Echos 4:1-37
4 Vaʼun chaʼa, kʼalal jaʼo yakal chchiʼinik ta loʼil jteklum li chaʼvoʼike, te kʼot ta stojolalik li paleetike,* li bankilal yuʼun jchabivanejetik ta temploe xchiʼuk li jsaduseoetike.*
2 Ch-ilinik ta skoj ti yakal chchanubtasik jteklum li jtakboletike xchiʼuk ti jamal yakal chalik ti laj yichʼ chaʼkuxesel li Jesuse.
3 Vaʼun laj yichʼik tsakel xchiʼuk tikʼatik ta chukel kʼalal to ta yokʼomal, yuʼun ch-och xaʼox akʼobal.
4 Akʼo mi jech, li buchʼutik laj yaʼiik li mantale ep buchʼutik la xchʼunik, te van voʼmil yepal li viniketike.
5 Li ta yokʼomale la stsob sbaik ta Jerusalen li ajvaliletik yuʼunike, li moletike* xchiʼuk li jchanubtasvanejetik ta Mantale,*
6 te oy ek li Anas ti jaʼ bankilal palee,* li Kaifase, li Juane, li Alejandroe xchiʼuk skotol li buchʼutik jaʼ yutsʼ yalal li bankilal palee.
7 Vaʼun vaʼanatik ta oʼlol li Pedro xchiʼuk Juane, xi lik jakʼbatikuke: «¿Buchʼu ta sjuʼel o buchʼu ta sbi ti jech la apasike?».
8 Vaʼun li Pedro ti ventainbil yuʼun chʼul espiritue, xi la stakʼe:
«Ajvaliletik ta jteklum xchiʼuk moletik,
9 mi chajakʼbunkutik avi ta skoj ti oy kʼusi lek la jpasbekutik jun vinik ti ipe xchiʼuk ti chakʼan chanaʼik buchʼu la xpoxta li vinik liʼe,
10 naʼik me akotolik xchiʼuk skotol steklumal Israel ti jaʼ ta sbi Jesukristo li Jnasaretal vinike,* ti la amilik ta jtel teʼe pe ti chaʼkuxesat yuʼun Diose, jaʼ ta skoj ti liʼ vaʼal ta atojolalik li vinik ti poxtajem xae.
11 Taje jaʼ ‹li ton ti muʼyuk sbalil laj avilik voʼoxuk li jvaʼanej naoxuke, li ton* taje jaʼ li bu kʼotem ta chikin na ti mas tsots skʼoplale›.
12 Jech xtok, muʼyuk bu yan chichʼ tael kolebal, yuʼun chʼabal yan biil ta balumil ti akʼbil tal ta stojolal krixchanoetik ti xuʼ xijkol yuʼune».
13 Pe kʼalal laj yilik ti lek jamal snaʼ xkʼopojik* li Pedro xchiʼuk Juane, ti laj yakʼik venta ti jaʼ viniketik ti muʼyuk chanunajemik* xchiʼuk ti jaʼik noʼox kʼuchaʼal yan krixchanoetike, toj labal sba laj yaʼiik. Jech oxal laj yakʼik venta ti jaʼik li buchʼutik chchiʼinik toʼox li Jesuse.
14 Kʼalal te skʼelojik li vinik ti laj yichʼ poxtaele, ti te vaʼal xchiʼuk li Pedro xchiʼuk Juane, mu xa snaʼ kʼusi tstakʼik.
15 Jaʼ yuʼun takatik lokʼel ti bu tstsob sbaik li Sanedrine,* vaʼun oy kʼusi lik sjakʼilanbe sbaik,
16 xi laj yalike: «¿Kʼusi ta jpasbetik li viniketik liʼe? Yuʼun lek xvinaj ta melel li senyail laj yakʼik ta ilele, jun senyail ti laj yilik li jnaklejetik ta Jerusalene, jaʼ yuʼun mu xuʼ xkaltik ti muʼyuk bu jech kʼotem ta pasele.
17 Sventa mu xpuk batel mas skʼoplal li ta jteklume, tsots jsibtastik xchiʼuk kalbetik ti akʼo mu xa buchʼu xalbeik skʼoplal li biil taje».
18 Vaʼun takatik ta ikʼel xchiʼuk albatik mantal ti mu me kʼusi xalik jsetʼuk xchiʼuk ti mu me xchanubtasvanik ta sventa li sbi Jesuse.
19 Pe xi la stakʼ li Pedro xchiʼuk Juane: «Mi tukʼ chil Dios ti jaʼ ta jchikintakutik li kʼusi chavalike ti jaʼ muʼyuk ta jchikintabekutik li Diose, voʼot xanaʼ atukik.
20 Pe li voʼonkutike mu xuʼ xkikta jbakutik ta yalel li kʼusi kilojkutik xchiʼuk li kʼusi kaʼiojkutike».
21 Jech oxal chaʼa, kʼalal tsots xaʼox sibtasatik yan veltae, koltaatik batel, yuʼun muʼyuk bu la stabeik srasonal sventa chakʼbeik kastigo xchiʼuk ta skoj ti chiʼtaik li jteklume, yuʼun yakal tskʼupil kʼoptaik Dios skotolik ta skoj li kʼusi kʼot ta pasele.
