Echos 28:1-31
28 Vaʼun kʼalal kuxul likʼotkutike, laj kaʼikutik ti Malta sbi li lum joyol ta nabe.
2 Vaʼun li krixchanoetik ti ta yan-o kʼop chkʼopojike* ep tajek laj yakʼik ta ilel slekil yoʼontonik. Jaʼ yuʼun la stsanik kʼokʼ xchiʼuk ta slekil yoʼontonik lek la xchʼamunkutik ta skoj ti yakal chakʼ voʼ xchiʼuk ti oy sike.
3 Pe kʼalal la stsob jkʼech vachʼ li Pablo xchiʼuk kʼalal la stikʼ ta kʼokʼe, lokʼ jkot veneno chon* ta skoj li xkʼixnal kʼokʼe, vaʼun tibat skʼob xchiʼuk te jokʼol kom.
4 Kʼalal laj yakʼik venta ti te jokʼol jkot chon ta skʼob Pablo li krixchanoetik ti yan-o kʼop chkʼopojike, xi lik yalbe sbaik ta jujuntale: «Jaʼ jmilvanej ta melel li vinike, akʼo mi kuxul lokʼ talel li ta nabe, muʼyuk bu ch-akʼat kuxiuk yuʼun li Tukʼilale».
5 Vaʼun la slilin ta kʼokʼ li chone xchiʼuk muʼyuk kʼusi pasbat.
6 Pe la smalaik mi tsitub o mi chcham ta ora. Kʼalal jal xaʼox tajek la smalaik xchiʼuk ti muʼyuk kʼusi chopol kʼot ta pasele, la sjel li kʼusi tsnopike, jech oxal lik yalik ti jaʼ jun diose.
7 Vaʼun ti bu oyunkutike, oy te nopol yosiltak li vinik mas tsots skʼoplal li ta lum joyol ta nabe, Publio sbi; jaʼ yuʼun lek la xchʼamunkutik xchiʼuk laj yakʼ vaykunkutik oxib kʼakʼal ta sna.
8 Te puchʼul* ta tem li stot Publioe, yuʼun ip ta kʼokʼ xchiʼuk tsakbil ta simnakʼal,* vaʼun och batel Pablo ti bu oye xchiʼuk la spas orasion, la skajan skʼob ta stojolal, vaʼun la xpoxta.
9 Kʼalal kʼot xaʼox ta pasel taje, li yan jnaklejetik li ta lum joyol ta nab ti ipik eke, tal skʼelik xchiʼuk laj yichʼik poxtael ek.
10 Laj yichʼunkutik ta mukʼ kʼalal laj yichʼik talel ep matanaletike, jech xtok, laj yakʼbunkutik li kʼusitik chtun kuʼunkutik kʼalal chibatkutik xaʼox ta varkoe.
11 Kʼalal echʼ xaʼox oxib ue, limuykutik ta jkot varko ti te slokʼol «Xnichʼnab Seus» ta sjole. Likem talel ta Alejandria li varko taje xchiʼuk te echʼ yuʼunik yorail siktik li ta lum joyol ta nabe.
12 Te lipajkutik oxib kʼakʼal kʼalal likʼotkutik ta kotleb varko ta Sirakusae,
13 jaʼ te ti bu li-echʼkutik ta stiʼiltake, vaʼun likʼotkutik ta Rejio. Li ta yokʼomale lik talel ikʼ ta sur, li ta xchibal kʼakʼale likʼotkutik ta Puteoli.
14 Te la jtakutik ermanoetik xchiʼuk la skʼanbunkutik vokol ti akʼo jchiʼinkutik vukubuk kʼakʼale; vaʼun jaʼ jech libatkutik ta Roma.
15 Kʼalal laj yaʼi li ermanoetik ti te oyunkutike, tal snupunkutik ta be ta Chʼivit Apio xchiʼuk ta Oxib Na.* Kʼalal la sta ta ilel ermanoetik li Pabloe, la stojbe ta vokol Dios xchiʼuk tsatsub-o yoʼonton.
16 Vaʼun kʼalal li-ochkutik ta Romae, jaʼ xa noʼox chabiat yuʼun jun soltaro ti bu chvay li Pabloe.
17 Vaʼun kʼalal echʼ xaʼox oxib kʼakʼale, la stak ta ikʼel viniketik li Pabloe, jaʼ li buchʼutik tsots skʼoplalik ta stojolal judaetike. Xi laj yalbe kʼalal tsobolik xaʼoxe: «Viniketik, ermanoetik, akʼo mi muʼyuk yan-o kʼusi la jpasbe li jteklume xchiʼuk li kʼusi nopem xaʼiik spasel li jtot jmeʼtike, laj kichʼ akʼel kʼuchaʼal jun jchukel ta skʼob jromaetik ta Jerusalen.
