Echos 24:1-27
24 Vaʼun kʼalal echʼ xaʼox voʼob kʼakʼale, yal talel li mero bankilal pale* Ananiase xchiʼuk jayvoʼuk moletik xchiʼuk jun jkʼopojel* ti jaʼ sbi Tertuloe, vaʼun lik yalbeik smul Pablo ta stojolal li ajvalile.
2 Kʼalal takat ta ikʼele, xi lik stikʼ mulil li Tertuloe:
«Jaʼ ta atojolal ti xkuxet noʼox koʼontonkutike,* xchiʼuk li kʼusitik lek kʼotem ta pasel liʼ ta balumile jaʼ ta skoj ti lek xanaʼ skʼelel li kʼusitike,
3 ajvalil Feliks, voʼot ti lek ichʼbilot ta mukʼe, kolaval tajek, yuʼun ta kʼusiuk noʼox ora xchiʼuk ta buyuk noʼox jnaʼojkutik li kʼusitik taje.
4 Pe sventa mu jchʼaykutik jal avoʼontone, ta jkʼanbot ta slekil yutsil avoʼonton ti akʼo xachikintabunkutik jlikeluke.
5 Yuʼun laj kakʼkutik venta ti tsokbe sjol krixchanoetik li vinik liʼe, xchiʼuk jaʼ tslikes ti tstoy sbaik ta stojolal ajvalil li judaetik ta spʼejel balumile xchiʼuk jaʼ jolil yuʼun li jvokʼ jnasaretal krixchanoetike.
6 Jech xtok, la sokbe skʼoplal li temploe, jaʼ yuʼun la jtsakutik.
7 *——
8 Mi laj akʼel atuke, te chavakʼ venta skotol li smul chkalkutike».
9 La stikʼ sbaik ek li judaetike, yuʼun jamal chalik ti melel la li kʼusitik taje.
10 Xi la stakʼ Pablo kʼalal la spas senya ta sjol li ajvalil ti akʼo xkʼopoje:
«Jnaʼoj ti ep xa jabil ti jaʼ jchapanvanejot yuʼun li jteklum liʼe, ta slekil koʼonton chikʼopoj sventa ta jpak jkʼoplal,
11 xuʼ xajakʼ aʼyej atuk ti oy to noʼox ta lajcheb kʼakʼal ti limuy batel ta Jerusalen sventa chkichʼ ta mukʼ li Diose;
12 pe muʼyuk yakal ta jsaʼ kʼop ta templo la staikun xchiʼuk muʼyuk bu xvochlajet kuʼun krixchanoetik ta nail tsobobbailetik o li ta sjunul jteklume.
13 Jech xtok, mu xuʼ xalboxuk ti jaʼ melel li jmul stikʼojbeikun avie.
14 Pe jamal chkalbot ta sventa li be jtamoj ti jaʼ jun achʼ relijion chalbeike, ti kʼu yelan yakalun ta spasel chʼul abtelal ta stojolal li Dios yuʼun jmoltotak ta voʼnee, jaʼ ti jchʼunoj skotol kʼusitik chal li ta Mantale xchiʼuk li kʼusitik tsʼibabil yuʼun J-alkʼopetike;
15 xchiʼuk oy spatobil koʼonton ta stojolal Dios jech kʼuchaʼal oy tajek spatobil yoʼonton li krixchanoetik liʼ eke, ti chchaʼkuxi li buchʼutik tukʼike xchiʼuk li buchʼutik muʼyuk tukʼike.
16 Ta skoj taje, ta melel kakʼojbe-o yipal sventa sakuk-o jol koʼonton* ta stojolal Dios xchiʼuk ta stojolal krixchanoetik.
17 Jaʼ yuʼun kʼalal ep xaʼox jabil echʼe, tal kakʼ matanal ta xkʼuxul oʼontonal* ta stojolal li jlumale xchiʼuk tal kakʼ matanal ta stojolal Dios.
18 Kʼalal yakalun spasel taje, sak la staikun ta templo jech kʼuchaʼal chal li Mantale, muʼyuk xitsobet xchiʼuk epal krixchanoetik xchiʼuk muʼyuk bu yakal ta jsaʼ kʼop. Pe oy te jayvoʼ judaetik ti likemik ta yosilal Asiae,
19 skʼan liʼ oyikuk ta atojolal jechuk sventa tstikʼik jmul mi yuʼun ta melel oy kʼusi chopol chilik ta jtojolale.
20 O mi moʼoje jaʼ akʼo yal stukik li buchʼutik liʼ oyike, mi yuʼun oy kʼusi chopol la stabeikun kʼalal livaʼi ta stojolal Sanedrine,
21 o mi jaʼ van ta skoj ti oy kʼusi xi jpʼel laj kal kʼalal te vaʼalun ta stojolalike: ‹¡Yakal chkichʼ chapanel ta sventa chaʼkuxesel ta atojolalik li avie!›».
22 Vaʼun ta skoj ti lek xojtikin Feliks li kʼusitik kʼotem ta pasel ta sventa li Be* taje, laj yalbe li viniketik ti jaʼ to tskʼelbe skʼoplal ta tsʼakale, xi laj yalbee: «Jaʼ to ta jnop kʼusi ta jpas ta sventa akʼopik mi yal xaʼox talel li Lisias ti jaʼ komandante yuʼun soltaroetike».
23 Vaʼun laj yalbe mantal li bankilal soltaroetik ti akʼo yichʼ chabiel lek ta chukinab li vinike, pe ti akʼo skoltaik jutuke xchiʼuk ti mu spajesbeik li yamigotak sventa ch-akʼbat li kʼusitik chtun yuʼune.
24 Kʼalal echʼ xaʼox jayib kʼakʼale tal Feliks xchiʼuk yajnil ti Drusila sbi ti jaʼ juda antse, vaʼun la stak ta ikʼel li Pabloe xchiʼuk laj yaʼibe kʼalal laj yal ta sventa li xchʼunel Kristo Jesuse.
25 Pe kʼalal lik kʼopojuk ta sventa tukʼilal li Pabloe, li pajesejbaile xchiʼuk li chapanel ti poʼot xa ta xtale, xiʼ li Felikse xchiʼuk xi laj yale: «Jaʼ lek batan to, te ta jtakot ta ikʼel yan velta mi xuʼ kuʼune».
26 Jech xtok tsmala mi ch-akʼbat takʼin yuʼun li Pabloe. Jaʼ yuʼun nopolik noʼox tstakilan ta ikʼel xchiʼuk chchiʼin ta loʼil.
27 Pe kʼalal echʼ xaʼox chib jabile, li Porsio Festoe jaʼ kom ta xkʼexol li Felikse; pe ta skoj ti tskʼan lek ch-ilat yuʼun judaetik li Felikse te tikʼil laj yikta komel ta chukel li Pabloe.
Tsʼibetik ta yok vun
^ Kʼelo glosario.
^ O: «abogado».
^ O: «pʼij noʼox koʼnkutike»; «nichim noʼox koʼontonkutike».
^ Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
^ O: «muʼyukuk-o jmul».
^ Kʼelo glosario.
^ Li be taje jaʼ skʼoplal li xkuxlejal yajtsʼaklomtak Kristoe xchiʼuk li chanubtaseletike.
