Echos 15:1-41
-
Utbail ta Antiokia sventa sirkunsision (1, 2)
-
Bat xchapbeik skʼoplal ta Jerusalen (3-5)
-
Tstsob sbaik moletik xchiʼuk jtakboletik (6-21)
-
Skarta jtsop jbeiltasvanej (22-29)
-
Tstsʼik sbaik ta sventa li chʼichʼe (28, 29)
-
-
Patbat yoʼontonik yuʼun karta li tsobobbailetike (30-35)
-
Jelel bu la stam batel sbeik li Pablo xchiʼuk Bernabee (36-41)
15 Vaʼun oy jayvoʼuk viniketik likik talel ta Judea xchiʼuk xi lik xchanubtasik li ermanoetike: «Mi muʼyuk laj avichʼik sirkunsision jech kʼuchaʼal chal Smantal Moisese, muʼyuk bu chata akolelik».
2 Kʼalal laj xaʼox yut sbaik xchiʼuk viniketik li Pablo xchiʼuk Bernabee, laj yichʼ chapel sventa xbatik ta Jerusalen ta stojolal jtakboletik xchiʼuk moletik ta sventa li kʼop taje, li buchʼutik laj yichʼik takel batele jaʼik Pablo, Bernabe xchiʼuk yan ermanoetik.
3 Jaʼ yuʼun chiʼinatik batel jtuchʼuk* be yuʼun li tsobobbaile, laje batik ta Fenisia xchiʼuk ta Samaria, lek xcholet laj yalbeik batel skʼoplal ti laj yichʼik ta mukʼ Dios li jyanlumetike xchiʼuk xmuyubaj noʼox* yuʼunik skotol li ermanoetike.
4 Kʼalal kʼotik ta Jerusalene lek chʼambil kʼotik ta tsobobbail, ta stojolal jtakboletik xchiʼuk ta stojolal moletik, vaʼun lik yalik li kʼusitik ep la spas Dios ta stojolalike.
5 Pe oy jlom li ta jvokʼ yuʼun jfariseoetik* ti kʼotemik xa ta jchʼunolajele, likik ti bu chotolike, xi laj yalike: «Persa skʼan xichʼik sirkunsision xchiʼuk akʼo xchʼunik li Smantal Moisese».
6 Jaʼ yuʼun la stsob sbaik li jtakboletik xchiʼuk moletik sventa tskʼelbeik lek skʼoplal taje.
7 Kʼalal jal xaʼox laj yut sbaik tajeke, vaʼi li Pedroe xchiʼuk xi laj yale: «Viniketik, ermanoetik, anaʼojik lek ti ta sbatik onoʼox kʼakʼal la stʼujun lokʼel Dios ta atojolalik sventa xkalbeik lekil aʼyejetik li jyanlumetike xchiʼuk ti akʼo xchʼunike.
8 Li Diose xojtikin li oʼontonale, jaʼ yuʼun laj yakʼ ta ilel kʼalal laj yakʼanbe li chʼul espiritue, jech kʼuchaʼal laj yakʼbutik eke.
9 Koʼol la xkʼuxubinutik, yuʼun sakubtasbat yoʼontonik ta skoj li xchʼunel yoʼontonike.
10 Jaʼ yuʼun, ¿kʼu yuʼun chavakʼik ta preva li Dios kʼalal chavakʼbeik xkuch alal ikatsil li jchankʼopetik ti mi jaʼuk bu kuch yuʼunik ek li jmoltotaktik ta voʼne xchiʼuk ti mi jaʼuk bu kuch kuʼuntik eke?
11 Li kʼusi noʼoxe, oy xchʼunel koʼontontik ti chijkolutik ta sventa li slekil yutsil yoʼonton Kajvaltik Jesus jech kʼuchaʼal chkol li stukik eke».
12 Jaʼ yuʼun tsʼiji skotol li epal krixchanoetike, lik yaʼibeik li Bernabe xchiʼuk Pablo kʼalal yakal chalik ti laj yakʼik ta ilel ep senyailtak xchiʼuk kʼusitik labal sba ti akʼbat spasik yuʼun Dios ta stojolal li jyanlumetike.
13 Kʼalal laj xaʼox yoʼontonik ta loʼile, xi takʼav li Santiagoe: «Viniketik, ermanoetik, aʼibeikun.
14 Lek tsʼakal laj yal Simeon ti kʼu yelan laj yakʼ sat Dios ta sba velta ta stojolal jyanlumetik sventa te tslokʼes talel jun jteklum ta sventa li sbie.
15 Jaʼ yuʼun sta-o li kʼusi yaloj J-alkʼopetik ti xi onoʼox tsʼibabile:
16 ‹Chisut talel mi kʼot ta pasel taje xchiʼuk ta jchaʼvaʼanbe li skarpana David ti jineme; ta jchaʼvaʼan ti jineme xchiʼuk chchaʼta yav kuʼun,
17 sventa akʼo saʼik ta sjunul yoʼontonik Jeova ti kʼu to yepal komemik xchiʼuk skotol li jyanlumetike, krixchanoetik ti biiltasbilik ta jbie, xi chal Jeova ti jaʼ li buchʼu yakal tspas li kʼusitik taje,
18 ti nabil xa onoʼox ta voʼnee›.
19 Jech oxal chaʼa, jaʼ jech kʼot ta nopel kuʼun ti mu jkʼan xkakʼbe svokol li jyanlumetik ti yakal xa tsutes yoʼontonik ta stojolal Diose,
20 pe ti kʼusie, skʼan xichʼik tsʼibabel ti akʼo stsʼik sbaik* ta sventa li kʼusitik ikʼubtasbil xa ta sventa santoetike, ta sventa mulivajel,* ta sventa li kʼusi michʼbil snukʼ chchame xchiʼuk ta sventa li chʼichʼe.
