Echos 27:1-44
27 Vaʼun ta skoj ti laj yichʼ nopel ti chitakatkutik batel ta varko sventa chibatkutik ta Italiae, li Pablo xchiʼuk li yan jchukeletike laj yichʼik akʼel ta skʼob Julio ti jaʼ bankilal soltaroe,* ti jaʼ jun li ta jtsop soltaroetik yuʼun Augustoe.*
2 Limuykutik batel ta varko ti te likem talel ta Adramitio ti yuʼun xa tstots batel sventa chbat ta tiʼtiʼ nab ta yosilal Asiae, vaʼun libatkutik li ta varkoe; te xchiʼinojunkutik batel li Aristarko ti jaʼ jmasedonia vinik ti te likem ta Tesalonikae.
3 Likʼotkutik ta Sidon li ta yokʼomale, li Julioe ta slekil yoʼonton la xkʼuxubin li Pabloe xchiʼuk laj yakʼ batuk ti bu oy yamigotak sventa chkʼelate.
4 Laje te li-ochkutik batel ta varko sventa chibatkutik ta stsʼel Chipre sventa te ta jnakʼ jbakutik, yuʼun tsnetʼunkutik sutel li ikʼe;
5 vaʼun la jtuchʼkutik batel yutil nab ta Silisia xchiʼuk ta Panfilia, vaʼun te likʼotkutik ta kotleb varko ta Mira ta Lisia.
6 Jech oxal li bankilal soltaroe te la sta jkot varko ti likem talel ta Alejandria ti chbat ta Italiae, laj yakʼ muykunkutik.
7 Kʼalal oy xaʼox jayib kʼakʼal kʼunkʼun libatkutik ta varko xchiʼuk ti vokol likʼotkutik ta Knido ta skoj ti chujunkutik tajek li ikʼe, libatkutik ta stsʼel Kreta ti bu nopol yiloj Salmon sventa te ta jnakʼ jbakutike,
8 pe vokol laj kaʼikutik kʼalal li-echʼkutik batel ta tiʼtiʼ nabe, vaʼun likʼotkutik ti bu Alakʼ sba* Kotleb Varko sbie, ti te nopol xil li jteklum Laseae.
9 Jal xaʼox jelav, jaʼ yuʼun toj xibal xa sba li xanbal ta varkoe, xchiʼuk echʼem xaʼox xtok li spasel ayuno* ta Skʼakʼalil chʼayob mulile,* jaʼ yuʼun xi pʼijubtasvan li Pabloe:
10 «Viniketik, chkile chkil jvokoltik li ta xanbale xchiʼuk oy kʼusi ep chlaj kuʼuntik, yuʼun maʼuk noʼox chlaj li varko xchiʼuk li yikatse, yuʼun te tsakal jkʼoplaltik ek».
11 Pe muʼyuk bu la stsak ta venta kʼusi yakal chal Pablo li bankilal soltaroe, jaʼ la stsak ta venta li kʼusi chal li jtsʼotvarko xchiʼuk li yajval varkoe.
12 Vaʼun ta skoj ti muʼyuk lek li kotleb varko sventa te ch-echʼ kuʼunkutik inviernoe, ep laj yalik ti akʼo xi-ochkutik batel ta varko sventa jkʼelkutik mi xuʼ ti te x-echʼ kuʼunkutik ta Fenise li inviernoe, taje jaʼ jun kotleb varko ta Kreta ti skʼeloj batel noreste xchiʼuk surestee.
13 Kʼalal lik talel kʼunil ikʼ ta sure, la snopik ti xuʼ xkʼotik ti bu tskʼan chbatike, jaʼ yuʼun la skil muyel li s-anklaike, vaʼun lik batikuk ta tiʼtiʼ nab ta Kreta.
14 Ta jlikel noʼoxe tal tsatsal ikʼ ti Euroakilon sbie, tsots kʼot ta Kreta.
15 Vaʼun tsots majat li varkoe, muʼyuk bu kuch yuʼun li ikʼe, jaʼ yuʼun kʼalal laj kilkutik ti mu xa xuʼ kuʼunkutike laj kakʼ akʼo xujunkutik batel li ikʼe.
