Ebreos 9:1-28
9 Yan li baʼyel tratoe yichʼoj mantaletik ta sventa li chʼul abtelale xchiʼuk oy xchʼul avil liʼ ta sba balumile.
2 Yuʼun li sbakʼolal karpana laj yichʼ vaʼanele jaʼ te ti bu oy li xchotleb kantile, li mexae xchiʼuk li pan ti akʼbil ta stojolal Diose;* taje Chʼul Kuarto* chalbeik.
3 Pe li ta xchaʼkʼolal spat kortina li ta karpanae, Batsʼi Lekil Chʼul Kuarto* chalbeik.
4 Te taje oy jun xchikʼobil pom* ti pasbil ta oroe xchiʼuk li xkaxail mantal* ti pixil lek ta oroe, ti te tikʼil li jarra pasbil ta oro ti yichʼoj manae,* li ta kaxae te oy xtok li snamteʼ Aaron ti laj yakʼ xnichimale xchiʼuk li chaʼpech ton sventa tratoe;
5 te oy chaʼvoʼ keruvin* ti jun yutsilik li ta sba kaxa ti te smakoj ta snakʼobalik li smak kaxae.* Pe li avie maʼuk yorail ti bikʼitik xa chkalbeik skʼoplal li kʼusitik taje.
6 Kʼalal jech laj yichʼ vaʼanel li kʼusitik taje skotol ora ch-ochik batel ta sbakʼolal karpana li paleetik sventa tspasik li chʼul abtelale;
7 yan li mero bankilal palee* stuk ch-och batel ta jujun jabil li ta xchakʼolale, chichʼ ochel chʼichʼ ti chakʼ ta sventa stuke xchiʼuk ta sventa li smul jteklum ti la spasik ta skoj ti mu snaʼike.
8 Vaʼun jamal laj yal chʼul espiritu ti muʼyuk to akʼbil ta ilel li sbelel Batsʼi Lekil Chʼul Kuarto kʼalal te toʼox li baʼyel karpanae.
9 Li karpana taje jaʼ noʼox svinajeb ta sventa li jkʼakʼaliltike, jech oxal chichʼ akʼel matanal xchiʼuk milbil matanal ti kʼu yelan chapanbile. Akʼo mi jech, li kʼusi taje mu slekubtasbe lek sjol yoʼonton li vinik ti chichʼ ta mukʼ Diose.
10 Jaʼ noʼox tskʼelbe skʼoplal veʼlil, uchʼbolajel xchiʼuk jeltos kʼu yelan tspok sbaik kʼuchaʼal chal li Mantale. Jech xtok, jaʼ li kʼusi skʼan pasel chal Smantal Moises* ta sventa bekʼtalil xchiʼuk ti laj yichʼ akʼbel yorail ti albil onoʼox sventa tstukʼibtas li kʼusitike.
11 Pe kʼalal tal Kristo kʼuchaʼal mero bankilal pale ta sventa li kʼusitik lekik kʼotemik ta pasele, jelav batel ta karpana ti mas mukʼ xchiʼuk ti mas tukʼ ti mu ta skʼobuk noʼox krixchano laj yichʼ pasele, jaʼ xkaltik, ti maʼuk ta skʼob li kʼusitik pasbil ta balumile.
12 Och batel —ti bu chʼule, pe maʼuk ta xchʼichʼel tot tentsun xchiʼuk chʼiom tot vakax, moʼoj, jaʼ ta xchʼichʼel stuk— jun noʼox velta ta j-echʼel xchiʼuk la sta jkolebaltik sbatel osil.
13 Mi yuʼun ta xchʼichʼel tot tentsun, ta xchʼichʼel tot vakax xchiʼuk ta stanil chʼiom meʼ vakax ti te vijbil ta stojolal li buchʼu oy yikʼobal ti xuʼ xchʼultajes sventa sakuk* li sbekʼtale,
14 jaʼ mas to tsots skʼoplal li xchʼichʼel Kristoe. Ta skoj li yabtel chʼul espiritu sbatel osile laj yakʼ sba stuk Kristo ta stojolal Dios kʼuchaʼal matanal ti chʼabal spaltaile. Ta sakubtas jol koʼontontik li xchʼichʼele, ta skoj taje muʼyuk xa ta jpastik li kʼusi muʼyuk stue. Vaʼun xuʼ xa jpastik chʼul abtelal ta stojolal li kuxul Diose.
