Ebreos 2:1-18
2 Jaʼ yuʼun tsots skʼoplal ti xkakʼ mas ta koʼontontik xchikintael li kʼusitik nopem onoʼox xkaʼitik xchikintael sventa mu xijchʼay jsetʼuk ta bee.
2 Yuʼun mi kʼot onoʼox ta pasel li kʼusitik laj yal anjeletik xchiʼuk mi laj onoʼox yichʼ kastigo skotol li jpasmulil xchiʼuk skotol li buchʼu mu xchʼun mantal* jech kʼuchaʼal chal li tukʼilale,
3 ¿kʼuxi xuʼ xijkol mi muʼyuk kichʼojtik ta mukʼ li mukʼta kolebale? Yuʼun lik yalbe skʼoplal Kajvaltik xchiʼuk jech chalbutik ek li buchʼutik la xchikintabeike,
4 ti laj yalbe skʼoplal Dios ek kʼalal la stunes senyailtak,* kʼusitik labalik sba, ep ta tos skʼelobiltak juʼelal* xchiʼuk ti la xchʼak chʼul espiritu* jech kʼuchaʼal la skʼan yoʼontone.
5 Li balumil chtal ti yakal chkalbekutik skʼoplale maʼuk ta yok skʼob anjeletik laj yakʼ.
6 Pe oy bu xi laj yal jun testigoe: «¿Mi yuʼun tsots skʼoplal li vinik sventa te oyuk ta ajole o mi yuʼun tsots skʼoplal li xnichʼon krixchano* sventa chachabie?
7 Mas bikʼit jutuk skʼoplal la apas li stuke, jaʼ mas mukʼ skʼoplal jutuk li anjeletike; laj avakʼbe skorona ta sventa mukʼulal xchiʼuk ta sventa ichʼel ta mukʼ xchiʼuk laj avakʼbe sbain li yabteltak akʼobe.
8 Laj avakʼbe ta yok skʼob skotol li kʼusitike». Kʼalal laj yakʼbe ta yok skʼob skotol li kʼusitike, muʼyuk kʼusi jtosuk ti muʼyuk akʼbat ta yok skʼob yuʼun li Diose. Akʼo mi jech, li avie muʼyuk to bu chkiltik ti oy ta yok skʼob skotol li kʼusitike.
9 Akʼo mi jaʼ mas bikʼit jutuk skʼoplal laj yichʼ pasel li Jesuse, ti jaʼ mas mukʼ skʼoplal jutuk li anjeletike, chkiltik avi ti laj xa yichʼ skorona ta sventa mukʼulal xchiʼuk ta sventa ichʼel ta mukʼ ta skoj ti laj yil svokol ta lajelale, ta sventa slekil yutsil yoʼonton* Dios la spas preva lajelal sventa skotol li krixchanoetike.
10 Skotol li kʼusitik oye jaʼ sventa yichʼobil ta mukʼ Dios xchiʼuk jaʼ ta skoj ti oy skotole. Jaʼ yuʼun chaʼa, sventa xichʼ toybel skʼoplal epal nichʼnabiletike, li Diose tsots skʼoplal chil ti stukʼibtas ta vokoliletik li Bankilal Jbeiltasvaneje.* Jaʼ ta stojolal Bankilal Jbeiltasvanej tskolta nichʼnabiletik li Diose.
11 Jaʼ yuʼun li buchʼu chchʼultajesvan xchiʼuk li buchʼutik yakal chichʼik chʼultajesele, ta jun noʼox likemik tal skotolik, jech oxal muʼyuk bu chkʼexav kʼalal «kermanotak», xute,
12 xi chale: «Chkalbe skʼoplal abi ta stojolal li kermanotake; ta jkʼupil kʼoptaot ta kʼejojetik ta stojolal tsobobbail».*
13 Xi chal yan veltae: «Ta jpat koʼonton ta stojolal». Xi chal yan veltae: «¡Kʼelo avilik! Voʼon xchiʼuk li uni nichʼnabiletik ti jaʼ laj yakʼbun li Jeovae».*
14 Jaʼ yuʼun ta skoj ti oy xchʼichʼelik xchiʼuk ti oy sbekʼtalik li «uni nichʼnabiletike», jech li stuk eke oy toʼox xchʼichʼel xchiʼuk oy toʼox sbekʼtal, sventa ta skoj slajelal xuʼ slajesbe skʼoplal ta jyalel li buchʼu xuʼ yuʼun chmilvane, jaʼ xkaltik, li Diabloe;*
15 xchiʼuk tskolta lokʼel skotol li buchʼutik oyik toʼox ta mosoil ta sjunlej xkuxlejalik ta skoj ti chiʼtaik li lajelale.
16 Yuʼun ta melel maʼuk anjeletik ti buchʼu yakal tskoltae, jaʼ yakal tskolta li snitilulal* Abraane.
17 Jaʼ yuʼun jech skʼan xkʼot jech kʼuchaʼal «yermanotak» ta skotol kʼusitik sventa xkʼot ta jkʼuxubinvanej mero bankilal pale* xchiʼuk sventa tukʼ xkʼot ta skotol li kʼusitik ta sventa Diose, sventa xuʼ xakʼ matanal sventa smul krixchanoetik yoʼ lekuk xil sbaik xchiʼuk li Diose.
18 Ta skoj ti laj yil svokol kʼalal akʼat ta preva li stuke, xuʼ skolta li buchʼutik yakal ch-akʼatik ta prevae.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «smomnichʼon»; «stsʼunbal»; «stsʼakalul».
^ Kʼelo glosario.
