Ebreos 12:1-29
12 Jaʼ yuʼun chaʼa, ta sventa ti oy epal testigoetik kuʼuntik ti sjoyibtaojutike, jlokʼestik ek skotol li kʼusi ole xchiʼuk li mulil ti ta anil chchukutike, jech xtok kuchuk me kuʼuntik li anilajel ti te akʼbil ta kelovaltike,
2 jkʼeltik batel lek li Bankilal Jbeiltasvaneje* xchiʼuk li Jtukʼibtasvanej yuʼun xchʼunel koʼontontike, li Jesuse. Kuch yuʼun milel ta jtel teʼ sventa vokolil* xchiʼuk li kʼexlaltasel ta sventa li xkuxetel oʼontonal* ti te akʼbil ta yelovale, jech xtok choti xa ta xokon chotlebal sventa ajvalilal yuʼun Dios ta batsʼikʼob.
3 Jech, kʼelik lek xchiʼuk tsʼetano lek achikinik ta stojolal li buchʼu kuch yuʼun skotol xchopol kʼopojel li buchʼutik tskontrain sba stukike, sventa mu xalubtsajik xchiʼuk sventa mu xchibaj avoʼontonik.
4 Pe li voʼoxuke muʼyuk to bu chmal achʼichʼelik ta spasel kʼop sventa xatsalik li mulile.
5 Xchiʼuk jpʼel chʼayem ta ajolik ti xi laj avichʼik albel mantal kʼuchaʼal nichʼnabiletike: «Kuni nichʼon, tsako me lek ta mukʼ li tukʼibtasel chakʼ Jeovae xchiʼuk mu me xchibaj avoʼonton kʼalal tstukʼibtasote;
6 yuʼun li Jeovae tstukʼibtas li buchʼu skʼanoje, ta onoʼox stsits* skotol li buchʼu chchʼam kʼuchaʼal xnichʼone».
7 Skʼan xkuch avuʼunik, yuʼun jaʼ te tsakal skʼoplal li tukʼibtasele. Jech chiloxuk kʼuchaʼal xnichʼnab li Diose. ¿Mi oy van junuk nichʼonil ti muʼyuk bu chtukʼibtasat yuʼun li stote chaʼa?
8 Maʼuk mero nichʼnabiloxuk jechuk ti muʼyukuk laj avichʼik tukʼibtasel akotolike.
9 Jech, nopem xaʼi tstukʼibtasutik li jtotik liʼ ta balumile, akʼo mi jech kichʼojtik ta mukʼ. ¿Mi mu masuk to van skʼan jchʼunbetik smantal li Jtotik sventa jkuxlejaltik ti la stʼujutik ta xchʼul ip ti jaʼ sventa chijkuxi yuʼune?
10 Yuʼun li stukike oy noʼox kʼuk sjalil la stukʼibtasutik jaʼ ti kʼu yelan lek laj yil stukike, pe li Diose jech tspas sventa jtabetik sbalil yoʼ chʼuluk xijkʼot jech kʼuchaʼal li stuke.
11 Melel onoʼox ti mu jtosuk tukʼibtasel xijmuyubaj xa yuʼun li avie, moʼoj, yuʼun toj kʼux; akʼo mi jech, li ta mas tsʼakale chakʼbutik jun oʼontonal xchiʼuk tukʼilal ta sventa li chanubtasel yuʼun tukʼibtasele.
12 Jaʼ yuʼun tsatsubtaso li akʼobik ti jecheʼ te jokʼole xchiʼuk tukʼibtaso li sjol avakanik ti kʼunibeme
13 xchiʼuk jechuk-o me tukʼ xapas batel abeik ta sventa li avokike, sventa mu xpitkʼuj lokʼel sbakil ti bu koxoe, moʼoj, jaʼ mas lek ti koluke.
14 Jaʼ xapasik batel li kʼusi chakʼ jun avoʼonton akotolike xchiʼuk chʼulukoxuk me, yuʼun mi moʼoje muʼyuk buchʼu xil li Kajvaltike.
