Echos 6:1-15
6 Vaʼun chaʼa, li vaʼ kʼakʼale kʼalal yakal ch-epaj li jchankʼopetike, li judaetik ti chkʼopojik ta griegoe* lik bikʼtal kʼopojikuk ta stojolal li judaetik ti chkʼopojik ta evreoe,* yuʼun muʼyuk bu ichʼbilik ta venta li meʼon antsetik yuʼunik ta sventa li kʼusi chichʼ pukel jujun kʼakʼale.
2 Jaʼ yuʼun li lajchaʼvoʼike la stakik ta ikʼel skotol li jchankʼopetike xchiʼuk xi laj yalbeike: «Muʼyuk bu lek ti chkiktakutik skʼop Dios sventa ta jpukutik veʼlil li ta mexaetike.
3 Jech oxal kermanotak, tʼujik vukvoʼ viniketik avuʼunik ti xuʼ jpat koʼontontik ta stojolalike,* ti ventainbil yoʼontonik yuʼun chʼul espiritue xchiʼuk ti oyuk spʼijilike, yoʼ jvaʼantik ta sventa li kʼusi skʼan pasel liʼe;
4 yan li voʼonkutike jaʼ chkakʼ ta koʼontonkutik spasel orasion xchiʼuk li abtelal ta sventa skʼop Diose».
5 Vaʼun lek laj yaʼi skotol jchankʼopetik li kʼusi laj yalike, jech oxal la stʼujik li Estebane, ti jaʼ jun vinik ti oy ep xchʼunel yoʼontone xchiʼuk ti ventainbil yuʼun chʼul espiritue, xchiʼuk Felipe, Prokoro, Nikanor, Timon, Parmenas xchiʼuk Nikolas ti jaʼ jun achʼ jchʼunolajel* ta Antiokiae.
6 Laj yikʼik tal ta stojolal li jtakboletike, vaʼun kʼalal laj xaʼox spasik orasione laj yakʼ skʼobik ta stojolalik.
7 Jech oxal chaʼa, puk-o batel li skʼop Diose, epaj batel ta jyalel ek li jchankʼopetik ta Jerusalene; xchiʼuk ep paleetik lik pasikuk ta jchʼunolajeletik.
8 Lek tajek ch-ilat yuʼun Dios li Estebane xchiʼuk oy sjuʼel Dios ta stojolal, tspas mukʼtik kʼusitik labal sba xchiʼuk senyailtak ta stojolal li jteklume.
9 Pe tal junantik viniketik te ta Nail Tsobobbail ti Kolemik chalbeike, te tal xchiʼuk jayvoʼuk jsireneetik, j-alejandriaetik, jsilisiaetik xchiʼuk j-asiaetik sventa tstsakik ta kʼop li Estebane.
10 Pe mu stsal yuʼunik ta skoj li spʼijile xchiʼuk ti oy ta stojolal chʼul espiritu kʼalal chkʼopoje.
11 Vaʼun laj yakʼbeik xchʼun jlom viniketik ti akʼo xi xalike: «Kaʼiojkutik ti oy kʼusi chopol chal ta stojolal Moises xchiʼuk ta stojolal li Diose».
12 Xvochlajet likel yuʼunik li jteklume, li moletike xchiʼuk li jchanubtasvanejetik ta Mantale, vaʼun ta ora noʼox kʼotik ti bu oye, la stsakik ta persa xchiʼuk laj yikʼik batel ta Sanedrin.*
13 La svaʼanik jutkʼop* testigoetik sventa xi xalike: «Li vinik liʼe mu xikta sba ta yalel kʼusitik ta skontra li templo liʼe xchiʼuk li Mantale.
14 Jech kʼuchaʼal liʼe, kaʼiojkutik ti yaloj ti ta la sjines templo li Jnasaretal Jesuse xchiʼuk ti ta la sjel li kʼusitik nopem xkaʼitik spasel ti yakʼojbutik komel li Moisese».
15 Kʼalal tukʼ skʼelojik batel Esteban skotol li buchʼutik te chotajtik ta Sanedrine, laj yilik ti xkoʼolaj kʼuchaʼal sat anjel li sate.
Tsʼibetik ta yok vun
^ Kʼelo glosario.
^ Kʼelo glosario.
^ O: «vukvoʼ viniketik ti lek ch-albat skʼoplalike».
^ Jaʼ li buchʼutik ochemik xa ta srelijion judaetike.
^ Kʼelo glosario.
^ O: «jnopkʼop»; «j-epalkʼop».
