Ebreos 11:1-40
11 Li xchʼunel oʼontonale jaʼ ti oy kʼusi malabil ti chkʼot onoʼox ta pasel ta persae, jaʼ slekil vinajeb ti kʼusitik onoʼox jaʼe akʼo mi mu xvinaj ta kʼelel.
2 Yuʼun ta skoj xchʼunel oʼontonal lek albat skʼoplalik li voʼneal krixchanoetike.*
3 Ta skoj xchʼunel koʼontontik chkiltik ti lek xchapet yuʼun skʼop Dios skotol li kʼusitik oy ta balumile,* jaʼ yuʼun li kʼusitik xkiltike ayan ta skoj li kʼusitik mu xkiltike.
4 Ta skoj xchʼunel yoʼonton li Abele laj yakʼ milbil matanal ti mas oy sbalil ta stojolal li Diose, ti jaʼ mu sta li yuʼun Kaine. Ta skoj xchʼunel yoʼonton laj yichʼ albel skʼoplal ti tukʼ li Abele, yuʼun tsakbat ta mukʼ yuʼun Dios li matanaletik laj yakʼe, akʼo mi chamem xa, chkʼopoj to ta skoj li xchʼunel yoʼontone.
5 Ta skoj xchʼunel yoʼonton li Enoke laj yichʼ ikʼel batel sventa muʼyuk bu chil lajelal jech kʼuchaʼal chlaj li krixchanoetike, vaʼun muʼyuk bu laj yichʼ tael ta bu jotukal, yuʼun ikʼat batel yuʼun Dios; pe kʼalal muʼyuk toʼox bu ikʼbil batele laj yichʼ albel skʼoplal ti lek ilat yuʼun li Diose.
6 Jech xtok, muʼyuk lek chilutik Dios mi chʼabal xchʼunel koʼontontike, yuʼun li buchʼu chnopaj ta stojolal Diose skʼan xchʼun ti oye xchiʼuk ti ch-akʼbat smotonik li buchʼutik ta sjunul yoʼonton tsaʼike.
7 Kʼalal laj xaʼox yichʼ pʼijubtasel yuʼun Dios li Noe ta sventa li kʼusitik mu xvinaje, ta skoj xchʼunel yoʼonton laj yakʼ ta ilel ti xiʼtaoj Diose, vaʼun la spas jun arka sventa xkol li yutsʼ yalale; ta skoj li xchʼunel yoʼontone vinaj ti oy smul li krixchanoetike, jech oxal la spartein li tukʼilal ta sventa li xchʼunel oʼontonale.
8 Kʼalal laj yichʼ takel ta ikʼel li Abraane, ta skoj xchʼunel yoʼonton la xchʼun mantal, yuʼun lokʼ batel sventa oy bu chbat ti jaʼ ch-akʼbat kʼuchaʼal spartee; akʼo mi mu snaʼ ti bu chbate, bat onoʼox.
9 Ta skoj xchʼunel yoʼonton naki kʼuchaʼal j-echʼel be ta yan lum ti jaʼ onoʼox li balumil albil skʼoplale, naki ta karpanaetik xchiʼuk Isaak xchiʼuk Jakob,* ti jaʼik li buchʼutik tsparteinik ek li kʼusi albil skʼoplale.
10 Yuʼun jaʼ smalaoj li jteklum ti oy lek sbatsʼi naklebe, ti jaʼ tspas* xchiʼuk ti jaʼ tsvaʼan li Diose.
11 Ta skoj xchʼunel yoʼonton li Sara eke, akʼo mi echʼem xaʼox tajek sjabilal akʼbat yip sventa xuʼ xchiʼin yol,* yuʼun li Sarae tukʼ laj yil li Buchʼu laj yale.
12 Jaʼ yuʼun chaʼa, ta skoj noʼox jun vinik, ti chamem yaʼeluke, ep tajek vokʼ* xnichʼnab jech kʼuchaʼal li epal kʼanaletik ta vinajele, jech xtok, mu stakʼ chapel jech kʼuchaʼal li jiʼ* oy ta tiʼ nabe.
