Echos 16:1-40
-
Li Pabloe la stʼuj Timoteo (1-5)
-
Laj yichʼ ilel jun jmasedonia vinik (6-10)
-
Te ta Filipos la sjel xkuxlejal li Lidiae (11-15)
-
Tikʼatik ta chukel li Pablo xchiʼuk Silase (16-24)
-
Laj yichʼik voʼ li jchabichukinab xchiʼuk li buchʼutik te ta snae (25-34)
-
Li Pabloe laj yal ti akʼo xkʼanbat pertone (35-40)
16 Jaʼ yuʼun te kʼot ta Derbe xchiʼuk ta Listra. Vaʼun te oy jun jchankʼop ti Timoteo sbie, yol jun jchʼunolajel juda ants, pe jgresia vinik li stote,
2 lek tajek chalbeik skʼoplal li ermanoetik ta Listra xchiʼuk ta Ikonioe.
3 Li Pabloe laj yal ti oy ta yoʼonton chikʼ batel li Timoteoe, vaʼun laj yikʼ batel xchiʼuk laj yakʼbe yichʼ sirkunsision ta skoj li judaetik ti te oyik li ta lumetik taje, yuʼun snaʼoj skotolik ti jgresia vinik li stote.
4 Kʼalal yakal chanavik batel ta jujun jteklume te chakʼik batel li mantaletik sventa akʼo xchʼunike, jaʼ li kʼusi kʼot ta nopel yuʼun jtakboletik xchiʼuk moletik ti te oyik ta Jerusalene.
5 Jech oxal, ta melel, mas tsatsub batel xchʼunel yoʼontonik li tsobobbailetike xchiʼuk epajik batel jujun kʼakʼal.
6 Jech xtok, la xtuchʼik batel Frijia xchiʼuk jteklum Galasia, yuʼun pajesatik yuʼun chʼul espiritu ti mu xbat xcholik skʼop Dios li ta yosilal Asiae.
7 Jech xtok, laj yakʼik persa ch-ochik ta Bitinia kʼalal yalik batel ta Misiae, pe pajesatik yuʼun li chʼul espiritu ti jaʼ akʼbat yuʼun Stot li Jesuse.
8 Jech oxal jelavel echʼik li ta Misiae, yalik batel ta Troas.
9 Li ta akʼobaltike oy kʼusi akʼbat yil* li Pabloe, te vaʼal jun jmasedonia vinik ti xi chale: «Laʼ ta Masedonia,* laʼ koltaunkutik».
10 Kʼalal akʼbat xaʼox yil li kʼusi taje, la jkʼelkutik kʼuxi chibatkutik ta Masedonia, yuʼun kʼot ta nopel kuʼunkutik ti la stakunkutik ta ikʼel Dios sventa chbat kalbekutik li lekil aʼyejetike.
11 Jech oxal un li-ochkutik batel ta varko, te lilikutik ta Troas, tukʼ libatkutik ta Samotrasia, pe libatkutik ta Neapolis li ta yokʼomale;
12 te une libatkutik ta Filipos ti jaʼ jun kolonyae, ti jaʼ li jteklum mas tsots skʼoplal ta yosilal Masedoniae. Te lijalijkutik jayibuk kʼakʼal li ta jteklum taje.
13 Lilokʼkutik ta stiʼ jteklum li ta Savadoe, libatkutik ta stsʼel ukʼum, la jnopkutik ti jaʼ te ti bu chichʼ pasel orasione, te lichotikutik xchiʼuk lik jchiʼinkutik ta loʼil li antsetik te tsobolike.
14 Oy jun ants ti Lidia sbie, jchon kuxul morado kʼuʼil pokʼil, ta jteklum Tiatira likem tal xchiʼuk chichʼ ta mukʼ Dios, te yakal chaʼi xchiʼuk jambat lek yoʼonton yuʼun Jeova sventa xchʼam li kʼusi chal Pabloe.
15 Vaʼun kʼalal laj yichʼ voʼ xchiʼuk skotol li buchʼutik te ta snae, xi laj yalbunkutike: «Mi tukʼ oyun ta stojolal Jeova chavilike, laʼ komanik ta jna». La sujunkutik ti akʼo te xikomkutike.
16 Vaʼun kʼalal jaʼo yakal chibatkutik ti bu chichʼ pasel orasione, te la staunkutik jun kiara ti ochem ibal sba pukuj ta yoʼontone, ti jaʼ ch-akʼbat snaʼ li kʼusi chkʼot ta pasel ta tsʼakale.* Ep onoʼox tajek tspas kanal yuʼun yajval li kiara ta skoj ti chakʼ ta naʼel li kʼusi chkʼot ta pasel ta tsʼakale.
17 Te tijil batel ta spat Pablo xchiʼuk ta jpatkutik li tseb taje, xi tsots chale: «Jaʼ smosotak Mukʼul Dios li viniketik liʼe xchiʼuk yakal tspukboxuk skʼoplal li sbelel kolebale».
18 Oy jayibuk kʼakʼal jech la spas. Jech oxal tavan xaʼi li Pabloe, joypʼij xchiʼuk xi laj yalbe li pukuje: «Ta sbi Jesukristo chkalbot mantal ti akʼo xalokʼ ta stojolal li tsebe». Vaʼun lokʼ li vaʼ orae.
