Echos 10:1-48
10 Vaʼun li ta Sesareae oy jun vinik ti Kornelio sbie, jaʼ jun bankilal soltaro* li ta jtsop j-italia soltaroetik chalbeike.
2 Jaʼ jun vinik ti lek chichʼ ta mukʼ xchiʼuk ti xiʼtaoj Dios xchiʼuk skotol li yutsʼ yalale, jech xtok chakʼbe epal matanal ta xkʼuxul oʼontonal* li jteklume xchiʼuk skotol ora tskʼanbe vokol Dios.
3 Te van ta sbalunebal ora* ta kʼakʼaltike oy kʼusi lek jamal akʼbat yil,* laj yil ti yakal ch-och batel jun yaj-anjel Dios ti bu oye xchiʼuk xi chale: «¡Kornelio!».
4 Kʼalal te skʼeloj batele xiʼem tajek li Kornelioe, xi la sjakʼbee: «¿Kʼusi Kajval?». Xi albate: «Skotol li orasion chapase xchiʼuk li matanaletik ta xkʼuxul oʼontonal chavakʼe kʼot xa ta svulesobil sjol Dios.
5 Jaʼ yuʼun tako batel viniketik ta Jope xchiʼuk tako ta ikʼel jun vinik ti Simon sbie, ti Pedro yan sbie.
6 Li vinik taje te chvay kʼuchaʼal yajvulaʼal ta sna Simon, jaʼ li jkʼaʼesej nukule, ti te oy sna ta stsʼel nabe».
7 Kʼalal naka toʼox laj kʼoponatuk yuʼun li anjele, bat, vaʼun li Kornelioe la stak ta ikʼel chaʼvoʼ yaj-abteltak xchiʼuk jun soltaro ti lek chichʼ ta mukʼ Diose, jaʼ jun ti te onoʼox chtun ta stojolale,
8 laj yalbe yaʼiik skotol li kʼusitik taje, jech oxal la stakanan batel ta Jope.
9 Li ta yokʼomale, kʼalal yakal chbatik ta be xchiʼuk kʼalal nopol xaʼox skʼan xkʼotik ta jteklume, muy ta jol na sventa tspas orasion li Pedroe, te van ta svakibal ora.*
10 Pe lik viʼnajuk tajek, tskʼan xa chveʼ yaʼi. Kʼalal yakal tsmeltsanik veʼlile oy kʼusi laj yil li stuke,
11 laj yil ti jamal li vinajele xchiʼuk laj yil ti oy kʼusi chyal tal ti xkoʼolaj kʼuchaʼal jlik mukʼta manta ta linoe, xlichʼet yalel tal xchanjotal xchikin ta sba balumil;
12 li ta mantae oy skotol jaychop chonbolometik ti oy chanib yoke xchiʼuk chonetik ti xjochetik ta lume xchiʼuk mutetik ta vinajel.
13 Vaʼun xi albat yuʼun jun yechʼomal eile: «¡Pedro, likan, milo atiʼ!».
14 Pe xi laj yal li Pedroe: «Mi jsetʼuk maʼ taje Kajval, yuʼun muʼyuk onoʼox bu jtiʼo li kʼusi muʼyuk leke xchiʼuk li kʼusi ibal sbae».
15 Vaʼun kʼoponat ta xchibal velta yuʼun li yechʼomal eile: «Mu xaval ti muʼyuk lek li kʼusitik slekubtasoj xa Diose».
16 Jech to albat ta yoxibal velta, vaʼun ta anil noʼox laj yichʼ chupel muyel ta vinajel li mantae.
17 Kʼalal jaʼo chʼayal tajek yoʼonton Pedro ta sventa ti kʼusi van smelolal li kʼusi laj yile, li viniketik ti takbilik batel yuʼun Kornelioe ta ora noʼox la sjakʼik bu sna li Simone, te vaʼajtik ta tiʼ na.
18 Tsots chkʼopojik ochel, tsjakʼik mi te chvay li Simone, ti Pedro yan sbie.
19 Kʼalal yakal toʼox tsnopilanbe skʼoplal li kʼusi laj yil Pedroe, xi laj yal li chʼul espiritue: «¡Kʼelo avil! Yakal ta saʼot oxvoʼ viniketik.