13 Oy xchʼunel yoʼonton chamik skotol li buchʼutik taje, akʼo mi muʼyuk bu kʼot ta pasel ta skʼakʼalilik li kʼusi onoʼox albil skʼoplal chkʼot ta pasele, laj yilik ta nom xchiʼuk lek la xchʼamik, jech oxal jamal laj yalik ti jaʼik jyanlumetike xchiʼuk ti j-echʼel beik noʼox liʼ ta balumile.
14 Yuʼun li buchʼutik jech chkʼopojike jamal chakʼik ta ilel ti ta sjunul yoʼonton tsaʼik ti bu chnakiike.
15 Akʼo mi jech, ti jechuk-o la svules ta sjolik ti bu lokʼik tale xuʼ van sutik batel ti jechuke.
16 Pe li avie tskʼan tstaik ti bu mas leke, jaʼ xkaltik, ti teuk tsakal skʼoplal ta sventa li vinajele. Jech oxal, muʼyuk bu chkʼexav Dios ta stojolalik kʼalal chtaat ta kʼoponel ti jaʼ Sdiosike, yuʼun xchapanoj xa jun jteklum sventa chuʼuninik.
17 Kʼalal akʼat ta preva li Abraane, ta skoj xchʼunel yoʼonton, laj yakʼ xkaltik li Isaake, li buchʼu ta sjunul yoʼonton la xchʼam li kʼusitik albil onoʼox skʼoplale oy ta yoʼonton laj yakʼ li jun noʼox xnichʼone,
18 akʼo mi xi onoʼox albile: «Li buchʼu tsbiin ‹anitilulal›,* xie, jaʼ te chlik talel ta stojolal li Isaake».
19 Pe la snop ti xuʼ chchaʼkuxes li Diose, kʼalal jech kʼot ta pasele kʼot jech kʼuchaʼal jun skʼelobil.
20 Ta skoj xchʼunel yoʼonton ek li Isaake laj yakʼbe bendision li Jakob xchiʼuk Esau ta sventa li kʼusitik chtal ta jelavele.
21 Kʼalal jutuk xaʼox skʼan xcham li Jakobe, ta skoj xchʼunel yoʼonton laj yakʼbe bendision ta jujuntal li xnichʼnab Josee xchiʼuk laj yichʼ ta mukʼ Dios kʼalal stsakoj snamteʼe.
22 Kʼalal jutuk xaʼox skʼan xcham li Josee, ta skoj xchʼunel yoʼonton laj yalbe skʼoplal ti chlokʼik batel li j-israeletike xchiʼuk laj yal mantal ta sventa ti kʼu yelan chichʼ mukele.*
23 Ta skoj ti oy xchʼunel yoʼonton stot smeʼ li Moisese la snakʼik oxib u kʼalal vokʼe, yuʼun laj yilik ti toj kʼupil sba li olole xchiʼuk muʼyuk la xiʼtaik li smantal ajvalile.
24 Kʼalal chʼi xaʼox li Moisese, ta skoj xchʼunel yoʼonton muʼyuk bu la skʼan albel ti jaʼ yol li stseb Faraone,*
25 jaʼ la stʼuj ti akʼo yichʼ ilbajinel xchiʼuk li steklumal Diose, jaʼ muʼyuk la stʼuj ti akʼo skʼupin kʼuk sjalil li mulile,
26 yuʼun jaʼ mas mukʼta kʼulejal laj yil li chopol kʼoptael ta sventa Kristoe, ti jaʼ mu sta li skʼulejal Ejiptoe; yuʼun jaʼ skʼeloj batel lek li matanale.
27 Ta skoj xchʼunel yoʼonton laj yikta li Ejiptoe, pe muʼyuk bu xiʼo li ta skʼakʼal yoʼonton ajvalile, yuʼun xkoʼolaj kʼuchaʼal te skʼeloj-o yilel li Buchʼu mu xvinaj ta kʼelele.
