Ebreos 4:1-16
4 Jech oxal chaʼa, ta skoj ti oy to jtos kʼusi albil ti jaʼ ti chij-ochutik li ta xkuxobil yoʼontone, skʼan me jchabi jbatik, yuʼun xiʼel me sba ti xvinaj ti oy buchʼu junuk avuʼunik ti muʼyuk ch-oche.
2 Yuʼun laj kichʼkutik albel ek li lekil aʼyejetik* jech kʼuchaʼal laj yichʼik albele; pe muʼyuk bu la stabeik sbalil li kʼop laj yaʼiike, yuʼun mu parejouk xchʼunel yoʼontonik xchiʼuk li yantik ti la xchʼunik mantale.
3 Pe ta xij-och ta xkuxobil oʼontonal li voʼotik ti kakʼoj xchʼunel koʼontontike, jech kʼuchaʼal xi onoʼox yaloje: «Jaʼ yuʼun xi laj kakʼ ke ta skʼakʼal koʼontone: ‹Muʼyuk ch-ochik li ta xkuxobil koʼontone›», akʼo mi tsutsem* xa onoʼox li yabtel kʼalal lik tal stsʼunbal li krixchanoetike.
4 Yuʼun oy bu xi yaloj ta sventa li svukubal kʼakʼale: «Vaʼun la xkux ta svukubal kʼakʼal ta skotol yabteltak li Diose»,
5 xi chal yan velta liʼ xtoke: «Muʼyuk ch-ochik li ta xkuxobil koʼontone».
6 Jech oxal, ta skoj ti oy to junantik muʼyuk bu ochemike xchiʼuk li buchʼutik baʼyel laj yichʼik albel li lekil aʼyejetik ti muʼyuk bu x-ochik ta skoj ti muʼyuk bu la xchʼunik mantale,
7 chakʼbe to yan skʼakʼalil kʼalal xi laj yal ta mas jelavel li ta salmo* yuʼun Davide: «Avi»; jech kʼuchaʼal xi onoʼox albile: «Avi, mi chachikintaik li kʼusi chkale, mu me xatsatsubtas avoʼontonik».
8 Yuʼun ti ikʼatikuk batel ta jun kuxobil oʼontonal yuʼun li Josuee muʼyuk xa bu laj yalbe skʼoplal sventa yan kʼakʼal jechuk li Diose.
9 Jech oxal oy to jun kuxob oʼontonal, jech kʼuchaʼal jun Savado* sventa li steklumal Diose.
10 Yuʼun li vinik ti ochem ta xkuxobil yoʼonton Diose xkuxoj yoʼonton ek li ta yabtel stuke, jaʼ jech kʼuchaʼal spasoj li Diose.
11 Jpastik me ti bu kʼalal xuʼ kuʼuntik sventa xij-och li ta kuxob oʼontonal taje, sventa muʼyukuk buchʼu jech spas batel kuʼuntik ek jech kʼuchaʼal ti muʼyuk la xchʼunik mantale.
12 Yuʼun kuxul li skʼop Diose, oy sjuʼel, jaʼ mas tsʼubtsʼub sniʼ, jaʼ mu sta skotol li espada ti chaʼjot yee, tsliʼ ochel jaʼ to mi chʼak yuʼun li jpat jxokontike xchiʼuk li yut koʼontontike, tsliʼ ochel jaʼ to mi chʼak yuʼun li jbakiltik* xchiʼuk xchinabile, jech xtok xuʼ yuʼun chchaj ta kʼelel li jnopbentik xchiʼuk li kʼusi oy ta koʼontontike.
13 Jech xtok muʼyuk bu nakʼal ta sat jtosuk li kʼusitik pasbile, moʼoj, lek chajal ta sat xchiʼuk xil skotol li buchʼu ta persa ta jchapbetik li kʼusi ta jpastike.
14 Jech oxal chaʼa, ta skoj ti oy jun mero lekil bankilal pale* kuʼuntik ti batem xa ta vinajele, ti jaʼ li Jesus Xnichʼon Diose, jechuk-o me xkaltik batel li xchʼunel koʼontontik ta stojolale.
15 Mu yuʼunuk chʼabal jun mero bankilal pale kuʼuntik ti mu xijkʼuxubaj ta yoʼonton ta skoj ti kʼunutike, moʼoj, oy jun mero bankilal pale kuʼuntik ti pasbil lek ta preva ta skotol jech kʼuchaʼal voʼotike, jaʼ noʼox ti muʼyuk smule.
16 Jaʼ yuʼun jamal kʼopojkutik ta melel kʼalal chijnopaj ta stojolal li chotlebal sventa ajvalilal ta sventa li slekil yutsil oʼontonale, sventa jtatik kʼuxubinel xchiʼuk slekil yutsil oʼontonal sventa tskoltautik kʼalal jaʼo yoraile.
Tsʼibetik ta yok vun
^ Kʼelo glosario.
^ O: «lajem».
^ Kʼelo glosario.
^ O: «skʼakʼalil kuxob oʼontonal». Kʼelo glosario.
^ S.gr.: «jtsʼakalultik».
^ Kʼelo glosario.
