Ebreos 6:1-20
6 Jaʼ yuʼun chaʼa, ta skoj ti laj xa jchantik batel li kʼusitik kʼun ta chanel ta sventa li Kristoe, yijubkutik batel ta mantal xchiʼuk mu xa xkakʼbetik yan velta snakleb, jaʼ xkaltik, li sutesel oʼontonal* ti chamem yabtelale xchiʼuk li xchʼunel oʼontonal ta stojolal Diose,
2 li chanubtaseletik ta sventa ichʼvoʼe, ti chakʼ skʼobike,* li chaʼkuxesele* xchiʼuk li chapanel sbatel osile.
3 Jech chijyijub batel ta mantal mi jech tskʼan yoʼonton Diose.
4 Yuʼun li buchʼutik laj xa yilik li sakil osile xchiʼuk ti laj xa spasik preva li matanal ti muʼyuk tojbil ti te likem talel ta vinajele xchiʼuk ti staojik xa ek li chʼul espiritue,
5 xchiʼuk ti laj xa spasik preva li skʼop Dios ti lek tajeke xchiʼuk li sjuʼel skotol li kʼusitik oy ta balumil* ti jaʼ to chtale,
6 pe ti namajemik xtoke, mu xa xuʼ sutes yoʼontonik yan velta yuʼun tsbajik ta jtel teʼ* yan velta stukik li Xnichʼon Diose, vaʼun chakʼik ta kʼexlal ta sat krixchanoetik.
7 Yuʼun chuchʼ voʼ li osil kʼalal nopajtik noʼox chakʼ voʼ ta stojolale, vaʼun chchʼi talel kʼusi slajes li buchʼu oy kʼusi la stsʼune. Vaʼun tsta bendision ta stojolal Dios li osile.
8 Pe mi jaʼ chchʼi talel yuʼun chʼix xchiʼuk tomalchʼixe* chichʼ pʼajel xchiʼuk poʼot xa chichʼ chopol kʼoptael, mi laje chichʼ chikʼel.
9 Pe li voʼoxuke kuni kʼanbil chiʼiltak, jchʼunojkutik lek li kʼusitik mas lekike, li kʼusitik te tsakal skʼoplal ta sventa li kolebale, manchuk mi jech yakal chikʼopojkutik.
10 Yuʼun tukʼ li Diose, jaʼ yuʼun muʼyuk chchʼay ta sjol li avabtelike xchiʼuk li kʼanelal laj avakʼik ta ilel ta sventa li sbie xchiʼuk ti chatunik ta stojolal li buchʼutik chʼulike xchiʼuk ti jech-o chatunik batel ta stojolalike.
11 Pe ta jkʼankutik ti jech baxbolukoxuk ta jujuntal xtok sventa jechuk-o lek xapat avoʼontonik kʼalal to ta slajeb ta sventa li kʼusi amalaojike,
12 sventa mu xachʼajubik, moʼoj, jaʼ chanbeik li buchʼutik jaʼ tsparteinik li kʼusi albil xa onoʼox ta skoj ti oy xchʼunel yoʼontonik xchiʼuk ti oy smalael yuʼunike.
13 Yuʼun kʼalal oy kʼusi laj yalbe Abraan li Diose, ta stojolal stuk laj yakʼ ye, yuʼun muʼyuk buchʼu mas mukʼ skʼoplal ti xuʼ xakʼ ye ta stojolale,
14 xi laj yalbee: «Ta melel ta xkakʼbot bendision xchiʼuk ta melel chkepajes li anitilulaltake».*
15 Jaʼ yuʼun kʼalal laj xaʼox yakʼ ta ilel ti stsʼik yuʼun li Abraane, la sta li kʼusi albile.
16 Yuʼun li krixchanoetike chakʼ yeik* ta stojolal li buchʼu mas mukʼ skʼoplale, ti jech chakʼ yeike jaʼ te chchapaj yuʼunik li kʼusi mu koʼoluk tsnopike, yuʼun jaʼ xa mantal yuʼunik ti jech chakʼ yeike.
17 Jaʼ jech ek, kʼalal la snop Dios ti jamal chakʼ ta ilel li kʼusi tskʼan tspas ti mu snaʼ xjele, ti laj yakʼ ta ilel ta stojolal li buchʼutik tsparteinik li kʼusi albil xa onoʼoxe, te jamal laj yal kʼalal laj yakʼ yee,
18 sventa oyuk stsatsal koʼontontik yoʼ tukʼ-o jtsaktik li spatobil koʼontontik ti te oy ta kelovaltik li voʼotik ti ochemutik xa ti bu xuʼ jpoj jbatike, taje jaʼ ta sventa li kʼusi chaʼtos ti mu snaʼ xjel* ta skoj ti mu snaʼ sjut kʼop* li Diose.
19 Xkoʼolaj kʼuchaʼal s-anklail jkuxlejaltik li spatobil koʼontontike, yuʼun lek tukʼ xchiʼuk staoj lek yav, jech xtok li spatobil koʼontontik taje ch-ikʼvan batel kʼalal to ta yut kortina*
20 ti jaʼ te ochem batel jun jbabe ti jaʼ sventa jlekilaltike, ti jaʼ li Jesuse, ti kʼotem kʼuchaʼal mero bankilal pale* sbatel osil jech kʼuchaʼal li Melkisedeke.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «chʼix nichim»; «sakil chʼix».
^ O: «amomnichʼnabtake»; «atsʼunbaltake»; «atsʼakalultake».
^ Kʼelo glosario.
^ Jaʼ xkaltik, li kʼusi albil yuʼun Diose xchiʼuk ti yakʼoj yee.
^ O: «snop kʼop»; «x-epal kʼopoj».
^ Kʼelo glosario.
^ Kʼelo glosario.
