Echos 21:1-40
21 Kʼalal laj xaʼox jchʼak jbakutik ta stojolalike, kʼalal li-ochkutik xaʼox ta varkoe, anil libatkutik, vaʼun tukʼ likʼotkutik ta Kos, li ta yokʼomale ta Rodas, laje libatkutik ta Patara.
2 Kʼalal te la jtakutik jkot varko ti chbat ta Fenisiae limuykutik, vaʼun libatkutik.
3 Kʼalal laj kilkutik komel ta tsʼetkʼobil jun lum joyol ta nab te ta Chipree, tukʼ libatkutik ta Siria, laje te libatkutik ta Tiro jaʼ ti bu tsyales yikats li varkoe.
4 La jsaʼkutik li jchankʼopetike, vaʼun la jtakutik xchiʼuk te likomkutik vukub kʼakʼal. Pe li Pabloe ta jujulikel ch-albat yuʼun chʼul espiritu ti akʼo mu xbat stekʼan yok ta Jerusalene.
5 Kʼalal tsʼaki skʼakʼalil kuʼunkutik ti bu taje, lilokʼkutik batel xchiʼuk la jtam batel jbekutik; te la xchiʼinunkutik batel skotolik jaʼ to ti kʼalal lilokʼkutik ta spat li jteklume, te kapal batel antsetik xchiʼuk ololetik. Vaʼun te la jkejan jbakutik ta tiʼ nab ta spasel orasion,
6 vaʼun la jchʼak jbakutik ta jujuntal. Limuykutik ta varko li voʼonkutike, pe li stukike sut batel ta snaik.
7 Vaʼun kʼalal lilokʼkutik ta lum Tiroe likʼotkutik ta lum Tolemaida, te la jchiʼinkutik ta loʼil li ermanoetike, te likomkutik jun kʼakʼal xchiʼukik.
8 Li ta yokʼomale libatkutik, vaʼun likʼotkutik ta Sesarea, laje li-ochkutik ta sna Felipe ti jaʼ j-al lekil aʼyeje xchiʼuk ti jaʼ jun li ta svukvoʼal viniketike, vaʼun te likomkutik xchiʼuk.
9 Li vinik taje oy chanvoʼ stsebetak muʼyuk malijemik* ti chalik albil kʼopetike.
10 Kʼalal ep xaʼox kʼakʼal te likomkutike, lik talel ta Judea jun j-alkʼop ti Agabo sbie,
11 vaʼun te tal ta jtojolalkutik, la stsakbe xchuk li Pabloe, la xchuk ta yok skʼob xchiʼuk xi laj yale: «Xi chal li chʼul espiritue: ‹Jaʼ jech chichʼ chukel yuʼun judaetik ta Jerusalen li vinik ti jaʼ yajval li chukil liʼe xchiʼuk chakʼik ta stojolal jyanlumetik›».
12 Kʼalal laj kaʼikutik taje, la jkʼanbekutik vokol ti mu xmuy batel ta Jerusalene, jech la spasik ek li buchʼutik te nakalike.
13 Pe xi la stakʼ li Pabloe: «¿Kʼu yuʼun ti cha-okʼike xchiʼuk ti chakʼunibtasik li kʼusi oy ta koʼonton ta jpase? Xuʼ xapat avoʼontonik, yuʼun maʼuk noʼox chapalun sventa xkichʼ chukel, yuʼun chapalun xtok sventa te xicham ta Jerusalen ta skoj li sbi Kajvaltik Jesuse».
14 Kʼalal laj kilkutik ti muʼyuk bu pajtsaj kuʼunkutike, kʼajomal xa noʼox xi laj kalbekutike: «Akʼo kʼotuk ta pasel li kʼusi tskʼan yoʼonton Jeovae».
