Ebreos 7:1-28
7 Yuʼun li Melkisedek ti jaʼ ajvalil ta Salem xchiʼuk ti jaʼ pale yuʼun Mukʼul Diose, ti bat snup talel ta be Abraan kʼalal ay smil li ajvaliletike xchiʼuk ti laj yakʼbe bendisione,
2 xchiʼuk ti akʼbat yuʼun Abraan li diesmo* sventa skotol li kʼusitike. Baʼyel, xi chichʼ jelubtasbel li sbie: «Ajvalil yuʼun Tukʼilal», jech xtok jaʼ ajvalil ta Salem, jaʼ xkaltik: «Ajvalil yuʼun Jun oʼontonal».
3 Mu nabiluk buchʼu stot smeʼ, buchʼu yutsʼ yalal, kʼusi ora vokʼ,* kʼusi ora cham, pe pale-o ta j-echʼel ta skoj ti xkoʼolaj kʼuchaʼal Xnichʼon Diose.
4 Kʼelo avilik ti toj tsots skʼoplal li Melkisedeke, yuʼun li Abraan ti jaʼ jolil* ta utsʼ alalile laj yakʼbe jun diesmo Melkisedek li kʼusi la sta talel ta paskʼope, ti jaʼ laj yakʼbe li bu mas lekike.
5 Melel onoʼox ti jech chal Mantal* ti xuʼ skʼanbeik akʼo stoj diesmo jteklum li xnichʼnabtak Levi* ti vaʼanbilik ta paleale, jaʼ xkaltik, li yermanotakike, manchuk mi jaʼik snitilulaltak* Abraan.
6 Pe li vinik ti mu teuk likem talel ta snitilulal Levie la stsak li diesmo akʼbat yuʼun Abraane xchiʼuk laj yakʼbe bendision li buchʼu oy onoʼox kʼusi albile.
7 Pe jnaʼojtik ti jaʼ mas mukʼ skʼoplal li buchʼu chakʼ bendisione, jaʼ mu sta li buchʼu chichʼe.
8 Li jlevietik laj yichʼik diesmoe jaʼik krixchanoetik ti chchamike, pe li yan vinik laj yichʼ diesmoe chichʼ albel skʼoplal ta Tsʼibetik* ti kuxule.
9 Xuʼ xichʼ alel xtok ti tstoj diesmo ta stojolal Abraan li Levi ti chichʼ diesmo eke,
10 yuʼun muʼyuk toʼox bu vokʼem ta snitilulal Abraan ti jaʼ li smoltot ti ay nupatuk ta be yuʼun Melkisedeke.
11 Jaʼ yuʼun, mi laj yichʼ tael tukʼilal ta skoj li paleal sventa Levie (yuʼun jaʼ jtos svinajeb li Mantal ti laj yichʼ akʼbel li jteklume), ¿mi persa to van chichʼ vaʼanel yan pale jech kʼuchaʼal laj yichʼ alel ti xkoʼolaj kʼuchaʼal Melkisedeke, ti mu xkoʼolaj kʼuchaʼal Aarone?
12 Ta skoj ti yakal xa chjel li paleale, persa skʼan xjel li Mantal eke.
13 Yuʼun ta yan-o nitilulal tal li vinik ti jech chichʼ albel skʼoplale, jech oxal muʼyuk buchʼu yakal tspas yuʼunik li kʼusi skʼan pasel ta skajleb matanale.*
14 Yuʼun jamal xvinaj ti ta Juda likem talel li Kajvaltike, pe muʼyuk kʼusi laj yal jsetʼuk Moises ta sventa li paleal ti te chlik talel li ta nitilulal taje.
15 Pe mas to jamal xvinaj kʼalal chlik talel yan pale ti xkoʼolaj kʼuchaʼal Melkisedeke,
16 ti jech kʼotem ta melele maʼuk jech kʼuchaʼal chal mantal ti ta nitilulal noʼox likem tale, moʼoj, ta juʼelal likem talel ti ch-akʼbat xkuxlejal ti mu stakʼ lajesele.
17 Yuʼun xi chichʼ alel ta stojolale: «Paleot sbatel osil jech kʼuchaʼal li Melkisedeke».
18 Jech oxal parte laj yichʼ akʼel batel li mol mantale, yuʼun kʼun xchiʼuk chʼabal sbalil.
19 Yuʼun muʼyuk bu la spas jsetʼuk kʼusi tukʼ li Mantale, yan li spatobil oʼontonal ch-och tal ti mas leke jaʼ chakʼ li tukʼilale xchiʼuk jaʼ ta sventa ti yakal chijnopaj ta stojolal Diose.
20 Jech xtok, ta sventa ti jamal laj yakʼ ye Dios ta sventa taje
21 (yuʼun ta melel, oy viniketik ti ochemik ta paleal akʼo mi muʼyuk bu jamal laj yakʼ ye li Diose, yan li stuke jaʼ jech kʼot ta pasel ta stojolal ta sventa ti jamal laj yakʼ ye li Buchʼu xi laj yale: «Yakʼoj ye li Jeovae, muʼyuk bu tsjel snopben: ‹Paleot sbatel osil›»),
22 kʼot ta tojolil li Jesus ta sventa li jun trato* ti jaʼ mas leke.
23 Jech xtok ep buchʼutik ochik ta paleal kʼuchaʼal kʼexoliletik, yuʼun mu xa xuʼ spas batel yabtelik ta paleal ta skoj ti chamike,
24 pe li stuke chʼabal buchʼu chkʼextaat ta paleal ta skoj ti kuxul-o sbatel osile.
25 Jech oxal xuʼ lek tsʼakal tskolta xtok li buchʼutik yakal chnopajik ta stojolal Dios ta sventae, yuʼun kuxul-o sbatel osil sventa chkʼopoj ta stojolalik.
26 Yuʼun toj lek ti oy jun mero bankilal pale* kuʼuntik kʼuchaʼal taje: ti tukʼe, ti muʼyuk la spas li kʼusi chopole, ti muʼyuk yikʼobale, ti jelel kʼuchaʼal li jpasmuliletike xchiʼuk ti toybil skʼoplal ta vinajele.
27 Jelel kʼuchaʼal li mero bankilal paleetik taje, yuʼun mu persauk xakʼ milbil matanal jujun kʼakʼal li stuke, ti chakʼ ta sventa smul stuke xchiʼuk ta sventa li jteklum xtoke, yuʼun jun noʼox velta ta j-echʼel laj yakʼ kʼalal laj yakʼ sba stuke.
28 Yuʼun li Mantale jaʼ tsvaʼan ta mero bankilal pale li viniketik ti kʼunike, pe li kʼusi albil ta jamal ti chkʼot ta pasele jaʼ la svaʼan li jun nichʼonil ti tukʼ-o sbatel osile, li kʼusi albil taje jaʼ to vul kʼalal lokʼem xaʼox li Mantale.
Tsʼibetik ta yok vun
^ Kʼelo glosario.
^ O: «ayan».
^ O: «moltotil».
^ Kʼelo glosario.
^ Kʼelo glosario.
^ O: «smomnichʼnabtak»; «stsʼunbaltak»; «stsʼakalultak».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
