Apokalipsis 4:1-11
4 Oy kʼusi laj kil kʼalal kʼot xaʼox ta pasel taje, vaʼun, ¡kʼelo avilik!, jamal jun tiʼ na li ta vinajele, li baʼyel yechʼomal eal laj kaʼie xkoʼolaj kʼuchaʼal ch-okʼ okʼes, xi chalbune: «Muyan talel liʼe, vaʼun chkakʼbot avil li kʼusitik chkʼot ta pasele».
2 Kʼalal kʼot xaʼox ta pasel taje, ta ora noʼox kʼot ta jtojolal li xchʼul espiritu Diose: jaʼ yuʼun ¡kʼelo avilik!, oy jun chotlebal sventa ajvalilal ti te oy ta vinajele xchiʼuk oy buchʼu te chotol li ta chotlebal sventa ajvalilale.
3 Li buchʼu te chotole xkoʼolaj kʼuchaʼal jpʼej jaspe ton xchiʼuk jpʼej kʼupil sba tsajal ton, jech xtok li ta spat xokon chotlebal sventa ajvalilale oy jun vaknakʼobal* ti xkoʼolaj kʼuchaʼal esmeralda tone.
4 Li ta spat xokon chotlebal sventa ajvalilale oy te 24 chotlebaletik sventa ajvalilal, li ta chotlebaletik sventa ajvalilal taje te chotajtik 24 ta voʼ moletik* ti slapojik sakil kʼuʼile, jech xtok oy skoronail sjolik ti pasbil ta oroe.
5 Te chlokʼ talel saksevul, yechʼomal eal xchiʼuk chauk li ta chotlebal sventa ajvalilale; jech xtok oy vukub kantil te xtiltun skʼakʼal li ta yeloval chotlebal sventa ajvalilale, taje jaʼ smelolal li vukub xchʼul espiritu Diose.
6 Jech xtok li ta yeloval chotlebal sventa ajvalilale oy kʼusi te oy jech kʼuchaʼal mukʼta nab ti xkoʼolaj kʼuchaʼal nene.*
Li ta oʼlol xchiʼuk ta spat xokon li chotlebal sventa ajvalilale oy te chanib kuxlejaletik ti noj ta bekʼ satil li yelovalike xchiʼuk li spatike.
7 Li baʼyel kuxlejale xkoʼolaj kʼuchaʼal jkot leon, li xchibal kuxlejale xkoʼolaj kʼuchaʼal jkot chʼiom tot vakax, li sat yoxibal kuxlejale xkoʼolaj kʼuchaʼal sat krixchano, li xchanibal kuxlejale xkoʼolaj kʼuchaʼal jkot aguila kʼalal xvilete.
8 Oy vakib xikʼ ta jujuntal li chanib kuxlejaletike; noj ta bekʼ satil li spat xokonike xchiʼuk li ta yolon xikʼike. Jech xtok xi chalilanik-o ta kʼakʼal-akʼobale: «Chʼul, chʼul, chʼul li Jeova Diose, li Buchʼu skotol xuʼ yuʼune, ti oy onoʼox ta voʼnee, ti oy avie xchiʼuk ti chtale».
9 Kʼalal jech-o chalbeik smukʼulale, kʼalal chichʼik ta mukʼe xchiʼuk kʼalal tstojbeik ta vokol li buchʼu te chotol ta chotlebal sventa ajvalilale, ti jaʼ li buchʼu kuxul-o sbatel osile,
10 li 24 ta voʼ moletike tskejan sbaik ta yeloval li buchʼu te chotol li ta chotlebal sventa ajvalilale xchiʼuk chichʼik ta mukʼ li buchʼu kuxul-o sbatel osile, jech xtok te chakʼ ta yeloval chotlebal sventa ajvalilal li skoronaike xchiʼuk xi chalike:
11 «Xata-o albel amukʼulal, ichʼel ta mukʼ xchiʼuk oy ajuʼel Jeova Dios kuʼunkutik, yuʼun voʼot la apas skotol li kʼusitike, oy skotol xchiʼuk laj yichʼ pasel skotol ta skoj ti jech la skʼan avoʼontone».