21 Yuʼun voʼne xa onoʼox oy buchʼutik chalbeik batel skʼoplal ta jujun jteklum li Moisese, yuʼun te chichʼ aptabel skʼoplal ta nail tsobobbailetik skotol Savado».
22 Vaʼun li jtakboletike, li moletik xchiʼuk li sjunlej tsobobbaile la snopik ti tstakik batel jayvoʼuk viniketik ti la stʼujike, jaʼ la stʼujik li Judas ti Barsabas chalbeike xchiʼuk li Silase, ti jaʼik jbabe yuʼun li ermanoetike, vaʼun jmoj takatik batel ta Antiokia xchiʼuk Pablo xchiʼuk Bernabe.
23 Xi chal li karta ti la stsʼibaik xchiʼuk ti stakik batele:
«Voʼonkutik li jtakbolunkutik xchiʼuk li molunkutike, li avermanounkutike: ermanoetik ta Antiokia, Siria* xchiʼuk Silisia ti jyanlumoxuke: ¡Chabanukoxuk!
24 Ta skoj ti laj kaʼikutik ti oy jayvoʼuk ti lokʼem ta jtojolalkutik ti la sokes avoʼontonik ta skoj li kʼusitik laj yalike, ti tskʼan tsjel li kʼusitik achʼunojike, akʼo mi maʼuk ta jmantalkutik ti jech la spasike,
25 jaʼ yuʼun jech jmoj kʼot ta nopel kuʼunkutik ti ta jtakkutik batel ta atojolalik jayvoʼuk viniketik ti la jtʼujkutike, ti te skʼoplalik ek li Bernabe xchiʼuk Pablo ti kʼanbil kuʼunkutike,
26 viniketik ti yakʼoj ta vokol xkuxlejalik ta sbi li Kajvaltik Jesukristoe.
27 Jech oxal ta jtakbotkutik talel li Judas xchiʼuk Silase, sventa xalboxuk ta yeik ek li kʼusitik la jnopkutike.
28 Yuʼun li voʼonkutik xchiʼuk chʼul espiritue lek laj kaʼikutik ti mu xa xkakʼkutik mas avikatsike, jaʼ noʼox li kʼusitik persa skʼan xichʼ pasel liʼe:
29 ti akʼo xatsʼik-o abaik ta stojolal li kʼusitik milbil ta smoton santoetike, ta sventa li chʼichʼe, ta sventa li kʼusi michʼbil snukʼ chchame xchiʼuk ta sventa li mulivajele. Mi chakʼel abaik lek ta sventa li kʼusitik taje, lek me oyoxuk un bi. ¡Te jkʼopon jbatik ta yan kʼakʼal!».
30 Jech oxal un, kʼalal akʼat batikuk li viniketik taje, yalik batel ta Antiokia, la stsobik skotol li krixchanoetike, vaʼun laj yakʼbeik li kartae.
31 Kʼalal laj xaʼox skʼelike, xkuxet likel yoʼontonik ta skoj ti patbat yoʼontonike.
32 Vaʼun, ta skoj ti j-alkʼopetik ek li Judas xchiʼuk Silase, ep la spatbeik yoʼonton xchiʼuk la stsatsubtasbeik yoʼonton ermanoetik ta skoj li skʼopojelike.
33 Kʼalal oy xaʼox kʼuk sjalil te oyike, albatik yuʼun ermanoetik ti junuk yoʼontonik akʼo sutikuk batel ta stojolal ti buchʼutik takvanemik talele.
34 *——
35 Yan li Pablo xchiʼuk Bernabee te komik ta Antiokia sventa chakʼik ta chanel xchiʼuk chalik li lekil aʼyejetik ta skʼop Jeovae, jech jmoj tspasik xchiʼuk epal krixchanoetik.
36 Pe xi laj yalbe Bernabe li Pablo kʼalal jelav xaʼox jayibuk kʼakʼale: «Sutkutik xa batel, bat jvulaʼantik li ermanoetik ta jujun lum ti bu la jcholbetik skʼop Jeovae, bat jkʼeltik kʼu yelanik».
37 Li Bernabee oy tajek ta yoʼonton tskʼan chikʼ batel li Juane, ti Markos yan sbie.
38 Yan li Pabloe mu skʼan ti akʼo xikʼik batele, ta skoj ti te la xchʼak sba lokʼel ta stojolalik ta Panfiliae, yuʼun muʼyuk bu bat chiʼinatikuk li ta abtelale.
39 Tsots lik skʼakʼal yoʼontonik ta skoj taje, jaʼ yuʼun la xchʼak sbaik batel ta jujuntal; li Bernabee laj yikʼ batel li Markose, vaʼun och batel ta varko, bat ta Chipre.
40 Pe li Pabloe jaʼ la stʼuj li Silase, vaʼun lokʼ batel kʼalal kʼubanat xaʼox yuʼun ermanoetik ta sventa li slekil yutsil yoʼonton Jeovae.
41 Te jelav batel ta Siria xchiʼuk ta Silisia, la stsatsubtasbe yoʼonton li tsobobbailetike.
Tsʼibetik ta yok vun
^ O: «jvokʼuk».
^ O: «pʼij noʼox yoʼn»; «nichim noʼox yoʼonton».
^ Kʼelo glosario.
^ O: «spajes sbaik»; «stsʼin sbaik».
^ Por·nei·a ta griego. Kʼelo glosario.
^ Kʼelo glosario.
^ Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
