Apokalipsis 8:1-13
8 Kʼalal la stʼolbe li svukubal spakʼe te van oʼloluk ora muʼyuk kʼusi xnik* kom li ta vinajele.
2 Jech xtok laj kil li vukvoʼ anjeletik ti te vaʼajtik ta yeloval li Diose xchiʼuk akʼbatik vukub okʼes.*
3 Oy yan anjel xtok ti yichʼoj kʼotel xchikʼobil pom ti pasbil ta oroe, te vaʼal kʼot ta stsʼel li skajleb matanale; akʼbat epal pom* sventa xbat xchikʼ ta skajleb matanal ti pasbil ta oro kʼalal jaʼo ch-aʼibat s-orasionik li buchʼutik chʼule, li skajleb matanale te oy ta yeloval li chotlebal sventa ajvalilale.
4 Li xchʼailal pom ta skʼob anjele xtomet muyel ta yeloval Dios kʼalal jaʼo ch-aʼibat s-orasionik li buchʼutik chʼule.
5 Pe ta anil noʼox la stsak xchikʼobil pom li anjele, la snojes li ta skʼakʼal skajleb matanale, laje la skʼeb ta balumil. Vaʼun lik chauk, lik yichʼ aʼiel yechʼomal eil, xvikʼlajet tajek saksevul xchiʼuk lik nikel.
6 Vaʼun li vukvoʼ anjeletik ti yichʼojik vukub okʼese lik xchapan sbaik sventa tsjupanik.
7 Lik sjupan yokʼes li baʼyel anjele. Vaʼun laj yakʼ bot xchiʼuk kʼokʼ ti kapal ta chʼichʼe, laje laj yichʼ kʼebel ta balumil; vaʼun jun kuarto xa noʼox muʼyuk bu xkʼakʼ ta spʼejel li balumile, jun kuarto xa noʼox muʼyuk bu xkʼakʼ ta skotol li teʼetike xchiʼuk kʼakʼ skotol li yaxal tsʼiʼlele.
8 Lik sjupan yokʼes li xchaʼvoʼal anjele. Vaʼun oy kʼusi xkoʼolaj kʼuchaʼal mukʼta vits ti xtiltun skʼakʼal ti laj yichʼ jipel batel ta nabe. Vaʼun jun kuarto xa noʼox muʼyuk bu xkʼataj ta chʼichʼ li nabe;
9 jech xtok jun kuarto xa noʼox muʼyuk bu xchamik li kʼusitik kuxajtik ta nabe xchiʼuk jun kuarto xa noʼox muʼyuk bu xlilij li varkoetike.*
10 Lik sjupan yokʼes li yoxvoʼal anjele. Vaʼun oy jun mukʼta kʼanal ti xtiltun kʼuchaʼal jun kantil ti pʼaj yalel tal ta vinajele, jun kuarto xa noʼox muʼyuk bu kʼot ta sba li ukʼumetik xchiʼuk nioʼetike.
11 Ajenjo* sbi li kʼanale. Vaʼun jun kuarto xa noʼox muʼyuk bu xchʼaub li voʼe, jech oxal chamik epal krixchanoetik ta skoj ti chʼaub li voʼe.
12 Lik sjupan yokʼes li xchanvoʼal anjele. Vaʼun jun kuarto xa noʼox muʼyuk bu sok li Kʼakʼale, li Ue xchiʼuk li kʼanaletike sventa junuk xa noʼox kuarto muʼyuk bu ch-ikʼub li kʼusitik taje, jech xtok sventa junuk xa noʼox kuarto tsakub osil li ta kʼakʼaltike xchiʼuk sventa junuk xa noʼox kuarto tsakub li ta akʼobaltike.
13 Laj kil jkot aguila ti te xvilet ta oʼlol vinajel ti xi tsots chal laj kaʼie: «¡Abol sbaik, abol sbaik, abol sbaik li buchʼutik te nakalik ta sba balumil ta skoj ti poʼot xa sjupanik yantik okʼes li oxvoʼ anjeletike!».
Tsʼibetik ta yok vun
^ O: «xbakʼ».
^ Kʼelo glosario.
^ Kʼelo glosario.
^ O: «kanovaetike».
^ Li Ajenjoe jaʼ jtos tsʼiʼlel ti chʼa xchiʼuk ti oy svenenoale.
