Echos 23:1-35
23 Xi laj yal Pablo kʼalal tukʼ skʼeloj batel li Sanedrine: «Viniketik, ermanoetik, sak-o tajek jol koʼonton kakʼoj jba ta stojolal Dios kʼalal to li avie».
2 Vaʼun li mero bankilal pale* Ananiase laj yalbe mantal li buchʼutik te nopol vaʼalik ta stojolal ti akʼo xtʼaxbeik ta majel yee.
3 Vaʼun xi albat yuʼun li Pabloe: «Jaʼ ta xtʼaxot ta majel stuk li Diose, pakʼbal na ti bonbil ta sake. ¿Mi chotolot chachapanun jech kʼuchaʼal chal Mantal avaloje, pe ti muʼyuk chachʼun li kʼusi chal Mantal ta skoj ti chavakʼun ta majele?».
4 Xi laj yalik li buchʼutik te nopol vaʼalike: «¿Mi yuʼun chachopol kʼopoj ta stojolal li mero bankilal pale yuʼun Diose?».
5 Xi laj yal li Pabloe: «Ermanoetik, yuʼun mu jnaʼ mi jaʼ mero bankilal pale. Yuʼun xi tsʼibabile: ‹Mu xuʼ xachopol kʼopoj ta stojolal jun ajvalil ta ateklumal›».
6 Kʼalal laj yakʼ venta Pablo ti jaʼ jvokʼ jsaduseoetik xchiʼuk ti jaʼ jvokʼ jfariseoetike, xi laj yalbe li Sanedrine: «Viniketik, ermanoetik, jfariseoun, xnichʼonun jfariseo. Yakal chkichʼ chapanel ta skoj li spatobil oʼontonal ta sventa li chaʼkuxesele».
7 Ta skoj ti jech laj yale, mu jmojuk kʼusi lik snopik li jfariseoetik xchiʼuk li jsaduseoetike, vaʼun la xchʼak sba li epal krixchanoetike.
8 Yuʼun li jsaduseoetike chalik ti chʼabal la chaʼkuxesele, ti chʼabal la anjel xchiʼuk ti chʼabal la kuxlejal ti mu xvinaj ta kʼelele, yan li jfariseoetike xchʼunojik skotol li kʼusitik taje.
9 Jech oxal tsots lik kʼop, vaʼun vaʼi jayvoʼuk jchanubtasvanejetik ta Mantal ti jaʼ sviniktak jfariseoetike, tsots likik ta vulajetel, xi laj yalike: «Muʼyuk kʼusi chopol la jtabekutik li vinik liʼe; pe mi yuʼun kʼoponat yuʼun jun kuxlejal ti mu xvinaj ta kʼelel o mi yuʼun kʼoponat yuʼun jun anjele...».
10 Vaʼun kʼalal tsatsaj batel* ti mu jmojuk li kʼusi tsnopike, xiʼ li komandante yuʼun soltaroetik* mi tsjekulanik li Pabloe; jaʼ yuʼun laj yalbe mantal soltaroetik ti akʼo xyalik talel sventa xjochik lokʼel ta stojolal li krixchanoetike xchiʼuk ti akʼo yikʼik batel ta nail soltaroe.
11 Pe li ta akʼobaltik ta yokʼomale te la svaʼan sba Kajvaltik ta xokon xchiʼuk xi laj yale: «¡Tsotsuk avoʼonton! Yuʼun jech kʼuchaʼal lek tsʼakal yakal chaval batel jkʼoplal* ta Jerusalene, jaʼ jech skʼan xaval batel jkʼoplal ta Roma xtok».
12 Pe lik snop skʼopik li judaetik kʼalal sakub osile, laj yakʼ yeik ti muʼyuk la bu chveʼik xchiʼuk ti muʼyuk la kʼusi chuchʼik jaʼ to la mi la smilik li Pabloe, mi muʼyuk la bu kʼot ta pasel yuʼunike akʼo la oy kʼusi chopol* xkʼot ta pasel ta stojolalik.
13 Te van mas ta 40 ta voʼ viniketik ti jech la snop skʼopike;
14 vaʼun batik ta stojolal bankilal paleetik xchiʼuk ta stojolal moletik, xi laj yalike: «Laj xa kakʼ kekutik ta melel ti akʼo oyuk kʼusi chopol xkʼot ta pasel ta jtojolalkutik mi liveʼkutik jsetʼuk mi muʼyuk to bu jmilojkutik li Pabloe.
15 Jaʼ yuʼun li voʼoxuk xchiʼuk li Sanedrine skʼan xavalbeik li komandante yuʼun soltaroetik ti akʼo yikʼboxuk yalel tal ti chakʼan chakʼelbeik mas skʼoplal yilel li kʼusitik spasoje. Vaʼun chapalunkutik xa sventa ta jmilkutik kʼalal mu to chnopaj tale».
16 Pe laj yaʼi li yol xvix* Pablo ti yakal tsnopik kʼu yelan te tsmalaik ta mukule, vaʼun och batel li ta nail soltaroe, bat yalbe li Pabloe.
