼyuk buchʼu xmak yuʼune. Jech xtok jnaʼoj ti oy jutuk ajuʼele, ti la apas li kʼusi laj kale xchiʼuk ti tukʼ-o laj avakʼ aba ta sventa li jbie.
9 ¡Kʼelo avil! Li jtsop krixchanoetik ti jaʼ yuʼun li Satanase, ti judaetik chalbe sba skʼoplalike, pe ti maʼukike, ti tsjutik kʼope,* ¡kʼelo avil!, chkakʼ talikuk, tskejan sbaik ta avok xchiʼuk chkakʼbe snaʼik ti jkʼanojote.
10 Yuʼun jaʼ jech kuch avuʼun ti kʼu yelan kuch kuʼune, jech oxal ta jchabiot ek li ta yorail preva ti chtal ta stojolal skotol li jnaklejetik ta spʼejel balumil sventa chichʼik akʼel ta preva li buchʼutik nakajtik ta sba balumile.
11 Poʼot xa xital. Jech-o me tukʼ xatsak li kʼusitik oy avuʼun sventa muʼyuk buchʼu xichʼ li akoronae.
12 »›Li buchʼu chkuch yuʼune... chkakʼ kʼotuk ta yoyal* stemplo* Jdios, vaʼun mu xa bu chlokʼ-o te, jech xtok ta jtsʼibabe sbi Jdios ta stojolal xchiʼuk ta jtsʼibabe ta stojolal li sbi steklumal Jdiose, jaʼ li Achʼ Jerusalen ti te chyal talel ta stojolal Jdios ta vinajele, jech xtok ta jtsʼiba ta stojolal ek li kachʼ bie.
13 Li buchʼu oy xchikine akʼo yaʼi li kʼusi ch-albat yuʼun chʼul espiritu li tsobobbailetike›.
14 »Xi xatsʼibabe batel li anjel ti te oy ta tsobobbail ta Laodiseae: liʼe jaʼ li kʼusitik chal li buchʼu Jechuke, ti jaʼ li tukʼil testigoe xchiʼuk ti melele, ti jaʼ li buchʼu baʼyel pasat yuʼun Diose:
15 ‹Jnaʼoj li kʼusitik chapase, ti muʼyuk sikote xchiʼuk ti muʼyuk kʼokʼote. Ta jkʼan yaʼel ti sikukote o ti kʼokʼukote.
16 Jech oxal ta skoj ti kʼunyamanote, ti muʼyuk kʼokʼote xchiʼuk ti muʼyuk sikote, ta me jxetaot lokʼel.
17 Yuʼun xi chavale: «Jkʼulejun xchiʼuk jtaoj xa lek jkʼulejal xchiʼuk muʼyuk xa kʼusi skʼan kuʼun jsetʼuk», pe mu xanaʼ ti toj abol abae, ti xata-o okʼitaele, ti povreote, ti maʼsatote xchiʼuk ti tʼanalote,
18 jaʼ yuʼun ta jpʼijubtasot ti akʼo xaman li j-oro ti lek chikʼbil ta kʼokʼ sventa xapas ta jkʼuleje, ti xaman li jsakil kʼuʼ xtok sventa oyuk kʼusi alapoj xchiʼuk sventa mu xvinaj akʼexlal ta skoj ti tʼanalote, ti xaman li jpomada sventa bekʼ satil xtoke, sventa xajax ta sbekʼ asat yoʼ jech xavil osil.
19 »›Chkakʼbe mantal xchiʼuk ta jtukʼibtas skotol li buchʼutik jkʼanoje. Jech oxal oyuk me tajek ta avoʼonton li kʼusi chapase xchiʼuk suteso me avoʼonton.
20 ¡Kʼelo avil! Liʼ vaʼalun ta tiʼ nae xchiʼuk ta jkʼojilan. Mi oy buchʼu chaʼi chikʼopoj xchiʼuk ti tsjam li tiʼ nae, ta me xi-och batel li ta yut nae xchiʼuk ta me jchiʼin ta veʼel xchiʼuk chchiʼinun ta veʼel ek.
21 Li buchʼu chkuch yuʼune ta me xkakʼ akʼo chotiuk ek li ta chotlebal sventa ajvalilal kuʼune, jech kʼuchaʼal kuch kuʼun xchiʼuk ti lichoti li ta chotlebal sventa ajvalilal yuʼun Jtot eke.
22 Li buchʼu oy xchikine akʼo yaʼi li kʼusi ch-albat yuʼun chʼul espiritu li tsobobbailetike›».
Tsʼibetik ta yok vun
^ O: «chavikʼ asate».
^ Kʼelo glosario.
^ O: «tsnopik kʼope»; «ch-epal kʼopojike».
^ Kʼelo glosario.
^ Kʼelo glosario.