19 Vaʼun, kʼalal laj yil yajvaltak ti chʼabal xa kʼusi tspasik-o kanale, la stsakik li Pablo xchiʼuk Silase, la xjochik batel ta chʼivit ta stojolal ajvaliletik.
20 Xi laj yalik kʼalal laj yikʼik batel ta stojolal ajvaliletik ta jteklume:* «Yakal tajek tsokbeik yoʼonton jteklumaltik li viniketik liʼe. Jaʼik judaetik
21 xchiʼuk tspukbeik batel skʼoplal li kʼusitik nopem xaʼiik spasel ti mu stakʼ jchʼamtik xchiʼuk ti mu stakʼ jpastik jeche, yuʼun jromautik».
22 Jech oxal vaʼi skotol li epal krixchanoetik ta stojolalike, la skontrainik; vaʼun laj yalik mantal li ajvaliletik ta jteklum ti akʼo snitbeik lokʼel li skʼuʼ spokʼike xchiʼuk ti akʼo sjisbeik teʼe.
23 Kʼalal ep xaʼox tajek laj yichʼik majele tikʼatik ta chukel, vaʼun laj yalbeik mantal li jchabichukinab ti akʼo xchabi leke.
24 Ta skoj ti jech laj yichʼ mantal li jchabichukinabe, la stikʼan ochel ta batsʼi yutil to chukinab xchiʼuk la slatsʼanbe yokik ta latsʼob teʼ.*
25 Te van ta oʼlol batel akʼobale, yakal tspasik orasion li Pablo xchiʼuk Silase xchiʼuk yakal tskʼupil kʼoptaik Dios ta kʼejoj, te yakal ch-aʼibatik yuʼun li yantik jchukeletike.
26 Ta anil noʼox tal tsatsal nikel, jech oxal nik li snaklebtak chukinabe. Jech xtok, ta anil noʼox jam skotol li stiʼtake xchiʼuk sol yalel skadenail skotolik.
27 Kʼalal julav* li jchabichukinabe xchiʼuk laj yil ti jamajtik li stiʼtak chukinabe, la snit lokʼel li yespadae, tsmil xaʼox sba, yuʼun la snop ti jatavemik xa batel li jchukeletike.
28 Pe xi tsots laj yal li Pabloe: «¡Mu xamil aba, yuʼun liʼ oyunkutik jkotolkutike!».
29 Jech oxal la skʼan akʼo yichʼik tal kʼokʼ, och batel ta anil xchiʼuk xtʼeltʼun tajek ta xiʼel, la skejan sba ta stojolal Pablo xchiʼuk Silas.
30 Lokʼesatik xchiʼuk xi laj yale: «Viniketik, ¿kʼusi skʼan jpas sventa xuʼ xikole?».
31 Xi laj yalike: «Chʼuno li Kajvaltik Jesuse, vaʼun chakol xchiʼuk li buchʼutik te ta anae».
32 Vaʼun laj yalbeik skʼop Jeova xchiʼuk skotol li buchʼutik te ta snae.
33 Jech oxal ikʼatik batel li vaʼ ora akʼobale xchiʼuk pokbat li syayijemalike. Vaʼun laj yichʼ voʼ ta anil xchiʼuk skotol li yutsʼ yalale.
34 Laj yikʼ ochel ta sna xchiʼuk te laj yakʼbe sveʼelik ta mexa li Pablo xchiʼuk Silase, jaʼ yuʼun muyubaj tajek* xchiʼuk skotol li buchʼutik te ta sna ta skoj ti xchʼunojik xa Diose.
35 Kʼalal sakub osile, la stakik batel mayoletik li ajvaliletik ta jteklum sventa akʼo xi yalike: «Koltao batel li viniketike».
36 Xi albat yuʼun jchabichukinab li Pablo ta skoj li kʼusitik laj yalik li ajvaliletik ta Filipose: «Stakoj talel viniketik li ajvaliletik ta jteklum sventa xavichʼik koltael lokʼel achaʼvoʼalike. Jech oxal lokʼanik batel xchiʼuk junuk avoʼonton batanik».
37 Xi albatik yuʼun li Pabloe: «La stsitsunkutik ta sat krixchanoetik akʼo mi muʼyuk laj kichʼkutik chapanel baʼyel, la stikʼunkutik ta chukel akʼo mi jromaunkutik. Avi une, ¿mi yuʼun ta mukul tskʼan tslokʼesunkutik batel? ¡Mi jsetʼuk! Akʼo taluk stukik xchiʼuk akʼo xchabiunkutik lokʼel».
38 Jech oxal laj yalbeik ajvaliletik ta jteklum li mayoletike. Vaʼun xiʼik kʼalal laj yaʼiik ti jaʼ jroma viniketike.
39 Vaʼun talik xchiʼuk la slekil kʼoponik, kʼalal chabiatik xaʼox lokʼele albatik ti akʼo lokʼikuk batel li ta jteklume.
40 Batik ta sna Lidia kʼalal lokʼik ta chukele xchiʼuk kʼalal laj yilik li ermanoetike la spatbeik yoʼonton, vaʼun lokʼik batel.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «vikʼ sat».
^ O: «echʼem pʼijub yoʼn»; «nichimaj noʼox yoʼonton».
