Echos 18:1-28
18 Kʼalal kʼot ta pasel taje, lokʼ batel ta Atenas li Pabloe, vaʼun bat ta Korinto.
2 Te la sta jun juda vinik ti Akila sbi ti te vokʼem* ta Pontoe, achʼ to slokʼelik talel ta Italia xchiʼuk yajnil ti Prisila sbie, yuʼun laj yal mantal Klaudio ti akʼo lokʼikuk ta Roma skotol li judaetik ti te oyike. Jaʼ yuʼun te bat svulaʼan
3 xchiʼuk te kom ta sna ta skoj ti jmoj yabtelike, te jmoj abtejik, yuʼun jaʼ yabtelik ta spasel karpanaetik.
4 Pe skotol Savado te chal mantal* ta nail tsobobbail xchiʼuk chchʼun yuʼun li judaetik xchiʼuk li jgresiaetike.
5 Kʼalal lokʼik ta Masedonia li Timoteo xchiʼuk Silase, lik yakʼbe yipal ta yalel skʼop Dios li Pabloe, laj yalbe mantal judaetik sventa chakʼ ta ilel ti jaʼ Kristo li Jesuse.
6 Pe ta skoj ti jech kontrainat-o xchiʼuk ti chchopol kʼoptaate, la slilin li skʼuʼ spokʼe xchiʼuk xi laj yale: «Te chkom ta aba atukik li achʼichʼelike. Voʼone muʼyuk xa jmul. Liʼ ta ora xchiʼuk ta jelavele jaʼ xa te chibat ta stojolal li jyanlumetike».
7 Jaʼ yuʼun lokʼ batel* xchiʼuk te bat ochuk ta sna jun vinik ti Tisio Justo sbie, yichʼoj ta mukʼ Dios xchiʼuk te xkom ta stsʼel nail tsobobbail li snae.
8 Pe li Krispo ti jaʼ bankilal jpasmantal ta nail tsobobbaile kʼot ta jchʼunolajel yuʼun Kajvaltik xchiʼuk skotol li buchʼutik te ta snae. Xchiʼuk ep jkorintoetik lik xchʼunik xchiʼuk laj yichʼik voʼ.
9 Xchiʼuk xtok, xi albat yuʼun Kajvaltik ta akʼobaltik li Pablo kʼalal oy kʼusi akʼbat yile:* «Mu me xaxiʼ, alo-o me batel, mu me xavikta aba ta yalel,
10 yuʼun liʼ jchiʼinojote xchiʼuk muʼyuk buchʼu chilbajinot; yuʼun ep krixchanoetik kuʼun li ta jteklum liʼe».
11 Jaʼ yuʼun te to kom jun jabil xchiʼuk oʼlol, te chakʼ ta chanel skʼop Dios ta stojolalik.
12 Kʼalal jaʼ toʼox ajvalil* ta Akaya* li Galione, lik xchap lek skʼopik li judaetik sventa tskontrainik li Pabloe xchiʼuk laj yikʼik batel ta chapanobbail,
13 xi laj yalike: «Li vinik liʼe yakal chakʼbe xchʼun krixchanoetik ti akʼo yichʼik ta mukʼ Dios ti mu jechuk kʼuchaʼal chal li mantale».
14 Pe kʼalal chkʼopoj xaʼox li Pabloe, xi laj yalbe judaetik li Galione: «Aʼio avaʼiik judaetik, mi yuʼun oy kʼusi muʼyuk tukʼ spasoje xchiʼuk mi yuʼun tsots tajek ti smule ta xkaʼiboxuk lek ti jechuke.
15 Pe mi jaʼ noʼox ta sventa kʼusitik kʼopal, mi ta skoj noʼox biiletik o mi ta sventa noʼox mantaletik avuʼunike, te xachapan atukik. Voʼone mu jkʼan jchapan maʼ kʼusitik taje».
16 Jaʼ yuʼun la stakan lokʼel li ta chapanobbaile.
17 Vaʼun skotolik bat stsakik li Sostenes ti jaʼ bankilal jpasmantal ta nail tsobobbaile xchiʼuk te lik smajik ta yeloval chapanobbail. Pe li Galione muʼyuk la stikʼ sba jsetʼuk ta skoj li kʼusitik taje.
18 Vaʼun kʼalal ep xaʼox kʼakʼal te jalij li Pabloe, laj yikta komel li ermanoetike, och batel ta varko sventa chbat ta Siria, te chiʼinbil batel yuʼun li Prisila xchiʼuk Akilae, yuʼun li ta Senkrease te laj yakʼ ta juxel sjol ta skoj ti yakʼoj yee.
19 Jaʼ yuʼun te kʼotik ta Efeso, vaʼun te iktaatik komel li stukike, yan li Pabloe och batel ta nail tsobobbail xchiʼuk te rasonaj xchiʼuk li judaetike.
20 Manchuk mi laj yichʼ kʼanilanbel ti akʼo to te xpaj jayibuk kʼakʼale, muʼyuk bu la xchʼun,
21 kʼajomal noʼox xi laj yal komele: «Chisut talel yan velta mi jech skʼan yoʼonton Jeovae». Vaʼun och batel ta varko ti te lik batel ta Efesoe,
22 laje te yal batel ta Sesarea. Jaʼ yuʼun muy batel* xchiʼuk bat skʼopon li tsobobbaile, laje yal batel ta Antiokia.
23 Vaʼun lokʼ batel kʼalal paj xaʼox jayibuk kʼakʼal tee, xcholet echʼ batel ta yosilal Galasia xchiʼuk ta Frijia, tstsatsubtasbe batel yoʼonton li jchankʼopetike.
24 Vaʼun oy jun juda vinik ti Apolos sbi ti te vokʼem ta Alejandria ti te kʼot ta Efesoe; li vinik taje xtojob lek ta kʼopojel xchiʼuk xchanoj lek li Tsʼibetike.
25 Jech xtok, lek chanubtasbil ta sventa li sbe Jeovae xchiʼuk xojobaj noʼox ta chʼul espiritu, jech oxal chkʼopoj xchiʼuk lek jamal chchanubtasvan ta sventa li Jesuse, pe jaʼ noʼox xojtikin lek li ichʼvoʼ ta sventa Juane.
26 Xchiʼuk lek tsots yoʼonton lik chanubtasvanuk ta nail tsobobbail, jaʼ yuʼun kʼalal laj yaʼiik li Prisila xchiʼuk Akilae laj yikʼik batel, vaʼun mas to lek jamal laj yalbeik smelolal ta sventa li sbe Diose.
27 Jech xtok, ta skoj ti oy ta yoʼonton tskʼan ch-echʼ batel ta Akayae, li ermanoetike la stsʼibabeik batel karta li jchankʼopetik ti akʼo lekuk xchʼamike. Jaʼ yuʼun kʼalal kʼote ep la skoltaan li buchʼutik kʼotemik ta jchʼunolajel ta sventa li slekil yutsil yoʼonton Diose;
28 yuʼun oy lek yip skʼop sventa jamal laj yakʼbe yil sprevailtak li krixchanoetik ti mu jechuk li chanubtasel yuʼun judaetike, jamal laj yakʼ ta ilel ta Tsʼibetik ti jaʼ Kristo li Jesuse.
Tsʼibetik ta yok vun
^ O: «ayanem».
^ O: «te chrasonaj».
^ Jaʼ xkaltik, lokʼ batel li ta nail tsobobbaile.
^ Kʼelo glosario.
^ Jaʼ jun ajvalil ta yosilal Roma.
^ Kʼelo glosario.
^ Yaʼeluke te muy batel ta Jerusalen.