18 Kʼalal la skʼelik lek kʼusitik jpasoj li buchʼutik taje, oy ox ta yoʼontonik tskoltaikun, yuʼun muʼyuk jsetʼuk jmul ti jta-o xkichʼ milele.
19 Pe ta skoj ti muʼyuk lek laj yaʼiik li judaetike, jaʼ yuʼun la jkʼan chapanel ta stojolal Sesar,* pe maʼuk sventa ta jtikʼbe jtosuk smul li jlumale.
20 Jaʼ yuʼun jaʼ ta skoj ti la jtakoxuk ta ikʼel sventa ta jkʼoponoxuke, yuʼun jaʼ ta skoj li spatobil yoʼonton Israel ti jech kichʼoj chukel ta kadenae».
21 Xi laj yalbeike: «Muʼyuk bu kichʼojkutik jlikuk karta ti likem tal ta Judeae, jech xtok mu jpʼeluk kʼusi chopol yalojik ta atojolal li ermanoetik ti te likemik talele.
22 Pe lek onoʼox mi chkaʼikutik ta ave atuk li kʼusi chanope, yuʼun ta melel, jnaʼojkutik ti chopol chichʼ albel skʼoplal ta buyuk noʼox li achʼ relijion taje».
23 Vaʼun la sabeik skʼakʼalil sventa tstsob sbaik junuk kʼakʼal, jech oxal ep tajek talik ti bu chvaye. Jaʼ yuʼun lik yalbe smelolal, lek tsʼakal lik yalbe skʼoplal* Ajvalilal yuʼun Dios yoʼ chakʼbe xchʼunik ta sventa li Jesuse, la stunes li Smantal Moises xchiʼuk li kʼusi yaloj J-alkʼopetike, tslikes ta sob kʼalal to ta bat kʼakʼal.
24 Li jlome la xchʼunik li kʼusitik laj yale; pe li jlome muʼyuk.
25 Jaʼ yuʼun ta skoj ti jelel kʼusi tsnopike, xi xa noʼox laj yal Pablo kʼalal yakal xaʼox chbatike:
«Laj yalbe xa onoʼox skʼoplal atot ameʼik ta stojolal Isaias li chʼul espiritue,
26 xi laj yale: ‹Batan li ta jteklum liʼe xchiʼuk xi xavalbee: «Chavaʼiik, pe muʼyuk bu chavaʼibeik smelolal, chakʼelik, pe mu xavilbeik smelolal.
27 Yuʼun tsatsubem xa yoʼonton li jteklum liʼe, li kʼusi chaʼiike mu xchʼunik; yalel smakoj xchikinik xchiʼuk smakoj satik sventa mu kʼusi xilik-o batel li ta satike xchiʼuk ti mu kʼusi xaʼiik li ta xchikinike, xchiʼuk mi jaʼuk xaʼibeik smelolal ta yoʼontonik, jech oxal mu sutik tal ta jtojolal sventa jpoxtaik»›.
28 Jaʼ yuʼun naʼik ti pojelal chakʼ Dios liʼe, laj xa yichʼ takel batel ta stojolal jyanlumetik; li stukike chchikintaik».
29 *——
30 Jaʼ yuʼun te kom chib jabil li ta na bu tslokʼe* xchiʼuk te chchʼam ta slekil yoʼonton skotol li buchʼu chkʼotik ta vulaʼale,
31 chalbe skʼoplal Ajvalilal yuʼun Dios xchiʼuk lek jamal chalbe skʼoplal ta sventa li Kajvaltik Jesukristo kʼalal chchanubtasvane, muʼyuk kʼusi chmakat.
Tsʼibetik ta yok vun
^ O: «ti te noʼox nakajtike».
^ O: «kiletel chon».
^ O: «metsel»; «mochol»; «taʼal».
^ O: «tsakbil ta chʼichʼ».
^ S.gr.: «Oxib Taverna».
^ Kʼelo glosario.
^ O: «lek tsʼakal lik xchol mantal».
^ Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
^ O: «ti bu chchʼamune».
