Ebreos 1:1-14
1 Voʼne xa onoʼox ti ep ta velta la skʼopon jmoltotaktik li Diose xchiʼuk ep ta tos kʼu yelan la skʼopon ti jaʼ la stunes li j-alkʼopetike.
2 Pe ta stojolal Xnichʼon skʼoponojutik li ta slajeb kʼakʼal liʼe, ti jaʼ la svaʼan sventa chuʼunin skotol li kʼusitike xchiʼuk ti jaʼ la stunes sventa la spas skotol li kʼusitik oy ta balumile.*
3 Jaʼ slokʼol smukʼulal Dios li stuke xchiʼuk jaʼ skʼelobil lek ti kʼu yelan li Diose, jech xtok jaʼ yikoj skotol li kʼusitik ta skoj li skʼop ti oy sjuʼele. Vaʼun kʼalal laj xaʼox sakubtas li jmultike choti ta xokon chotlebal sventa ajvalilal yuʼun Dios ta batsʼikʼob te ta vinajel.
4 Jech oxal jaʼ mas mukʼ skʼoplal kʼotem, jaʼ mu sta li anjeletike,* yuʼun jaʼ la spartein ti labal sba kʼu yelan laj yichʼ albel lek skʼoplale, jaʼ mu sta li anjeletike.
5 Jech kʼuchaʼal liʼe, ¿mi oy van junuk velta xi albat yuʼun Dios junuk anjele: «Voʼot jnichʼonot; voʼon, voʼon likʼot ta atot li avi kʼakʼale»? ¿Mi oy van junuk velta xi yaloj xtoke: «Voʼon chikʼot ta stot, vaʼun jaʼ chkʼot ta jnichʼon»?
6 Pe xi chal kʼalal tstak talel yan velta ta balumil li Sba Xnichʼone:* «Akʼo ichʼatuk ta mukʼ* yuʼun skotol li yaj-anjeltak Diose».
7 Jech xtok xi chal ta sventa li anjeletike: «Tspas ta tsatsal juʼelal li yaj-anjeltake, tspas ta leb kʼokʼ li yajtuneltake».
8 Pe xi chal ta sventa li Nichʼonile: «Jaʼ chotlebal sventa ajvalil avuʼun sbatel osil li Diose, li xvaxton* Ajvalile jaʼ li vaxton sventa tukʼilale.
9 La akʼan li tukʼilale,* pe la apʼaj li choplejale. Jech oxal li Diose, li Adiose, la xjaxbot li aseite sventa xkuxetel oʼontonale,* jaʼ mu sta li achiʼiltake».
10 Xi chal xtoke: «Kajval, voʼot laj avakʼbe snakleb balumil li ta slikebale, jaʼ yabtel akʼob li vinajele.
11 Chlajik li stukike, pe li voʼote jech-o me chakuxi; yuʼun chlaj skotolik jech kʼuchaʼal chlaj li kʼuʼil pokʼile,
12 xchiʼuk chapix jech kʼuchaʼal chpixvan jlik natil kʼuʼile, jech kʼuchaʼal jlik kʼuʼil pokʼil; vaʼun chichʼik jeltael. Pe te oyot-o li voʼote xchiʼuk muʼyuk bu chlaj-o li akuxlejale».
13 Pe ¿mi oy van junuk velta xi yalojbe junuk anjele: «Chotlan ta jbatsʼikʼob jaʼ to mi laj kakʼ ta skajleb avok li avajkontratake»?
14 ¿Mi mu jaʼuk sventa tspas chʼul abtelal* skotol li anjeletike xchiʼuk ti takbilik talel sventa chtunik ta stojolal li buchʼutik chuʼuninik li kolebale?
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ O: «Akʼo skejan sbaik ta stojolal».
^ Kʼelo glosario.
^ Kʼelo glosario.
^ O: «spʼijil oʼnale»; «xnichimal oʼontonale».
^ Kʼelo glosario.