15 Ta tsʼakal une lik jchapan jbakutik sventa chibatkutik ta Jerusalen.
16 Te la xchiʼinunkutik batel jayvoʼuk jchankʼopetik ti likemik ta Sesarea sventa chikʼunkutik batel ta stojolal jun vinik ti Mnason sbi ti te likem ta Chipree, voʼne xa onoʼox ti jaʼ jchankʼope xchiʼuk te chkom vaykunkutik ta sna.
17 Kʼalal likʼotkutik ta Jerusalene, xmuyubajik* la xchʼamunkutik li ermanoetike.
18 Vaʼun li ta yokʼomale la xchiʼinunkutik batel Pablo sventa chbat jkʼelkutik li Santiagoe; xchiʼuk te tsobol skotol li moletike.
19 Vaʼun la xchiʼinan ta loʼil xchiʼuk bikʼitik la xchapbe lek smelolal li kʼusitik la spas Dios ta stojolal jyanlumetik ta skoj li yabtel yakal tspase.
20 Kʼalal laj yaʼiike, lik stoybeik skʼoplal Dios skotolik, pe xi laj yalbeike: «Mi laj avakʼ venta ermano ti ta smilal noʼox jchʼunolajeletik oy li ta Judae xchiʼuk ti skotolik oy to ta yoʼontonik li Mantale.
21 Li stukike yaʼiojik akʼoplal ti yakal la chachanubtas judaetik ti te nakajtik ta yantik lum ti tsvalopatin* la li kʼusi chal Moisese, ti yakal la chavalbe ti mu la persauk xichʼik sirkunsision li yalab xnichʼnabike xchiʼuk ti yakal la chavalbe ti mu xa spasik li kʼusitik nopem onoʼox xaʼiik spasele.
22 Jaʼ yuʼun, ¿kʼusi skʼan pasel ta sventa taje? Yuʼun li stukike chaʼiik ti liʼ xa oyote.
23 Jaʼ yuʼun paso li kʼusi chkalbotkutike: oy chanvoʼ viniketik kuʼunkutik ti yakʼoj yeik stukike.
24 Ikʼo batel xchiʼuk koʼol sakubtaso* abaik kʼuchaʼal chal li Mantale xchiʼuk bainbo ti kʼu yepal chlaj yuʼunike, mi laje xuʼ xichʼ juxbel li sjolike. Vaʼun jech tsnaʼ skotolik ti mu jechuk ti kʼu yelan chaʼiik akʼoplale, chakʼik venta ti lek li atalelale xchiʼuk ti chachʼun li Mantal eke.
25 Ta sventa li jyanlum jchʼunolajeletike laj xa jtsʼibabetik batel li kʼusi kʼot ta nopel kuʼuntike, ti akʼo skʼel sbaik ta sventa li kʼusitik milbil ta smoton santoetike, ta sventa li chʼichʼe, ta sventa li kʼusi michʼbil snukʼ chchame xchiʼuk ta sventa li mulivajele».*
26 Vaʼun li ta yokʼomale laj yikʼ batel viniketik li Pabloe xchiʼuk la sakubtas sbaik kʼuchaʼal chal li Mantale, laje och batel ta templo sventa chal kʼusi ora tstsʼaki skʼakʼalil li sakubtasejbail kʼuchaʼal chal li Mantale xchiʼuk sventa kʼusi ora chakʼik li matanal ta jujuntale.
27 Vaʼun kʼalal tstsʼaki xaʼox li vukub kʼakʼale, li judaetik likemik ta Asiae laj yilik ti te vaʼal ta templo li Pabloe, lik sokbeik sjol li epal krixchanoetike, vaʼun la stsakik,
28 xchiʼuk xi avanike: «¡Viniketik ta Israel, koltavananik! Li vinik liʼe jaʼ li buchʼu chchanubtas skotol krixchanoetik ta buyuk noʼoxe, tskontrain li jteklumaltike, li Mantal kuʼuntike xchiʼuk li avilal liʼe, pe maʼuk noʼox taje, yuʼun laj xa yikʼ talel jgresiaetik li ta temploe xchiʼuk laj xa sokes li chʼul avilal liʼe».