16 Laje libatkutik ta lum joyol ta nab ti Kauda sbi sventa te ta jnakʼ jbakutike, xchiʼuk kʼajomal xa tsak kuʼunkutik li kanova ti te oy ta chak varko ti yichʼoj talel li varkoe.
17 Kʼalal laj xaʼox jchechkutik muyele, oy kʼusi la stunesik sventa chpechʼbeik xchʼut li varkoe; ta skoj ti xiʼik mi te matsʼal chkʼot li ta jiʼtik* ta tiʼ nab ta Libiae la syalesik li pokʼe, vaʼun jech lixujatkutik batel ta ikʼ.
18 Ta skoj ti tsyukʼilanunkutik tajek li ikʼaloʼe, la xyochbeik yikats varko li ta yokʼomale;
19 xchiʼuk li ta yoxibal kʼakʼale ta skʼob xa stukik la sjipik yalel li yabtejebtak varkoe.
20 Kʼalal jal muʼyuk bu vinaj li Kʼakʼal xchiʼuk li kʼanaletike xchiʼuk ti la smajunkutik li tsatsal ikʼaloʼe, la jnopkutik ti mu xa bu chikolkutik-oe.
21 Kʼalal jalij xaʼox tajek ti muʼyuk xveʼike, vaʼi ta oʼlol li Pabloe xchiʼuk xi laj yale: «Viniketik, la achʼunik jechuk kʼalal la jpʼijubtasoxuke, muʼyuk la-ochik talel ta varko jechuk li ta Kretae xchiʼuk muʼyuk bu la jkil jvokoltik xchiʼuk muʼyuk bu xchʼay li kʼusitik jechuke.
22 Pe li avie chkalboxuk ti kuxetuk avoʼontonike,* yuʼun muʼyuk buchʼu chcham junukal avuʼunik, jaʼ noʼox chlaj li varkoe.
23 Yuʼun li ta akʼobal naxe, li Dios ti jaʼ yuʼunune xchiʼuk ti ta jpas chʼul abtelal ta stojolale, la stak talel jun yaj-anjel
24 xchiʼuk xi laj yale: ‹Mu me xaxiʼ Pablo, yuʼun persa onoʼox chbat avaʼan aba ta stojolal Sesar,* xchiʼuk ¡kʼelo avil!, li Diose tskolta skotol li buchʼutik te achiʼuk ta varkoe›.
25 Jaʼ yuʼun viniketik, kuxetuk avoʼontonik, yuʼun jchʼunojbe Dios ti jaʼ jech tajek chkʼot ta pasel jech kʼuchaʼal laj kichʼ albele.
26 Pe jaʼ noʼoxe persa te matsʼal chkʼot li jvarkotik ta jun lum joyol ta nabe».
27 Vaʼun kʼalal oy xa ta xchanlajunebal akʼobal ti jecheʼ te xital xibatkutik ta nab ta Adriae, li ta oʼlol akʼobale li j-abteletik ta varkoe lik yakʼik venta ti chnopajik xa ta jun balumile.
28 Jaʼ yuʼun lik spʼisik kʼu snatil li nabe, vaʼun jtob ta jov* snatil la staik; jaʼ yuʼun libatkutik to kʼuk snatil xchiʼuk lik spʼisik yan velta, vaʼun voʼlajunjov xa snatil la staik.
29 Ta skoj ti chiʼik mi oy bu matsʼal xikʼotkutik ta tontike, la sjipik yalel chanib ankla ti te oy ta chak varkoe xchiʼuk tskʼanik xa tajek ti akʼo sakubuk osile.
30 Pe kʼalal lik snop chjatavik li j-abteletik ta varko xchiʼuk ti tskʼan tsyalesik li kanova ta nab sventa noʼox chloʼlavanik ti chbat la syalesik yilel li yan anklaetik ti te oy ta sjol li varkoe,
31 xi laj yalbe bankilal soltaro xchiʼuk soltaroetik li Pabloe: «Mi muʼyuk bu chkomik ta varko li viniketik liʼe, mu xakolik li voʼoxuke».
