Echos 22:1-30
22 «Viniketik, ermanoetik xchiʼuk totiletik, chikintaik lek ti kʼu yelan ta jpak jkʼoplal avie».
2 Kʼalal laj yaʼiik ti yakal chkʼoponatik ta evreo kʼope, mas to tsʼijiik, vaʼun xi laj yale:
3 «Juda vinikun, te livokʼ* ta Tarso ta Silisia, pe liʼ laj kichʼ chanubtasel ta jteklum ta stojolal Gamaliele, jech lek laj kichʼ chanubtasel jech kʼuchaʼal li Smantal jmoltotaktik ta voʼnee xchiʼuk oy ta koʼonton Dios jech kʼuchaʼal oy ta avoʼontonik avi kʼakʼale.
4 La jnuts li krixchanoetik ti stamojik li Be* taje xchiʼuk oy ox ta koʼonton ta jmilik, la jchukan xchiʼuk la jtikʼan ta chukel, ta vinik ta antsetik jech la jpasbe,
5 xuʼ xal ti jech la jpas li mero bankilal pale* xchiʼuk li jtsop moletike. Jech xtok laj yakʼbeikun batel vunetik sventa li ermanoetik ta Damaskoe, vaʼun yakal chixanav batel sventa chukul ta kadena chkikʼik talel ta Jerusalen li buchʼutik te oyike yoʼ chichʼik akʼbel kastigo.
6 »Kʼalal yakal chixanav batele xchiʼuk kʼalal chinopaj xaʼox batel ta Damaskoe, te van ta oʼlol kʼakʼal, vaʼun ta anil noʼox joyobtabil likʼot ta xojobal lus ti tsots tajeke, ti te lik talel ta vinajele,
7 vaʼun liyal ta lum, laj kaʼi yechʼomal eil ti xi chalbune: ‹Saulo, Saulo, ¿kʼu yuʼun yakal chakontrainun?›.
8 Xi la jtakʼe: ‹¿Buchʼuot Kajval?›. Xi la stakʼbune: ‹Voʼon li Jnasaretal Jesuse, jaʼ li buchʼu yakal chakontraine›.
9 Jech xtok li viniketik te jchiʼuke laj yilik li luse, pe muʼyuk bu laj yaʼiik li yechʼomal eil yakal tskʼoponune.
10 Vaʼun xi laj kale: ‹¿Kʼusi skʼan ta jpas Kajval?›. Xi laj yalbun li Kajvaltike: ‹Likan, batan ta Damasko, yuʼun te cha-albat skotol li kʼusi skʼan chapase›.
11 Pe ta skoj ti mu xkil jsetʼuk osil ta skoj li xojobal lus taje, likʼot ta Damasko, yuʼun jaʼ la snitikun batel li buchʼutik te xchiʼinojikune.
12 »Vaʼun li vinik ti Ananias sbi ti lek yichʼoj ta mukʼ Dios jech kʼuchaʼal chal li Mantale xchiʼuk ti lek ch-albat skʼoplal yuʼun li judaetik ti te nakalike,
13 tal skʼelun. Vaʼun te la svaʼan sba ta jxokon, xi laj yalbune: ‹¡Saulo, ermano, jamuk yan velta li asate!›. Jech oxal ta ora noʼox la jtoy li jsate, vaʼun laj kil li Ananiase.
14 Xi laj yale: ‹Li Dios yuʼun jmoltotaktik ta voʼnee la stʼujot sventa xavojtikin li kʼusi tskʼan yoʼontone xchiʼuk xakʼel li buchʼu tukʼe xchiʼuk xachikintabe li kʼusi chlokʼ ta yee,
15 yuʼun chakʼot ta stestigo ta stojolal skotol krixchanoetik ta sventa li kʼusitik aviloj xchiʼuk li kʼusitik avaʼioje.
16 Jaʼ yuʼun, ¿kʼu yuʼun ti chajalije? Likan, ichʼo voʼ xchiʼuk tabo ta naʼel sbi sventa xapok li amule›.
17 »Pe kʼalal lisut xaʼox batel ta Jerusalen xchiʼuk kʼalal yakal ta jpas orasion ta temploe, oy kʼusi li-akʼbat kil,*
18 vaʼun laj kil ti xi chalbune: ‹Sujo aba, lokʼan batel ta anil liʼ ta Jerusalene, yuʼun mu xchʼamik li kʼusi chaval ta jtojolale›.