29 Ti jech laj yalike jaʼ ta skoj ti laj yilik ta jteklum ti te xchiʼuk Trofimo ti jaʼ j-efesoal vinike, vaʼun la snopik ti laj yikʼ ochel ta templo li Pabloe.
30 Vaʼun xvochlajet likel li jteklume xchiʼuk jmoj anil batik li krixchanoetik ta stojolal li Pabloe, vaʼun la stsakik, la xjochik batel ta spat templo xchiʼuk ta anil noʼox laj yichʼ bajel li tiʼ naetike.
31 Kʼalal ta xaʼox smilike, laj yaʼi li komandante* yuʼun jtsop soltaroetik ti sokem tajek sjolik li buchʼutik te ta Jerusalene;
32 vaʼun li stuke laj yikʼ batel soltaroetik xchiʼuk bankilal soltaroetik,* yal batel ta anil ti bu oyike. Kʼalal la staik ta kʼelel li komandante yuʼun soltaroetik xchiʼuk li soltaroetik yikʼoj batele, laj yiktaik smajel li Pabloe.
33 Vaʼun li komandante yuʼun soltaroetike nopaj batel xchiʼuk laj yikʼ batel ta chukinab, vaʼun laj yal mantal ti akʼo chukatuk ta chaʼlik kadenae; ta tsʼakale la sjakʼbe buchʼu jaʼ xchiʼuk kʼusi ti spasoje.
34 Pe li jlom li ta epal krixchanoetike jelajtik kʼusitik chalik kʼalal x-avlajetike. Jaʼ yuʼun li stuke muʼyuk laj yaʼi lek jtosuk li kʼusi chalik ta skoj ti xvochlajetik tajeke, jaʼ yuʼun laj yal mantal ti akʼo yikʼik batel ta nail soltaroetike.
35 Pe kʼalal kʼot ti bu oy li eskaleraetike, li soltaroetike la xchechik batel li Pabloe, yuʼun solel stsobet tajek li epal krixchanoetike;
36 yuʼun te tijilik batel skotolik xchiʼuk xi chalike: «¡Milo!».
37 Kʼalal ch-ikʼat xaʼox batel ta nail soltaroetike, xi laj yalbe komandante yuʼun soltaroetik li Pabloe: «¿Mi xuʼ oy kʼusi chkalbot?». Xi takʼbate: «¿Mi chakʼopoj ta griego chaʼa?
38 ¿Mi mu jaʼukot li j-ejipto vinik ti leʼ xa ta jayibuk kʼakʼal la stoy sba ta stojolal ajvalil xchiʼuk ti laj yikʼ batel chanmil viniketik ta takixokol balumil ti jaʼik jmilvanejetike?».
39 Vaʼun xi laj yal li Pabloe: «Juda vinikun, likemun ta Tarso ta Silisia, jun jteklum ti lek ojtikinbile. Jaʼ yuʼun ta jkʼanbot vokol: akʼbun jchiʼin ta loʼil li jteklume».
40 Kʼalal albat ti xuʼe, te la svaʼan sba ta eskalera li Pabloe, la spas senya ta skʼob ta stojolal li jteklume. Kʼalal lek xaʼox tsʼijilike, lik kʼopojuk ta evreo kʼop, xi laj yale:
Tsʼibetik ta yok vun
^ S.gr.: «tojol tsebetik».
^ O: «pʼij yoʼnik»; «nichim yoʼontonik».
^ Kʼelo glosario.
^ Kʼelo glosario.
^ Por·nei·a ta griego. Kʼelo glosario.
^ Jaʼ li buchʼu sbainoj o ti tspas ta mantal jmil soltaroe.
^ Jaʼ li buchʼu sbainoj o ti tspas ta mantal sien soltaroe.