17 Jaʼ yuʼun la stak ta ikʼel jun bankilal soltaro* li Pabloe xchiʼuk xi laj yalbee: «Ikʼo batel ta stojolal komandante yuʼun soltaroetik li kerem liʼe, yuʼun oy kʼusi chalbe».
18 Jaʼ yuʼun la snit xchiʼuk laj yikʼ batel ta stojolal li komandante yuʼun soltaroetike, xi laj yale: «La stakun ta ikʼel li jchukel Pabloe xchiʼuk laj yalbun ti akʼo tal kakʼ ta atojolal li kerem liʼe, yuʼun oy kʼusi chalbot».
19 Nitat batel yuʼun li komandante yuʼun soltaroetike xchiʼuk laj yikʼ batel ti bu stuk oyike, xi la sjakʼbee: «¿Kʼusi ti chakʼan chavalbune?».
20 Xi laj yale: «Laj xa snop judaetik ti ta la xalboxuk ti akʼo xavikʼ yalel Pablo ta stojolal Sanedrin li okʼome, yuʼun la tskʼan tskʼelbeik mas skʼoplal yilel li kʼusitik spasoje.
21 Pe mu me xachʼun li kʼusitik chalike, yuʼun mas ta 40 ta voʼ sviniktakik te tsmalaik ta mukul, laj yakʼ yeik ti muʼyuk la bu chveʼik xchiʼuk ti muʼyuk la kʼusi chuchʼik jaʼ to la mi la smilike; vaʼun te xa chapalik, smalaojik ti akʼo xavakʼ permisoe».
22 Jech oxal li komandante yuʼun soltaroetike laj yakʼ batuk li kerem kʼalal xi xaʼox laj yalbee: «Mu me buchʼu xavalbe li kʼusi laj avalbune».
23 Vaʼun la stak ta ikʼel chaʼvoʼ bankilal soltaroetik xchiʼuk xi laj yalbee: «Chapanik 200 ta voʼ soltaroetik, 70 ta voʼ jkajlejetik ta kaʼ xchiʼuk 200 ta voʼ j-akʼlansaetik sventa chbatik kʼalal to ta Sesarea li ta yoxibal ora* akʼobale.
24 Chapanik kaʼetik xtok sventa xkaji batel li Pablo yoʼ lekuk chabibil xbat avuʼunik ta stojolal li ajvalil Felikse».
25 Jech xtok la stsʼiba jlik karta ti xi chale:
26 «Lek ichʼbilot ta mukʼ ajvalil Feliks, voʼon Klaudio Lisiasun: ¡Chabanukot!
27 Laj yichʼ tsakel yuʼun judaetik li vinik liʼe xchiʼuk tsmilik xaʼox, pe ta anil noʼox libat xchiʼuk jsoltarotak sventa la jkolta lokʼel, yuʼun laj kaʼi ti jaʼ jroma vinike.
28 Ta skoj ti ta jkʼan ta jnaʼ kʼu yuʼun oy smul chalike, laj kikʼbeik batel ta stojolal li Sanedrin yuʼunike.
29 Vaʼun laj kil ti tikʼbil smul ta sventa kʼusitik chal li Mantal yuʼunike, pe mi jsetʼuk oy smul ti sta-o xchame o ti xichʼ chukele.
30 Pe ta skoj ti laj kaʼi ti oy kʼusi snopoj tskʼan tspasbeik li vinike, jaʼ yuʼun ta ora noʼox ta jtakbot batel, jech xtok chkalbe mantal li jtikʼmuliletik ti akʼo te bat yalik ta atojolal kʼusi ti smule».
31 Jaʼ yuʼun laj yikʼik batel Pablo li soltaroetik jech kʼuchaʼal albatik mantale, vaʼun ta akʼobaltik laj yikʼik batel ta Antipatris.
32 Jaʼ yuʼun li ta yokʼomale stuk xa noʼox akʼat batuk Pablo xchiʼuk li jkajlejetik ta kaʼe, pe li stukike sutik batel ta nail soltaro.
33 Ochik ta Sesarea li jkajlejetik ta kaʼe xchiʼuk laj yakʼbeik karta li ajvalile, jech xtok la svaʼanik ta stojolal ajvalil li Pabloe.
34 Vaʼun la skʼel li kartae xchiʼuk la sjakʼ bu slumal, jaʼ yuʼun laj yaʼi ti te likem ta Silisiae.
35 Xi laj yale: «Mi vul li buchʼutik tstikʼik amule chkaʼibot lek li kʼusi chavale». Vaʼun laj yal mantal ti akʼo to xchabiik li ta spasob mantal ajvalil Erodese.
Tsʼibetik ta yok vun
^ Kʼelo glosario.
^ O: «batsʼej batel».
^ Jaʼ li buchʼu sbainoj o ti tspas ta mantal jmil soltaroe.
^ O: «lek tsʼakal chachol batel mantal».
^ Kʼelo glosario.
^ O: «yixlel».
^ Jaʼ li buchʼu sbainoj o ti tspas ta mantal sien soltaroe.
^ Te van ta baluneb ora ta akʼobaltik.
