Ebreos 3:1-19
3 Jaʼ yuʼun chʼul ermanoetik, ti te akʼoplalik ta sventa li takel ta ikʼel ta vinajele, tsakik me lek ta venta li jtakbol* xchiʼuk li mero bankilal pale* ti jamal chkalbekutik skʼoplale: li Jesuse.
2 Yuʼun tukʼ laj yakʼ sba ta stojolal li Buchʼu vaʼanate, jech kʼuchaʼal tukʼ laj yakʼ sba ta spʼejel sna* Dios li Moisese.
3 Yuʼun li stuke* mas sta-o ti oy smukʼulale, jaʼ mu sta li Moisese, yuʼun jaʼ mas tsots skʼoplal li stuke, jaʼ mu sta li na la svaʼane.
4 Ta melel, oy buchʼu svaʼanoj li jujupʼej nae, pe jaʼ spasoj Dios skotol li kʼusitik oye.
5 Tana un tukʼil jtunel laj yakʼ sba ta spʼejel sna Dios li Moises ti jaʼ svinajeb li kʼusitik chichʼ albel skʼoplal ta mas jelavele,
6 pe li Kristoe* tukʼ laj yakʼ sba kʼuchaʼal nichʼonil ta sna li Diose. Jaʼ snautik mi tukʼ chkakʼ jbatik ta stojolal li kʼusi jamal chkaltik ta melele xchiʼuk li spatobil koʼontontik ti jaʼ xijmuyubaj-o* yuʼun kʼalal to ta slajebe.
7 Jaʼ yuʼun, jech kʼuchaʼal xi chal li chʼul espiritue: «Avi, mi chachikintaik li kʼusi chkale,
8 mu me xatsatsubtas avoʼontonik jech kʼuchaʼal toj echʼ xa noʼox la saʼik skʼakʼal oʼontonal li ta skʼakʼalil preva ta takixokol balumile,
9 jaʼ ti bu laj yakʼikun ta preva xchiʼuk kʼalal la skʼelbeikun koʼonton li amoltotakik ta voʼne manchuk mi laj yilik 40 jabil li kabteltake.
10 Jaʼ yuʼun x-ibet koʼonton likom yuʼun li jkʼol kuxlejal* taje xchiʼuk xi laj kale: ‹Skotol ora kʼejpʼujem li yoʼontonike xchiʼuk mu to xojtikinik li jbee›.
11 Jaʼ yuʼun xi laj kakʼ ke ta skʼakʼal koʼontone: ‹Muʼyuk ch-ochik li ta xkuxobil koʼontone›».
12 Kʼelo me abaik ermanoetik yuʼun xiʼel xlik chʼiuk ta avoʼontonik li kʼusi toj chopole xchiʼuk ti chanamajik ta stojolal kuxul Dios ta skoj ti chʼabal xchʼunel avoʼontonike;
13 pe jujun kʼakʼal jech-o me xapatbe aba avoʼontonik ta jujuntal yoʼ to «Avi» xi chichʼ alele, taje jaʼ sventa mu stsatsub avoʼontonik yuʼun li sjuʼel mulil ti chloʼlavane.
14 Yuʼun ta melel jmoj te jkʼoplaltik xchiʼuk Kristo mi tukʼ ta jpat-o koʼontontik kʼalal to ta slajeb jech kʼuchaʼal la jpastik ta slikebale.
15 Jech kʼuchaʼal xi albile: «Avi, mi chachikintaik li kʼusi chkale, mu me xatsatsubtas avoʼontonik jech kʼuchaʼal toj echʼ xa noʼox la saʼik skʼakʼal oʼontonale».
16 ¿Buchʼutik ti laj yaʼiike, pe ti la saʼik skʼakʼal oʼontonal ta tsʼakale? ¿Mi mu jaʼikuk skotolik li buchʼutik lokʼesatik yuʼun Moises ta Ejiptoe?
17 Jech xtok, ¿buchʼutik ta skoj ti x-ibet kom yoʼonton yuʼun Dios ti jalij 40 jabile? ¿Mi mu jaʼikuk li buchʼutik la saʼ smulik ti te telajtik kom sbekʼtalik ta takixokol balumile?
18 ¿Buchʼutik skʼoplalik kʼalal laj yakʼ ye ti muʼyuk ch-ochik li ta xkuxobil yoʼontone? ¿Mi mu jaʼikuk li buchʼutik muʼyuk la xchʼunik mantal ta melele?
19 Jaʼ yuʼun chkiltik ti muʼyuk bu x-ochik ta skoj ti chʼabal xchʼunel yoʼontonike.
Tsʼibetik ta yok vun
^ Kʼelo glosario.
^ Kʼelo glosario.
^ Jaʼ xkaltik, li stsobobbail Diose.
^ Jaʼ xkaltik, li Jesuse.
^ Kʼelo glosario.
^ O: «pʼij-o koʼntik»; «nichim-o koʼontontik».
^ Kʼelo glosario.