22 Yuʼun mas xa ta 40 sjabilal li vinik ti kʼot ta pasel ta stojolal li skʼelobil juʼelale,* li vinik taje jaʼ ti laj yichʼ poxtaele.
23 Kʼalal laj xaʼox yichʼik koltael lokʼele, batik ta stojolal li xchiʼiltakike xchiʼuk laj yalbeik li kʼusi albatik yuʼun li bankilal paleetik xchiʼuk li moletike.
24 Kʼalal laj yaʼiik taje, koʼol yoʼontonik la spasik orasion ta stojolal Dios xchiʼuk xi laj yalike:
«Mukʼul Jpasmantal, voʼot ti Buchʼu la apas li vinajele, li balumile, li nabe xchiʼuk skotol li kʼusitik te oye,
25 xchiʼuk ta stojolal chʼul espiritu xi laj aval ta ye jmoltotkutik David ti jaʼ avajtunele: ‹¿Kʼu yuʼun xvochlajetik li yan jteklumetike? ¿Kʼu yuʼun muʼyuk sbalil li kʼusi tsnop krixchanoetike?
26 La stsob sbaik li ajvaliletik ta balumile, xchiʼuk la spas ta jmoj skʼopik li buchʼutik tsots yabtelik sventa tskontrainik li Jeovae xchiʼuk li buchʼu stʼujoje›.*
27 Yuʼun ta melel li Erodese,* li Ponsio Pilatoe, li jyanlum krixchanoetike xchiʼuk li j-israeletike, laj yichʼik tsobel liʼ ta jteklume sventa tskontrainik li avajtunel Jesus ti chʼule, jaʼ li buchʼu la atʼuje,*
28 jaʼ yuʼun la stsob sbaik sventa tspasik li kʼusi onoʼox avaloje. Jaʼ jech kʼot ta pasel li kʼusitik taje, yuʼun oy ajuʼel xchiʼuk jaʼ jech oy ta avoʼonton.
29 Li avie Jeova, tsako ta venta ti tsibtasvanike xchiʼuk koltao sventa oyuk stsatsal yoʼontonik xalik batel akʼop li amosotake,
30 yoʼ to chayeʼ akʼob sventa chapoxtavan xchiʼuk yoʼ to chkʼot ta pasel li senyailtake xchiʼuk li kʼusitik labal sba ta sventa sbi li avajtunel Jesus ti chʼule».
31 Kʼalal laj xaʼox skʼanik vokole,* nik* li bu stsoboj sbaike, vaʼun ventainbil kʼot skotolik yuʼun li chʼul espiritue xchiʼuk tsots yoʼonton chalik batel li skʼop Diose.
32 Jech xtok, li epal krixchanoetik ti la xchʼunike koʼol yoʼontonik xchiʼuk koʼol snopbenik, jech xtok mi junuk buchʼu laj yal ti jaʼ yuʼun stuk li kʼusi oy yuʼune, moʼoj, ta komon yuʼunik skotol li kʼusitike.
33 Jech xtok, ta tsatsal juʼelal laj yalik-o batel li xchaʼkuxesel Kajvaltik Jesus li jtakboletike xchiʼuk toj ep akʼbatik slekil yutsil oʼontonal.*
34 Ta melel, muʼyuk buchʼu junukal abol sba yuʼunik, yuʼun skotol li buchʼutik oy yosilik o snaike la xchonik, vaʼun chichʼik tal ti kʼu yepal stojole,
35 te chkʼot yakʼik ta yok skʼob li jtakboletike. Vaʼun te chichʼik pukbel ta jujuntal ti kʼu yepal chtun yuʼunike.
36 Jech oxal li Josee, ti Bernabe yan sbi yuʼun li jtakboletike (ti xi smelolal kʼalal chichʼ jelubtasele: «Xnichʼon Jpat-oʼontonal»), ti jaʼ jlevi* vinik, ti vokʼem* ta Chipree,
37 oy jsep yosil, la xchon, vaʼun laj yichʼbe tal li stojole xchiʼuk laj yakʼbe ta yok skʼob li jtakboletike.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «tsots yoʼontonik».
^ O: «ti jutuk noʼox chanunajemike», jaʼ xkaltik, ti muʼyuk chanunajemik li ta chanob vun yuʼun jrabietike; maʼuk skʼan xal ti mu snaʼik skʼelel o stsʼibael vune.
^ Kʼelo glosario.
^ O: «senyaile».
^ O: «Skristo».
^ Kʼelo glosario.
^ Kʼelo glosario.
^ O: «spasik orasion ta sjunul yoʼontonike».
^ O: «bakʼ».
^ Kʼelo glosario.
^ Kʼelo glosario.
^ O: «ayanem».