15 Kʼelik me lek ti mu me xavikta abaik ta stael li slekil yutsil yoʼonton Diose sventa mu me kʼusi xchʼi talel yibel ta atojolalik ti oy svenenoal ti xuʼ xlik-o kʼope xchiʼuk sventa mu epuk buchʼutik xikʼubtas sbaik ta skoj;
16 jech xtok mu me buchʼu junukal xmulivaj* avuʼunik xchiʼuk ti mu xichʼ ta kʼux li kʼusitik chʼul jech kʼuchaʼal la spas Esaue, ti ta jlech noʼox veʼlil laj yakʼ ta moton li sderecho ta sventa ti jaʼ sba nichʼonile.*
17 Yuʼun anaʼojik lek ti kʼalal tskʼan xa tspartein ta tsʼakal li bendisione, laj yichʼ pʼajel; manchuk mi x-okʼolet tajek la skʼan ti akʼo to jeluk snopbene, muʼyuk xa la sta.
18 Yuʼun li voʼoxuke maʼuk nopajemoxuk ta stojolal li kʼusi stakʼ pikel ti laj yichʼ tsanbel skʼakʼale, maʼuk nopajemoxuk ta stojolal li ikʼal toke, mi jaʼuk li ta ikʼal osile, mi jaʼuk li ta ikʼaloʼe,
19 mi jaʼuk li ta yechʼomal okʼese,* mi jaʼuk li ta yechʼomal eile, ti jaʼ ta skoj la skʼanik vokol ti mu xa xkʼoponatik li jteklum kʼalal laj yaʼiike.
20 Yuʼun mu stsʼik yuʼunik li mantal liʼe: «Skʼan xichʼ akʼbel ton kʼalal chpechʼ ta tekʼel vits li chonbolom eke».
21 Xi laj yal Moises ek ta skoj ti solel xibal sba li kʼusi yakal chkʼot ta pasele: «Solel chixiʼ xchiʼuk xitʼeltʼun».
22 Pe li voʼoxuke nopajemoxuk ta stojolal jun Vits Sion* xchiʼuk ta jun steklumal kuxul Dios ti jaʼ li Jerusalen ta vinajele, ta stojolal li sjaylajunebal xa noʼox mil anjeletike,
23 ta stojolal komon tsobajel, ta stojolal stsobobbail li sba nichʼoniletik ti laj yichʼ tsakbel sbiik ta vinajele, ta stojolal Dios ti jaʼ Jchapanvanej yuʼun skotol krixchanoetike, ta stojolal tukʼil kuxlejaletik ti vokʼemik* ta chʼul espiritu ti yichʼojik xa tukʼibtasele,
24 ta stojolal Jesus ti jaʼ jkʼopojel ta sventa li achʼ tratoe xchiʼuk li chʼichʼ laj yichʼ vijel ti jaʼ mas leke, ti jaʼ mu sta li xchʼichʼel Abele.
25 Kʼelik me lek ti mu me xavikta abaik ta xchikintabel li buchʼu yakal chkʼopoje. Yuʼun mi muʼyuk bu kolik li buchʼutik laj yikta sbaik ta xchikintabel li buchʼu pʼijubtasvan ta sventa Dios liʼ ta sba balumile, ¡mu voʼotikuk xa chijkolutik mi la jchʼak jbatik ta stojolal li buchʼu chkʼopoj talel ta vinajele!
26 Yuʼun ta yechʼomal ye la slilin balumil li vaʼ kʼakʼale, pe xi to jamal yaloj li avie: «Oy to me jun velta ti maʼuk noʼox ta jlilin li balumile, yuʼun ta jlilin li vinajel xtoke».
27 Vaʼun chaʼa, kʼalal «oy to me jun velta», xie, jaʼ skʼan xal ti chichʼ lokʼesel li kʼusitik chichʼ lilinele, li kʼusitik laj yichʼ pasele,* sventa te chkom li kʼusitik muʼyuk bu chichʼ lilinele.
28 Jaʼ yuʼun, ta skoj ti chkichʼtik jun Ajvalilal ti mu stakʼ xichʼ lilinele, jechuk-o me jchʼamtik li slekil yutsil oʼontonal ti jaʼ tskoltautik ta spasel li chʼul abtelal ta stojolal Dios sventa lekuk chʼambile, ta xiʼtaeluk Dios xchiʼuk ta ichʼeluk ta mukʼ ta sjunul oʼontonal.
29 Yuʼun li Jdiostike jaʼ jun kʼokʼ ti chchikʼvan xtoke.
Tsʼibetik ta yok vun
^ Kʼelo glosario.
^ Kʼelo glosario.
^ O: «spʼijil oʼnal»; «xnichimal oʼontonal».
^ O: «chakʼbe kastigo».
^ Por·nei·a ta griego. Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «ayanemik».
^ Jaʼ xkaltik, li kʼusitik pasbil ti maʼuk la spas Diose.