15 Jech oxal, ti kʼotem ta jkʼopojel ta sventa achʼ tratoe jaʼ sventa akʼo sta sparteik sbatel osil ti albil xa onoʼox li buchʼutik takbilik ta ikʼele. Taje jaʼ jech kʼot ta pasel ta skoj ti chame, jaʼ ta sventa ti la sta skolebalik ta pojelal* ta skoj smulik ta sventa li baʼyel tratoe.
16 Yuʼun li buchʼu tspas tratoe persa skʼan xcham sventa oyuk sbalil li tratoe,
17 yuʼun jaʼ noʼox oy sbalil li trato kʼalal chamem xa li krixchanoe, yuʼun chʼabal sbalil mi kuxul to li krixchano ti la spas tratoe.
18 Jech oxal, maʼuk ti muʼyuk bu laj yichʼ tunesel chʼichʼ kʼalal och ta abtel li baʼyel tratoe.
19 Yuʼun kʼalal laj xaʼox yalbe sjunul jteklum Moises skotol li kʼusitik chal Mantale, la stsakbe li xchʼichʼel chʼiom tot vakax xchiʼuk li xchʼichʼel tot tentsune, vaʼun la skap ta voʼ. La stunes tsots ti lek kuxul stsajale xchiʼuk isopo,* vaʼun la svijbe li livroe* xchiʼuk la svijbe sjunul li jteklume,
20 laje xi laj yale: «Liʼe jaʼ li chʼichʼ sventa trato ti laj yalboxuk mantal Dios ti akʼo xachʼunike».
21 Jaʼ jech la svijbe chʼichʼ li karpana eke xchiʼuk skotol li kʼusitik chichʼ tunesel sventa chʼul abtelale.
22 Jech, jutuk mu skotoluk jaʼ to xuʼ sak xkom li kʼusitik mi chichʼ akʼbel chʼichʼ jech kʼuchaʼal chal Mantale, jech xtok muʼyuk me perton mi muʼyuk bu laj yichʼ malel chʼichʼe.
23 Jaʼ yuʼun tsots skʼoplal ti laj yichʼ sakubtasel li kʼusi senyail noʼox ta sventa li kʼusitik oy ta vinajel ta sventa li kʼusitik taje, pe mas to lek milbil matanaletik skʼan ta sventa li kʼusitik ta vinajele.
24 Yuʼun li Kristoe muʼyuk bu och ta Batsʼi Lekil Chʼul Kuarto ti pasbil ta skʼob krixchanoetike, ti jaʼ svinajeb li kʼusi melele, moʼoj, yuʼun och batel ta vinajel sventa tsvaʼan sba ta stojolal Dios yoʼ skʼan vokol ta jtojolaltik.
25 Taje maʼuk sventa chakʼ sba jayibuk velta jech kʼuchaʼal tspas li mero bankilal pale ti maʼuk xchʼichʼel chichʼ ochel jujun jabil ti bu chʼule.
26 Ti jechuke ep ta velta skʼan xil svokol ti kʼuxi lik tal stsʼunbal li krixchanoetike. Pe li avie jun noʼox velta ta j-echʼel laj yakʼ sba ta ilel li ta slajebtik skotol li kʼusitik oy ta balumile, sventa slajesbe skʼoplal li mulil ta sventa ti laj yakʼ sba stuk ta milbil matanale.
27 Jech kʼuchaʼal li krixchano ti jun noʼox velta ta j-echʼel chchame, ti chichʼ chapanel mi kʼot xaʼox ta pasel taje,
28 jaʼ jech ek li Kristoe jun noʼox velta ta j-echʼel laj yakʼ sba sventa chkuchbe batel smul li epal krixchanoetike; vaʼun li ta xchibal velta chakʼ sba ta ilele maʼuk xa chtal slokʼes li mulile, moʼoj, jaʼ xa chtal skolta li buchʼutik ta sjunul tajek yoʼonton smalaojike.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «balbalvun».
