Echos 12:1-25
12 Li vaʼ kʼakʼale, li ajvalil Erodese lik yilbajin jayvoʼuk li buchʼutik te ta tsobobbaile.
2 Ta espada la smil li Santiago ti jaʼ sbankil yitsʼin sbaik xchiʼuk li Juane.
3 Kʼalal laj yil ti lek laj yaʼi judaetike, la snop tstikʼ ta chukel li Pedro eke. (Taje jaʼo Skʼakʼalil pan ti muʼyuk slevaduraile.)
4 Kʼalal la stsake la stikʼ ta chukel xchiʼuk laj yakʼ chankʼex soltaroetik sventa xchabiat, chanchanvoʼ jujukʼex, yuʼun oy ta yoʼonton chakʼbe yil jteklum kʼalal mi echʼ xaʼox li kʼin Koltaele.*
5 Jaʼ yuʼun te tikʼil ta chukinab li Pedroe, pe li buchʼutik te oyik ta tsobobbaile ta sjunul yoʼonton tspasik orasion ta stojolal Dios ta sventa li Pedroe.
6 Kʼalal jutuk xa skʼan xakʼ ta ilel Pedro li Erodese, li vaʼ akʼobale te yakal chvay, chukbil ta chaʼlik kadena ta chaʼvoʼ soltaro xchiʼuk te oy jchabivanejetik ta tiʼ chukinab sventa chchabiik li chukinabe.
7 Pe ¡kʼelo avil!, li yaj-anjel Jeovae te vaʼal, xojobaj noʼox kʼot lus li ta chukinabe. La stijbe xokon Pedro sventa xjulav* xchiʼuk xi laj yalbee: «¡Likan ta anil!». Vaʼun sol yalel li kadena chukul ta skʼobe.
8 Xi albat yuʼun li anjele: «Lapo li akʼuʼ apokʼe* xchiʼuk chuko li axonobe». Vaʼun jaʼ jech la spas. Xi to albat ta slajebe: «Lapo li akʼuʼ ta sbae xchiʼuk tsʼakliun talel».
9 Vaʼun lokʼ batel, te stsʼaklioj batel, pe mu aʼibajuk chaʼi mi jaʼ melel li kʼusi tspas anjele. La snop ti yuʼun oy kʼusi yakal chile.*
10 Te echʼik li ta sbatsopal jchabivanejetike, te echʼik li ta xchaʼtsopale, laje te kʼotik li ta tiʼ na pasbil ta takʼin ti skʼeloj batel jteklume, vaʼun jam stuk li tiʼ nae. Kʼalal lokʼik xaʼoxe xanavik batel jun kaye, vaʼun ta anil noʼox la xchʼak sba batel ta stojolal li anjele.
11 Xi laj yal Pedro kʼalal vul xaʼox lek xchʼulele: «Avie laj xa jnaʼ ta melel ti la stak talel yaj-anjel li Jeovae xchiʼuk ti la skoltaun lokʼel ta yok skʼob li Erodese xchiʼuk ta skotol li kʼusitik smalaojik xaʼox chkʼot ta pasel ta jtojolal li judaetike».
12 Kʼalal laj yakʼ venta taje bat ta sna Maria ti jaʼ li smeʼ Juane, ti Markos yan sbie, jaʼ ti bu ep te tsobolik xchiʼuk ti yakal tspasik orasione.
13 Kʼalal la skʼoj li tiʼ na ta ochebale, tal kʼelatuk yuʼun jun kiara ti Rode sbie.
14 Kʼalal laj yaʼi ti jaʼ yechʼomal ye Pedroe muʼyuk la sjam li tiʼ nae, yuʼun xmuyubaj tajek*, kʼajomal noʼox anil xa och batel xchiʼuk laj yal ti te vaʼal ta ochebal li Pedroe.
15 Pe xi albate: «Likem achuvaj». Pe li stuke laj to yal ti yuʼun jech ta melele. Pe xi lik yalike: «Jaʼ yaj-anjel».
16 Pe te tskʼojilan-o tiʼ na li Pedroe. Kʼalal la sjamik li tiʼ nae toj chʼayal to kʼot yoʼontonik kʼalal laj yilike.
17 Pe li stuke la spas senya ta skʼob sventa stsʼijiik xchiʼuk lik xchap lek ti kʼu yelan lokʼesat ta chukel yuʼun li Jeovae, vaʼun xi laj yale: «Bat albeik yaʼi Santiago xchiʼuk ermanoetik li kʼusitik taje». Vaʼun lokʼ batel, la stam batel sbe sventa yan-o bu chbat.
18 Kʼalal sakub osile, xvochlajetik likel li soltaroetik ta sventa ti kʼusi van kʼot ta pasel stojolal li Pedroe.
19 Li Erodese la saʼ lek, pe muʼyuk bu la sta, jaʼ yuʼun la sjakʼilanbe li soltaroetike xchiʼuk laj yal mantal ti akʼo bat yichʼik kastigoe; vaʼun yal batel ta Sesarea ti te lik batel ta Judeae, te kom kʼuk sjalil.
20 Tana un ilin tajek ta stojolal li jtiroetik xchiʼuk li jsidonetike. Jaʼ yuʼun li stukike jmoj batik ta stojolal li ajvalile, vaʼun laj yakʼbeik xchʼun Blasto ti akʼo bat skʼanbe ajvalil sventa ti junuk yoʼontonik xchiʼukike, li vinik taje jaʼ sventainojbe li sna ajvalile, ti jech la spasike jaʼ ta skoj ti te chlik talel ta slumal ajvalil li sveʼelike.
21 Kʼalal la sta skʼakʼalil ti kʼusi ora albile, li Erodese la slap li kʼuʼil sventa ajvalile xchiʼuk te choti ta chapanobbail,* vaʼun lik yal mantal ta stojolal li krixchanoetike.
22 Xi lik avanikuk li jteklum ti te tsobolike: «¡Yechʼomal ye jun dios, maʼuk yechʼomal ye jun krixchano!».
23 Pe ta anil noʼox yayijesat yuʼun li yaj-anjel Jeovae, yuʼun maʼuk laj yakʼ ta ichʼel ta mukʼ li Diose; lik tiʼatuk ta xuvit xchiʼuk cham.
24 Vaʼun epaj batel li skʼop Jeovae xchiʼuk lik pukuk batel.
25 Kʼalal laj xaʼox lek yoʼontonik ta abtel li Bernabe xchiʼuk Saulo te ta Jerusalene, sutik batel xchiʼuk laj yikʼik batel li Juan ti Markos yan sbi xtoke.
Tsʼibetik ta yok vun
^ Kʼelo glosario.
^ O: «xvikʼ sat».
^ O: «Chuko lek li achʼute».
^ Kʼelo glosario.
^ O: «echʼem pʼij yoʼn»; «nichim noʼox yoʼonton».
^ Kʼelo glosario.