28 Ta skoj xchʼunel yoʼonton la spas kʼin Koltael* xchiʼuk la sbon chʼichʼ ta smarkoal tiʼ na sventa jech mu xmilbatik li sba xnichʼonik* yuʼun li jmilvaneje.
29 Ta skoj xchʼunel yoʼontonik la xtuchʼik Tsajal Nab jech kʼuchaʼal takin balumil, pe laj yichʼik bikʼel ochel kʼalal jech la spasik li j-ejiptoetike.
30 Ta skoj xchʼunel yoʼonton krixchanoetik jin yalel smuroaltak lum Jeriko kʼalal laj xaʼox sjoyibtaik ta xanbal vukub kʼakʼale.
31 Ta skoj xchʼunel yoʼonton Raab, ti jaʼ jchonbail antse,* muʼyuk koʼol cham xchiʼuk li buchʼutik muʼyuk la xchʼunik mantal ta melele, yuʼun ta slekil yoʼonton la xchʼam li jpaʼivanejetike.*
32 ¿Buchʼu van mas chkalbe skʼoplal? Yuʼun mu xlokʼ-o yorail kuʼun ti xkalbe skʼoplal li Jedeone, li Barake, li Sansone, li Jeftee, li Davide, jech xtok chʼabal yorail kuʼun ti xkalbe skʼoplal xtok li Samuel xchiʼuk li yan j-alkʼopetike.
33 Ta skoj xchʼunel yoʼontonik la stsalik ajvaliletik, la spasik li kʼusi tukʼe, oy kʼusi albat ch-akʼbatik, la smakbeik ye leonetik,
34 la xyochbeik yip kʼokʼ, jatavik lokʼel ta ye espada, tsatsubtasatik akʼo mi kʼunik toʼox, tsatsubik ta paskʼop xchiʼuk jatav yuʼunik jkontrainvanej soltaroetik.
35 Oy antsetik ti la xchʼam yanimaik ti chaʼkuxiik tale, pe oy yan viniketik ti tsots tajek akʼbat svokolik ta skoj ti muʼyuk la xchʼamik li kolebal ta skoj pojelale, taje jaʼ sventa staik li chaʼkuxesel ti mas leke.
36 Jech, laj yichʼik preva kʼalal labanatik xchiʼuk kʼalal laj yichʼik tsitsel* li yantike, ta melel maʼuk noʼox taje, laj yichʼik preva ta kadena xtok xchiʼuk tikʼatik ta chukel.
37 Akʼbatik ton, akʼatik ta preva, laj yichʼik tuchʼel ta oʼlol ta sierra, laj yichʼik milel ta espada, la stunes ta skʼuʼ spokʼik nukulil chij xchiʼuk nukulil tentsun kʼalal jaʼo bu xtal xbatike, solel muʼyuk kʼusi oy yuʼunik, laj yil tsots svokolik xchiʼuk laj yichʼik ilbajinel;
38 li krixchanoetike mu sta-o ti liʼ oyik ta stojolalik li buchʼutik taje. Xanavik ta takixokol balumil, ta vitstik, ta chʼentik xchiʼuk ta nail chʼentik.
39 Akʼo mi lek laj yichʼ albel skʼoplalik ta skoj xchʼunel yoʼonton skotolik taje, muʼyuk bu kʼot ta pasel ta skʼakʼalilik li kʼusi albil onoʼox skʼoplal chkʼot ta pasele,
40 yuʼun baʼyel xa onoʼox la snop Dios ti oy kʼusi mas lek ta jventatike, sventa mu baʼyeluk xichʼik tukʼibtasel, ti jaʼ tsʼakal to li voʼotike.
Tsʼibetik ta yok vun
^ O: «jmoltotaktik ta voʼne».
^ Kʼelo glosario.
^ Kʼelo glosario.
^ O: «arkitekto».
^ S.gr.: «snitilulal».
^ O: «ayan».
^ O: «yiʼ».
^ O: «amomnichʼon»; «atsʼunbal»; «atsʼakalul».
^ S.gr.: «ta sventa sbakiltak».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «jpamukʼtavanejetike»; «jpayivanejetike».
^ Kʼelo glosario.
