Ebreos 10:1-39
-
Milbil matanal chonbolom ti muʼyuk stue (1-4)
-
Snakʼobal Mantal (1)
-
-
Jun noʼox velta ta j-echʼel li matanal laj yakʼ Kristoe (5-18)
-
Kuxul achʼ be (19-25)
-
Mu xkiktatik ti ta jtsobilan jbatike (24, 25)
-
-
Mantal ta sventa mi yolbaj xa ta jpas jmultike (26-31)
-
Skʼan oyuk stsatsal koʼontontik xchiʼuk xchʼunel koʼontontik sventa xkuch kuʼuntik (32-39)
10 Ta skoj ti oy snakʼobal li Mantal ta sventa li kʼusitik lek chtale, pe ti maʼuk sbatsʼi kʼoplal li kʼusitike, mi jaʼuk onoʼox xuʼ yuʼun li krixchanoetik ti xtukʼib yuʼunik li buchʼutik chnopajik ta stojolal kʼalal chakʼilanik jujun jabil li milbil matanaletike.
2 ¿Mi mu lajemuk xa skʼoplal jechuk li yakʼel milbil matanal ti sakuk xa komik ta jun noʼox velta li buchʼutik tspasik chʼul abtelal ti chʼabaluk xa smul chaʼi ta sjol yoʼontonike?
3 Moʼoj, li milbil matanal taje jaʼ sventa tsvules ta jolil jujun jabil li mulile,
4 yuʼun mu xchʼay yuʼun mulil li xchʼichʼel tot vakax xchiʼuk li xchʼichʼel tot tentsune.
5 Jech oxal xi chal kʼalal ch-och talel ta balumile: «‹Muʼyuk xakʼan milbil matanal xchiʼuk li matanale, pe la achapanbun jbekʼtal.
6 Muʼyuk bu lek laj avil chikʼbil matanaletik* mi jaʼuk matanaletik sventa mulil›.*
7 Jaʼ yuʼun xi laj kale: ‹¡Kʼelo avil! Lital (te tsʼibabil jkʼoplal li ta balbalvune)* sventa ta jpas li kʼusi tskʼan avoʼontone, Dios›».
8 Kʼalal xi xaʼox laj yal ta baʼyele: «Muʼyuk bu la akʼan xchiʼuk muʼyuk bu lek laj avil milbil matanaletik, matanaletik, chikʼbil matanaletik xchiʼuk mi jaʼuk matanaletik sventa mulil» —milbil matanaletik ti chichʼ akʼel jech kʼuchaʼal chal li Mantale—
9 vaʼun xi chale: «¡Kʼelo avil! Lital sventa ta jpas li kʼusi tskʼan avoʼontone». Tslajesbe skʼoplal li kʼusi baʼyel sventa chchotanbe skʼoplal li xchibale.
10 Ta sventa ‹li kʼusi tskʼan yoʼonton› taje, laj kichʼtik chʼultajesel ta sventa ti laj yakʼ sbekʼtal ta jun noʼox velta ta j-echʼel li Jesukristoe.
11 Jech xtok, te chtunik jujun kʼakʼal skotol li paleetik sventa tspasilanik-o li xchʼul abtelike xchiʼuk sventa chakʼilanik li milbil matanal ti jaʼ onoʼoxe, akʼo mi jech, mu xtupʼ yuʼun ta j-echʼel li muliletike.
12 Pe jun noʼox velta ta j-echʼel laj yakʼ milbil matanal ta sventa muliletik li vinik taje xchiʼuk te choti ta sbatsʼikʼob Dios,
13 vaʼun li vaʼ kʼakʼale te smalaoj sventa ch-akʼbat ta skajleb yok li yajkontratake.
14 Yuʼun ta jun noʼox milbil matanal laj xa stukʼibtas sbatel osil li buchʼutik yakal chichʼik chʼultajesele.
15 Jech xtok, jamal chalbutik li chʼul espiritu eke, yuʼun kʼalal xi xaʼox laj yale:
16 «‹Liʼe jaʼ li trato ta jpas xchiʼukik kʼalal mi echʼ li vaʼ kʼakʼale —xi li Jeovae—. Ta xkakʼbe ta yoʼontonik li jmantale xchiʼuk ta jtsʼibabe ta snopbenik›».
17 Vaʼun xi chale: «Muʼyuk xa bu ta jvules ta jol li smulike xchiʼuk li xchopolalike».
18 Jaʼ yuʼun chaʼa, mi pasbil xa ta perton li kʼusitik taje muʼyuk xa chichʼ akʼel yan matanal sventa mulil.
19 Jaʼ yuʼun kermanotak, ta skoj ti oy stsatsal koʼontontik* ta sventa li sbelel Batsʼi Lekil Chʼul Kuarto ta skoj li xchʼichʼel Jesuse,
20 ti jaʼ lik ochuk ta abtel yuʼun ta jventatik jech kʼuchaʼal kuxul achʼ be ta skoj li kortinae, jaʼ xkaltik, li sbekʼtale
21 xchiʼuk ti oy mukʼta pale kuʼuntik ta sventa li sna Diose,
22 nopajkutik ta sjunul koʼontontik xchiʼuk ta skotol xchʼunel koʼontontik, yuʼun sak xa koʼontontik, lek xa jol koʼontontik xchiʼuk sakubtasbil xa ta sakil voʼ li jbekʼtaltike.
