Echos 1:1-26
1 Teofilo, liʼe jaʼ li baʼyel loʼile, li kʼusitik la jtsʼibae jaʼ skʼoplal li kʼusitik lik spas xchiʼuk li kʼusitik lik yakʼ ta chanel Jesuse,
2 jaʼ to ti kʼalal laj yichʼ ikʼel muyele, jaʼo kʼalal laj xaʼox yalbe mantal ta stojolal chʼul espiritu* li jtakboletik* ti stʼujoj xa onoʼoxe.
3 Kʼalal laj xaʼox yil svokole, laj yakʼ sba ta ilel ta stojolalik, ep sprevailtak laj yakʼ ta ilel ti kuxule. Laj yilik 40 kʼakʼal xchiʼuk laj yalilanbe skʼoplal li Ajvalilal yuʼun Diose.*
4 Xi laj yalbe mantal li jtakboletik kʼalal jaʼo te tsobol xchiʼuke: «Mu me xalokʼik batel li ta Jerusalene, jaʼ lek malaik chavichʼik li kʼusi yaloj onoʼox Totile, jaʼ li kʼusi laj avaʼiik laj kale;
5 yuʼun li Juane chaʼa, laj yakʼ ichʼvoʼ, yan li voʼoxuke poʼot xa chavichʼik voʼ ta chʼul espiritu».
6 Xi la sjakʼbeik kʼalal jaʼo tsobolike: «Kajval, ¿mi yuʼun yakal xa chchaʼta yav avuʼun li ajvalilal ta Israel* avie?».
7 Xi albatike: «Jaʼ noʼox li Totil te oy ta vinajel ti xuʼ xal kʼusi ora chkʼot ta pasel li kʼusitike, li voʼoxuke mu persauk xanabeik li yorail taje.
8 Pe chavichʼ atsatsalik kʼalal mi vul ta atojolalik li chʼul espiritue, vaʼun chavalik batel jkʼoplal ta Jerusalen, ta sjunul Judea, ta Samaria* xchiʼuk kʼalal to ta namal balumil».
9 Kʼalal laj xaʼox yal li kʼusitik taje, kʼalal jaʼo te skʼelojike, laj yichʼ ikʼel muyel xchiʼuk mak batel ta tok, jech te chʼay-o batel ta satik.
10 Skʼelojik-o vinajel kʼalal toy muyel li Jesuse, vaʼun ta anil noʼox te vaʼal kʼot chaʼvoʼ viniketik ta xokonik ti sak skʼuʼ spokʼ slapojike
11 xchiʼuk xi laj yalike: «Viniketik ta Galilea, ¿kʼu yuʼun liʼ vaʼaloxuk akʼelojik muyel vinajele? Li Jesuse laj yichʼ ikʼel lokʼel ta atojolalik ti muy batel ta vinajele, jaʼ jech tsut tal kʼuchaʼal laj avilik muy batel ta vinajele».
12 Vaʼun lokʼik batel li ta Vits Olivatik chalbeike, batik ta Jerusalen, ti te van junuk kilometro* snamal ti te chlik tal ta Jerusalene.
13 Kʼalal kʼotike, muyik batel li ta kuarto ta akʼol ti bu chvayike. Taje jaʼik li Pedro, Juan, Santiago, Andres, Felipe, Tomas, Bartolome, Mateo, Santiago ti jaʼ li xnichʼon Alfeoe, Simon ti sjunul oʼontonal chalbeike* xchiʼuk li Judas xnichʼon Santiagoe.
14 Skotolik taje koʼol yoʼontonik mu xikta sbaik ta spasel orasion, te oy junantik antsetik, te oy li Maria smeʼ Jesuse xchiʼuk li yitsʼinabtake.
15 Vaʼun li vaʼ kʼakʼale oy jun velta ti vaʼi ta stojolal ermanoetik li Pedroe (li epal krixchanoetik taje te van 120 ta voʼ skotolik) xchiʼuk xi laj yale:
16 «Viniketik, kermanotak, persa onoʼox skʼan xkʼot ta pasel li tsʼib* ti laj yal ta albil kʼop ta stojolal David li chʼul espiritu ta sventa li Judase, ti jaʼ kʼot ta jbeiltasvanej yuʼun li buchʼutik bat xchukik Jesuse.
17 Yuʼun jaʼ toʼox jchiʼilkutik xchiʼuk jmoj litunkutik.
18 (Li vinik taje man-o jsep yosil ti kʼu yepal la spas kanal ta skoj li kʼusi muʼyuk tukʼ la spase, vaʼun pajal kʼot sjol kʼalal pʼaje, tʼom li xchʼute, vaʼun buskʼij lokʼel skotol li sbel xchʼute.
19 Taje la snaʼ skotol jnaklejetik ta Jerusalen, jech oxal Akeldama la sbiiltas ta skʼopik li osil taje, jaʼ xkaltik, «Yosilal Chʼichʼ».)
20 Yuʼun xi tsʼibabil ta slivroal Salmose:* ‹Xokol me komuk ti bu nakale, mu me buchʼu te xnaki›. Jech xtok: ‹Yanuk xa-o buchʼu sbain li kʼusi toʼox sbainoje›.*
21 Jaʼ yuʼun chaʼa, persa skʼan xichʼ tʼujel junuk li buchʼu liʼ onoʼox la xchiʼinunkutik skotol kʼakʼal kʼalal la spas yabtel ta jtojolalkutik li Kajvaltik Jesuse,
22 ti te oy kʼalal akʼbat yichʼ voʼ yuʼun Juan jaʼ to ti kʼalal laj yichʼ ikʼel lokʼel ta jtojolalkutik ti muy batele, li vinik taje persa skʼan ti yilojuk jech kʼuchaʼal laj kilkutik ti chaʼkuxi* li Jesuse».
23 Jaʼ yuʼun la svaʼanik chaʼvoʼ: jaʼ li Jose ti Barsabas chalbeike, ti Justo yan sbie, xchiʼuk li Matiase.
24 Vaʼun la spasik orasion xchiʼuk xi laj yalike: «Jeova,* voʼot ti xavojtikinbe yoʼonton skotol li krixchanoetike, akʼbun kilkutik buchʼu junukal atʼujoj li ta xchaʼvoʼalike,
25 sventa jaʼ akʼo stsak li abtelal liʼe xchiʼuk ti jaʼ akʼo ochuk li ta abtel sventa jtakbole, ti laj yikta komel Judas sventa stam batel yan sbee».
26 Jaʼ yuʼun laj yakʼik suerte,* vaʼun jaʼ kʼot ta stojolal Matias li suertee; jech oxal kʼot ta xchiʼilik li buluchvoʼ jtakboletike.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Gr.: sabbatou. . . odon, «savado». Ti jaʼ noʼox jech snamal xuʼ xanavik ta Savado li judaetike.
^ O: «baxbol».
^ Kʼelo glosario.
^ Kʼelo glosario.
^ Jaʼ xkaltik, ti akʼo sbain yan krixchano li yabtel yichʼoj ta xchabiel tsobobbaile.
^ Kʼelo glosario.
^ Kʼelo glosario.
^ Kʼelo glosario.
