Echos 3:1-26
3 Oy jun kʼakʼal ti yakal chmuyik batel ta templo li Pedro xchiʼuk Juane, ti jaʼo yorail chichʼ pasel orasion li ta sbalunebal orae,*
2 te ch-ikʼat batel jun vinik ti koxo onoʼox vokʼeme.* Te chakʼik skotol kʼakʼal ta stsʼel stiʼ templo ti Kʼupil sba sbie, sventa tskʼanbe matanal ta xkʼuxul oʼontonal* li buchʼutik te ch-ochik ta temploe.
3 Kʼalal la sta ta kʼelel Pedro xchiʼuk Juan ti jutuk xa skʼan x-ochik batel ta temploe, lik skʼan matanal ta xkʼuxul oʼontonal.
4 Pe li Pedro xchiʼuk Juane la skʼelik lek xchiʼuk xi laj yalbeike: «Kʼelunkutik».
5 Jech oxal kʼelatik lek yuʼun li koxoe, yuʼun tsmala mi oy kʼusi ch-akʼbat.
6 Pe xi laj yal li Pedroe: «Muʼyuk jplata mi jaʼuk j-oro, pe chkakʼbot li kʼusi oy kuʼune: ¡Ta sbi Jnasaretal Jesukristo, xanavan!».
7 Vaʼun la stsakbe sbatsʼikʼob xchiʼuk la snit likel. Ta anil noʼox tsatsub li yoke xchiʼuk li sat yoke;
8 laj une xpʼitluj to likel xchiʼuk lik xanavuk. Vaʼun koʼol xa ochik batel li ta temploe, chanav batel, xpʼitomaj noʼox batel xchiʼuk tskʼupil kʼopta Dios.
9 Te une, ilat yuʼun skotol krixchanoetik ti yakal chanav xchiʼuk ti tskʼupil kʼopta Diose.
10 Vaʼune lik yojtikinik ti jaʼ li vinik ti te onoʼox xchotet tskʼan matanal ta xkʼuxul oʼontonal li ta Kʼupil sba Tiʼ na ta temploe, labal sba tajek laj yilik xchiʼuk chʼayal to kʼot yoʼontonik ta skoj li kʼusi kʼot ta pasele.
11 Kʼalal te stsakoj Pedro xchiʼuk Juan li vinike, mu xa snaʼ kʼusi tspasik li krixchanoetik ta skoj ti xmuyubajik ta jyalele*, vaʼun anil batik ti bu sbiinoj Kotkot na yuʼun Salomon* ti oy jaychol yoyale.
12 Kʼalal laj yil Pedro taje, xi laj yalbe li jteklume: «Viniketik ta Israel, ¿kʼu yuʼun ti labal sba tajek chavaʼiik leʼe? Xchiʼuk ¿kʼu yuʼun ti solel chakʼelunkutike, ti xkoʼolaj kʼuchaʼal ta juʼel noʼox jtukkutik yilel o jaʼ ta skoj ti ta sjunul koʼonton chitunkutik ta stojolal Dios ti lik xanavuke?
13 Li Dios yuʼun Abraan, Isaak xchiʼuk Jakob* ti jaʼ Dios yuʼun li jmoltotaktik ta voʼnee, la stoybe skʼoplal li Yajtunel ti jaʼ Jesus ti laj avakʼik ta kʼabal xchiʼuk ti la apʼajik ta stojolal Pilato akʼo mi tskʼan ox tskolta lokʼel li stuke.
14 Jech, li voʼoxuke la apʼajik li buchʼu chʼul* xchiʼuk tukʼe, jaʼ la akʼanik vokol ti jaʼ akʼo xavichʼik koltabel lokʼel li jun jmilvanej vinike,
15 pe jaʼ laj avakʼik ta milel li Bankilal Jbeiltasvanej* sventa kuxlejale. Pe li Diose la xchaʼkuxes, laj kilkutik ti jech kʼot ta pasele.
16 Jaʼ yuʼun chaʼa, ta sventa li sbie xchiʼuk li xchʼunel koʼontonkutik ta sbie, kolem xa li vinik liʼ akʼelojike xchiʼuk ti xavojtikinike. Li xchʼunel oʼontonal ta stojolal Jesuse jaʼ ta skoj ti kolem xa lek li vinik liʼ akʼelojike.
17 Li avie kermanotak, jnaʼoj ti jaʼ ta skoj ti mu xanabeik smelolal ti jech la apasike, jech kʼuchaʼal la spasik li ajvaliletik avuʼunik eke.
18 Pe jaʼ jech laj yakʼ kʼotuk ta pasel Dios li kʼusi yaloj xa onoʼox ta ye skotol li j-alkʼopetike, ti chil svokol li Skristoe.
19 »Jaʼ yuʼun, suteso avoʼontonik xchiʼuk sutanik tal sventa xichʼ tupʼel li amulike, sventa chkʼot yorail li siketel oʼontonal ti te chlik talel ta stojolal Jeovae
20 xchiʼuk sventa tstakboxuk tal li Kristo ti jaʼ vaʼanbil ta atojolalike, ti jaʼ li Jesuse.
21 Li stuke skʼan te xkom ta vinajel jaʼ to mi la sta yorail chchaʼta yav skotol li kʼusitik yaloj xa onoʼox Dios ta ye li chʼul j-alkʼopetik yuʼun ta voʼnee.
22 Yuʼun xi onoʼox yaloj li Moisese: ‹Li Jeova Adiosike tsvaʼanboxuk jun j-alkʼop ti te chlokʼ ta stojolal avermanotakik ti xkoʼolaj kʼuchaʼal voʼone. Skʼan me xachikintabeik skotol li kʼusitik chalboxuke.
23 Ta melel, buchʼuuk noʼox ti mu xchikintabe li J-alkʼop taje, chichʼ lajesel yuʼun Dios›.
24 Jech onoʼox, skotol li j-alkʼopetik ti lik tal ta skʼakʼalil Samuel kʼalal to ta yantik j-alkʼopetik ti tsʼakal to talike, yalojik onoʼox ta jamal ti jech chkʼot ta pasel li kʼusitik avie.
25 Li voʼoxuke jaʼ xnichʼnaboxuk j-alkʼopetik xchiʼuk voʼoxuk chatabeik sbalil li kʼusi albil skʼoplal ta trato* la spas Dios xchiʼuk amoltotakik ta voʼnee, xi albat li Abraane: ‹Ta stojolal anitilulal* chichʼik bendision skotol li utsʼ alaliletik ta balumile›.
26 Kʼalal la stoy likel Yajtunel li Diose, la stakboxuk batel baʼyel ta atojolalik sventa chakʼboxuk bendision kʼalal ta xchʼakoxuk lokʼel li ta kʼusitik chopol chapasik ta jujuntale».
Tsʼibetik ta yok vun
^ Te van ta oxib ora ta bat kʼakʼal.
^ O: «ayaneme».
^ Kʼelo glosario.
^ O: «echʼem pʼij yoʼnik»; «nichim noʼox yoʼontonik».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «amomnichʼon»; «atsʼunbal»; «atsʼakalul».