19 Xi laj kale: ‹Kajval, li stukike snaʼojik lek ti voʼon toʼox ta jtikʼik ta chukel xchiʼuk ta jtsitsik ta nail tsobobbailetik li buchʼutik oy xchʼunel yoʼontonik ta atojolale,
20 kʼalal yakal chichʼ malbel xchʼichʼel li Esteban ti jaʼ avajtestigoe, te vaʼalun, lek laj kil xchiʼuk la jchabibe li skʼuʼ slapoj ta sbaik li buchʼutik chmilvanike›,
21 akʼo mi jech, xi laj yalbune: ‹Batan, yuʼun ta jtakot batel ta stojolal namal jyanlumetik›».
22 Jaʼ noʼox laj yaʼiik li kʼusitik laj yichʼ alel taje. Vaʼun lik avanikuk xchiʼuk xi lik yalike: «¡Chʼaybeik skʼoplal ta balumil li vinike, altik ti chkuxie!».
23 Ta skoj ti x-avlajetik, ti tsjipulanik li skʼuʼ slapoj ta sbaike xchiʼuk ti tsvijulanik pukuk* ta toyole,
24 li komandante yuʼun soltaroetike* laj yal mantal ti akʼo yikʼik batel ta nail soltaro li Pabloe xchiʼuk laj yal ti akʼo yichʼ tsitsel kʼalal oy kʼusi chichʼ jakʼbele, yoʼ jech akʼo yichʼ naʼel lek ti kʼu yuʼun x-avlajetik ta stojolal li Pabloe.
25 Kʼalal laj xaʼox xachʼik sventa tstsitsike, li Pabloe xi laj yalbe jun bankilal soltaro* ti te vaʼale: «¿Mi lek van ti chatsitsik jun jroma vinik ti muʼyuk yichʼoj chapanel baʼyele?».
26 Vaʼun kʼalal laj yaʼi li bankilal soltaro taje, bat ta stojolal li komandante yuʼun soltaroetike, xi bat yalbe li kʼusi taje: «¿Kʼusi anopoj chapas? ¡Yuʼun jaʼ jroma vinik!».
27 Jaʼ yuʼun nopaj batel li komandante yuʼun soltaroetike, xi laj yalbee: «Albun kaʼi: ¿Mi jroma vinikot?». Xi la stakʼe: «Jaʼ».
28 Xi la stakʼ li komandante yuʼun soltaroetike: «Li voʼone jmanoj ta epal takʼin li jderecho sventa li lum taje». Xi laj yal li Pabloe: «Li voʼone oy onoʼox kuʼun kʼalal livokʼe».
29 Jaʼ yuʼun ta ora noʼox valopat sutik li viniketik ti chakʼbeik xaʼox svokol kʼalal oy kʼusi tsjakʼbeike; jech xtok xiʼ li komandante yuʼun soltaroetik kʼalal laj yaʼi ti jaʼ jroma vinike xchiʼuk ta skoj ti la xchuk ta kadenae.
30 Vaʼun li ta yokʼomale, oy ta yoʼonton tskʼan tsnaʼ lek ti kʼu yuʼun chtikʼbat smul yuʼun li judaetike, la slokʼes xchiʼuk laj yal mantal ti akʼo stsob sbaik li bankilal paleetik xchiʼuk skotol li Sanedrine.* Vaʼun laj yikʼ yalel tal li Pabloe xchiʼuk te la svaʼan ta oʼlol ti bu oyike.
Tsʼibetik ta yok vun
^ O: «li-ayan».
^ Li be taje jaʼ skʼoplal li xkuxlejal yajtsʼaklomtak Kristoe xchiʼuk li chanubtaseletike.
^ Kʼelo glosario.
^ Kʼelo glosario.
^ O: «polvo»; «tsʼubil lum»; «tan».
^ Jaʼ li buchʼu sbainoj o ti tspas ta mantal jmil soltaroe.
^ Jaʼ li buchʼu sbainoj o ti tspas ta mantal sien soltaroe.
^ Kʼelo glosario.