20 Jaʼ yuʼun vaʼlan, yalan batel, bat chiʼino, mu me xchibetuk avoʼonton, yuʼun voʼon la jtakan tal».
21 Vaʼun li Pedroe yal ti bu oy li viniketike xchiʼuk xi laj yale: «Liʼ oyune, voʼon li buchʼu yakal chasaʼike. ¿Kʼu yuʼun ti liʼ oyoxuke?».
22 Xi laj yalike: «Li bankilal yuʼun soltaroetik ti Kornelio sbie, ti jaʼ jun tukʼil vinik xchiʼuk ti xiʼtaoj Dios xchiʼuk ti lek ch-albat skʼoplal yuʼun skotol li jteklum yuʼun judaetike, albat mantal yuʼun Dios ta stojolal jun chʼul anjel ti akʼo xtal avichʼ albel ti akʼo xabat ta snae xchiʼuk ti akʼo yaʼi li kʼusitik chavalbee».
23 Jech oxal laj yikʼan ochel xchiʼuk la xchʼam kʼuchaʼal yajvulaʼaltak.
Li ta yokʼomale lik xchiʼuk bat xchiʼinan, jech xtok bat chiʼinatuk yuʼun jlom ermanoetik ti te nakalik ta Jopee.
24 Li ta yokʼomale och ta Sesarea. Ta melel, te xa chmalaatik yuʼun li Kornelioe xchiʼuk stakoj ta ikʼel yutsʼ yalal xchiʼuk li buchʼutik yamigo tajek sbaik xchiʼuke.
25 Kʼalal och batel li Pedroe, lokʼ nupatuk ta be yuʼun li Kornelioe, la skejan sba ta yok, vaʼun lik yichʼ ta mukʼ.*
26 Pe la snit likel li Pedroe, xi laj yalbee: «Likan; jaʼ noʼox jun vinikun ek».
27 Kʼalal yakal chloʼilaj xchiʼuke, och batel, vaʼun te tsobol la sta epal krixchanoetik.
28 Xi laj yalanbee: «Li voʼoxuke anaʼojik lek ti mu stakʼ xchiʼin o xnopaj jun juda vinik ta stojolal jun vinik ti yan-o stsʼunbale, akʼo mi jech, laj yakʼbun kil Dios ti mu stakʼ xkal ti muʼyuk lek o ti ibal sba mi junuk krixchanoe.
29 Jaʼ yuʼun muʼyuk kʼusi laj kal kʼalal litakat ta ikʼele. Pe ta jakʼboxuk ti kʼu yuʼun la atakikun ta ikʼele».
30 Vaʼun xi laj yal li Kornelioe: «Leʼ xa ta xchanibal kʼakʼale, kʼalal jech ora kʼuchaʼal liʼe, yakal ta jpas orasion ta jna, te van ta sbalunebal ora, vaʼun jaʼo te la svaʼan sba jun vinik ta kelov ti solel xojobaj li skʼuʼ spokʼe
31 xchiʼuk xi laj yale: ‹Kornelio, lek laj yichʼ aʼiel li orasion chapase xchiʼuk vul xa ta sjol Dios li matanaletik ta xkʼuxul oʼontonal chavakʼe.
32 Jaʼ yuʼun tako batel viniketik ta Jope sventa xatak ta ikʼel li Simone, ti Pedro yan sbie. Li vinik taje te chvay ta sna Simon, ti jaʼ jun jkʼaʼesej nukule, ti te oy sna ta stsʼel nabe›.
33 Jaʼ yuʼun la jtakot ta ikʼel ta anil, toj lek avoʼonton ti latale. Jech oxal avie, liʼ oyunkutik ta stojolal Dios sventa ta jchikintakutik skotol li kʼusi yalojbot tal Jeova chavalbunkutike».
34 Ta skoj taje, xi lik yal li Pedroe: «Ta melel, li avie xkaʼibe smelolal ti mu snaʼ xtʼujvan li Diose,
35 moʼoj, yuʼun buyuk noʼox slumalik lek ch-ilat li buchʼu chiʼta xchiʼuk ti buchʼu tspas li kʼusi tukʼe.
