Ebreos 8:1-13
8 Tana un, li kʼusi mas tsots skʼoplal ta sventa li kʼusi yakal chkalbetik skʼoplale jaʼ liʼe: Jaʼ mero bankilal pale* kuʼuntik taje xchiʼuk choti xa ta xokon chotlebal sventa ajvalilal yuʼun Dios ta batsʼikʼob te ta vinajel,
2 jaʼ jtunel ta sventa ti bu chʼule xchiʼuk ta sventa li melel karpana ti jaʼ la svaʼan Jeovae, ti maʼuk la svaʼan li krixchanoetike.
3 Yuʼun vaʼanbil sventa chakʼ matanaletik xchiʼuk milbil matanaletik skotol li buchʼu chichʼ vaʼanel ta mero bankilal palee; jaʼ yuʼun tsots skʼoplal ti oyuk kʼusi xakʼ eke.
4 Maʼuk pale jechuk ti liʼuk oy ta sba balumile, yuʼun oy xa viniketik chakʼik matanaletik jech kʼuchaʼal chal li Mantale.
5 Li viniketik taje tspasik chʼul abtelal ti jaʼ noʼox senyail xchiʼuk snakʼobal li kʼusitik oy ta vinajele; jech kʼuchaʼal xi albat mantal yuʼun Dios li Moises kʼalal poʼot xaʼox skʼan spas li karpanae: yuʼun xi chale: «Kʼelo me lek ti jechuk xapas skotol jech kʼuchaʼal laj avichʼ akʼbel senyail li ta vitse».
6 Pe mas xa kʼupil sba staoj yabtel Jesus li avie, yuʼun jaʼ jkʼopojel* xtok ta sventa jun trato ti mas leke, laj yichʼ chotanbel lek skʼoplal ta sventa li kʼusi albil xa onoʼox ti mas leke.
7 Muʼyuk bu chtun jsetʼuk yan trato jechuk ti muʼyukuk spaltail li baʼyel tratoe.
8 Yuʼun tstabe spaltail jteklum kʼalal xi chale: «‹¡Kʼelo avil! Chkʼot skʼakʼalil ti jaʼo kʼalal ta jpas jun achʼ trato xchiʼuk li snitilulal* Israel* xchiʼuk li snitilulal Judae* —xi li Jeovae—.
9 Pe mu xkoʼolaj jech kʼuchaʼal li trato la jpas xchiʼuk li smoltotakik kʼalal la jnitbe lokʼel tal skʼobik ti la jlokʼesik tal ta yosilal Ejiptoe, yuʼun muʼyuk bu tukʼ laj yakʼ-o sbaik li ta jtratoe, jaʼ yuʼun muʼyukik xa ta koʼonton›, xi li Jeovae.
10 »‹Yuʼun liʼe jaʼ li trato ta jpas xchiʼuk li snitilulal Israel mi echʼ li vaʼ kʼakʼale —xi li Jeovae—. Ta xkakʼbe ta snopbenik li jmantale xchiʼuk ta jtsʼibabe ta yoʼontonik. Vaʼun chikʼot ta Sdiosik xchiʼuk chkʼotik ta jteklumal ek li stukike.
11 »›Jech xtok muʼyuk xa bu chchanubtas mi junuk xchiʼilik xchiʼuk mi junuk yermanoik, mu xa bu xi chalike: «¡Ojtikino li Jeovae!». Yuʼun ta bikʼit ta mukʼ chojtikinikun.
12 Ta jkʼuxubinik akʼo mi muʼyuk tukʼ li kʼusitik spasojike xchiʼuk muʼyuk xa bu ta jvules ta jol jsetʼuk li smulike›».
13 Kʼalal laj yal «jun achʼ tratoe», muʼyuk xa stu kʼot yuʼun li baʼyel tratoe. Jaʼ yuʼun poʼot xa xlaj skʼoplal li kʼusi muʼyuk xa stue xchiʼuk ti mol xae.
Tsʼibetik ta yok vun
^ Kʼelo glosario.
^ Kʼelo glosario.
^ O: «smomnichʼon»; «stsʼunbal»; «stsʼakalul».
^ Kʼelo glosario.
^ Kʼelo glosario.