23 Skʼan me lek jamal xkaltik batel ta stojolal krixchanoetik li spatobil koʼontontike, mu me xchibetuk koʼonton jpastik, yuʼun tukʼ li buchʼu jamal laj yale.
24 Jech xtok, skʼan me oyuk ta koʼonton jbatik ta jujuntal yoʼ jtijbe jba koʼontontik sventa jkʼan jbatik xchiʼuk ti jpastik li kʼusitik toj leke,
25 jech xtok, mu me xkiktatik ti ta jtsob jbatik* jech kʼuchaʼal oy nopem xaʼiik spasel junantike, jaʼ lek jpatbe jba koʼontontik ta jujuntal, mas to skʼan jech jpastik ta skoj ti chnopaj xa talel skʼakʼalil chavilike.
26 Yuʼun mi yolbaj xa ta jpas jmultik kʼalal xkojtikintik xa lek li kʼusi melele, muʼyuk xa me yan milbil matanal xuʼ xkakʼtik ta sventa li jmultike,
27 muʼyuk xa, yuʼun malabil xiʼel sba chapanel xchiʼuk skʼakʼal oʼontonal ti xtiltun tajek ti tslajes li buchʼutik chkontrainvanike.
28 Mi oy laj yal chaʼvoʼ o oxvoʼ testigo ti oy buchʼu muʼyuk tspas li kʼusi chal Smantal Moisese chʼabal me xkʼuxul oʼontonal chichʼ milel un bi.
29 ¿Mi mu van masuk to chichʼ kastigo xanaʼik li jun krixchano ta skoj ti la xpechʼilan ta tekʼel li Xnichʼon Diose xchiʼuk ti batsʼi chʼabal sbalil chil xtok li chʼichʼ sventa trato ti jaʼ laj yichʼ-o chʼultajesele, ti chopol chalbe skʼoplal xtok li xchʼul espiritu Dios ti jaʼ tstunes sventa chakʼ ta ilel li slekil yutsil yoʼontone?
30 Yuʼun xkojtikintik li Buchʼu xi yaloje: «Voʼon oy ta jba ta jpakbe skʼoplal; voʼon chkakʼbe stojol». Xi laj yal yan veltae: «Chchapan steklumal li Jeovae».
31 Toj xibal me sba kʼalal chij-och ta skʼob li kuxul Diose.
32 Pe vuleso-o me ta ajolik li kʼusi komem xa ta patile, yuʼun kuch avuʼunik xchiʼuk laj avil avokolik ta tsatsal prevaetik kʼalal ta sakil osil xaʼox oyoxuke.
33 Oy bateltik ti ta sat krixchanoetik laj avichʼik chopol kʼoptaele* xchiʼuk ti la-akʼbat tsots avokolike, jech xtok oy bateltik ti te achiʼukik* li buchʼutik jech la snuptanik kʼuchaʼal taje.
34 Yuʼun kʼuxubaj ta avoʼontonik li buchʼutik ochik ta chukele xchiʼuk xkuxet tajek avoʼontonik* laj avaʼiik kʼalal lapojbatik li kʼusitik oy avuʼunike, yuʼun anaʼojik ti oy kʼusitik mas lek avuʼunike xchiʼuk ti mu snaʼ xlaje.
35 Jech oxal jechuk-o me tsots avoʼontonik, yuʼun ep tajek chata amotonik mi jech chapasike.
36 Yuʼun skʼan xkuch avuʼunik, yuʼun chavichʼik li kʼusi onoʼox albil skʼoplal chkʼot ta pasel mi laj xaʼox apasbeik li yabtel Diose.
37 Yuʼun «jutuk xa yorail», vaʼun «chvul onoʼox li buchʼu chtale, muʼyuk bu chjalij».
38 «Pe chkuxi ta skoj xchʼunel yoʼonton li tukʼil kajtunele», pe «muʼyuk me bu xkuxet koʼonton yuʼun mi tsut ta valopate».
39 Yan li voʼotike maʼukutik jech kʼuchaʼal li krixchano ti tsut ta valopat sventa chbat ta lajelale, moʼoj, jaʼutik jech kʼuchaʼal li krixchano ti oy xchʼunel yoʼonton sventa kuxuluk-oe.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ O: «jpatoj koʼontontik».
^ O: «mu xchʼay ta joltik ta jtsob jbatik».
^ S.gr.: «jech kʼuchaʼal ta teatro ti laj avichʼik chopol kʼoptaele».
^ S.gr.: «te kapal akʼoplal xchiʼukik».
^ O: «echʼem pʼij avoʼnik»; «nichim noʼox avoʼontonik».