36 Li stuke la stakbe batel aʼyej xnichʼnab Israel sventa chalbe li lekil aʼyejetik sventa li jun oʼontonal ta stojolal Jesukristoe: li stuke kʼot ta Kajvaltik ta stojolal skotolik.
37 Anaʼojik li kʼusi laj yichʼ loʼiltael ta sjunlej Judeae, ti te lik yichʼ alel tal ta Galilea kʼalal laj xaʼox yal Juan ta sventa li ichʼvoʼe:
38 ti likem ta Nasaret li Jesuse, ti kʼu yelan tʼujat yuʼun Dios ta chʼul espiritu xchiʼuk ta juʼelale, ti la spas batel kʼusi lek ta balumil xchiʼuk ti la xpoxta batel skotol li buchʼutik ilbajinbilik yuʼun li Diabloe;* yuʼun te chiʼinbil yuʼun li Diose.
39 Jech oxal skotol li kʼusi la spas ta steklumal judaetik xchiʼuk ta Jerusalene jaʼ testigo kʼotemunkutik; pe la smilik xchiʼuk la sjokʼanik ta jtel teʼ.
40 Li Diose la xchaʼkuxes ta yoxibal kʼakʼal xchiʼuk laj yakʼ ti akʼo yakʼ sba ta ilele,
41 pe maʼuk ta stojolal skotol li jteklume, jaʼ noʼox ta stojolal testigoetik ti vaʼanbilik xa onoʼox yuʼun Diose, voʼonkutik maʼ taje, ti la jchiʼinkutik ta veʼel xchiʼuk ta uchʼbolajel kʼalal laj xaʼox yichʼ chaʼkuxesele.
42 Jech xtok, tsots laj yalbunkutik Jesus ti akʼo jcholbekutik mantal li jteklume xchiʼuk ti akʼo lek tsʼakal xkalbekutik skʼoplal* ti akʼo kʼotuk ta jchapanvanej sventa li buchʼutik kuxulike xchiʼuk li buchʼutik chamemik li buchʼu svaʼanoj Diose.
43 Skotol li j-alkʼopetike chalbeik skʼoplal li vinik taje, skotol ti buchʼu chakʼ xchʼunel yoʼonton ta stojolale tsta perton yuʼun smul ta sventa li sbie».
44 Kʼalal yakal to chalbe skʼoplal Pedro li kʼusitik taje, kʼot chʼul espiritu ta stojolal skotol li buchʼutik yakal chaʼiik li kʼope.
45 Li jchʼunolajeletik* ti yichʼojik sirkunsision ti xchiʼinojik tal Pedroe solel labal sba chilik, yuʼun li matanal muʼyuk tojbil ti jaʼ li chʼul espiritue yakal chichʼik ek li jyanlumetike.
46 Yuʼun yakal chaʼiik chkʼopojik ta yantik kʼopetik xchiʼuk tsmukʼibtasbeik skʼoplal li Diose. Vaʼun xi la stakʼ li Pedroe:
47 «Li viniketik liʼe ti laj xa yichʼik chʼul espiritu jech kʼuchaʼal laj kichʼtike, ¿mi oy van buchʼu xuʼ xal ti mu xuʼ xichʼik voʼe?».
48 Jaʼ yuʼun laj yal mantal ti akʼo yichʼik voʼ ta sbi Jesukristoe. Vaʼun la skʼanbeik vokol ti akʼo to komuk jayibuk kʼakʼale.
Tsʼibetik ta yok vun
^ Jaʼ li buchʼu sbainoj o ti tspas ta mantal sien soltaroe.
^ Kʼelo glosario.
^ Te van ta oxib ora ta bat kʼakʼal.
^ Kʼelo glosario.
^ Te van ta oʼloltik batel kʼakʼal.
^ O: «snijan sba ta stojolal».
^ Kʼelo glosario.
^ O: «lek tsʼakal jcholkutik li mantale».
^ O: «Li buchʼutik tukʼ yoʼontonik».