32 Vaʼun la xtuchʼbeik yakʼiltak kanova li soltaroetike, jech te pʼaj yalel yuʼunik.
33 Vaʼun kʼalal jutuk xa skʼan sakub osile, li Pabloe lik yalbe skotolik ti akʼo veʼikuke, xi laj yale: «Avie oy xa ta xchanlajunebal kʼakʼal ti liʼ noʼox amalaojik tajek mi oy kʼusi chkʼot ta pasele, jech xtok muʼyuk bu veʼemoxuk jutebuk.
34 Jaʼ yuʼun chkalboxuk ti xaveʼik jutebuk sventa lekuk oyoxuke, yuʼun muʼyuk buchʼu ta xchʼay jpʼejuk stsotsil sjol avuʼunik».
35 La stsak jun pan* kʼalal laj xaʼox yal taje, te skʼelojik la stojbe ta vokol Dios, vaʼun la svokʼ* xchiʼuk lik sveʼ.
36 Xkuxet likel yoʼonton skotolik, jaʼ yuʼun lik veʼikuk ek.
37 Oyunkutik 276 ta voʼ ta jkotolkutik li ta varkoe.
38 Vaʼun lik xyochbeik yikats varko kʼalal noj xaʼox xchʼutik ta veʼele, la stenik yalel ta nab li trigoe.
39 Mu xojtikinik bu balumilal oyik kʼalal sakub osile, pe la staik ta kʼelel jun kʼob nab ti jiʼtik stiʼile, vaʼun la snop te chbat xchiʼuk svarkoik mi xuʼ yuʼunike.
40 Jaʼ yuʼun pʼaj yalel yuʼunik ta nab li ankla kʼalal la xtuchʼbeik li yakʼiltake xchiʼuk la xyochbeik xtok li xchukobiltak smajobil voʼ yuʼun li varkoe, vaʼun kʼalal laj xaʼox smuyesik li bikʼit pokʼe, jaʼ koltaatik batel sventa chkʼotik ta tiʼ nab.
41 Kʼalal te kʼotik ta jiʼtik ti te tokol ta yut nabe, te matsʼal kʼot li varkoe, vaʼun pajkʼuj yalel li sjole, te matsʼal kom-o, vaʼun lik vokʼuk li chak varko ta skoj ti xyukʼlajet tajek li nabe.
42 Li kʼusi kʼot ta nopel yuʼunik li soltaroetike jaʼ ti tsmilik skotol li jchukeletik yoʼ mu ta nuxuk xjatavik lokʼele.
43 Pe oy ta yoʼonton akʼo xkol Pablo li bankilal soltaroe, jaʼ yuʼun la spajes li kʼusi tskʼan tspasike. Xchiʼuk laj yal mantal ti akʼo sjip sbaik yalel ta nab ti buchʼutik xtojobik ta nuxe, sventa xkʼotik baʼyel ta tiʼ nab,
44 ti te la chtalik li yantik eke, akʼo la kajiikuk batel ta tenelteʼ o akʼo la stunesik li sjepelul varkoe. Jech oxal kuxul kʼot skotolik ta tiʼ nab.
Tsʼibetik ta yok vun
^ Jaʼ li buchʼu sbainoj o ti tspas ta mantal sien soltaroe.
^ Taje jaʼ jech chichʼ albel jun ajvalil, maʼuk sbi jun krixchano.
^ O: «Lek lek sba».
^ O: «yiktael veʼel»; «yiktael ixim»; «yiktael vaj»; «xtuchʼel chʼutil». Kʼelo glosario.
^ Kʼelo glosario.
^ O: «yiʼtik».
^ O: «pʼijuk avoʼnike»; «nichimuk avoʼontonike».
^ Kʼelo glosario.
^ Kʼelo glosario.
^ Kʼelo glosario.
^ O: «la xetʼ»; «la xut».
