Echos 8:1-40
8 Pe li Sauloe lek laj yil ti laj yichʼ milel li Estebane.
Li vaʼ kʼakʼale lik jun tsatsal kontrainel ta stojolal li tsobobbail ta Jerusalene; la spuk sbaik batel skotolik ta sjunlej slumal Judea xchiʼuk ta Samaria; jaʼ noʼox muʼyuk la spuk sbaik batel li jtakboletike.
2 Pe li viniketik ti lek yichʼojik ta mukʼ Diose la xkuchik batel Esteban sventa chbat smukik xchiʼuk ep tajek laj yat yoʼontonik* ta stojolal.
3 Akʼo mi jech, tsots tajek lik yilbajin tsobobbail li Sauloe. Lik ochuk ta naetik, chjochan lokʼel li viniketik xchiʼuk antsetike, tstikʼan ta chukel.
4 Yan li buchʼutik laj yichʼik pukel batele chalik batel li lekil aʼyejetik ta sventa li skʼop Dios ti buyuk noʼox batike.
5 Te tsakal skʼoplal ek li Felipee, yal batel ta jteklum Samaria xchiʼuk lik xchol mantal ta sventa li Kristoe.
6 Kʼalal chaʼiik xchiʼuk tskʼelik li senyailtak tspas Felipe li epal krixchanoetike koʼol lek la stsʼet chikintaik li kʼusitik chale.
7 Yuʼun ep buchʼutik ochem ta yoʼontonik ibal sba pukujetik ti ch-avanik xchiʼuk ti chlokʼike. Maʼuk noʼox taje, laj yichʼik poxtael li buchʼutik alubem yok skʼobike xchiʼuk li koxoetike.
8 Jaʼ yuʼun xkuxet tajek likel yoʼontonik* li ta jteklum taje.
9 Vaʼun li ta jteklume oy te jun vinik ti Simon sbie, kʼalal muʼyuk toʼox kʼotem ta pasel li kʼusitik taje, ta toʼox spas majia xchiʼuk labal sba tajek chil jteklum Samaria li kʼusi tspase xchiʼuk chalbe sba skʼoplal ti toj mukʼ lae.
10 Skotol krixchanoetik, kʼalal ta bikʼit ta mukʼ lek chchikintabeik xchiʼuk xi chalike: «Li vinik leʼe yichʼojbe Sjuʼel Dios, ti Mukʼ chichʼ albel skʼoplale».
11 Lek chchikintabeik, yuʼun jal xa tajek labal sba chilik ti tspas majiae.
12 Pe kʼalal yakal chal lekil aʼyejetik sventa Ajvalilal yuʼun Dios xchiʼuk sventa sbi Jesukristo li Felipee la xchʼunik, vaʼun laj yichʼik voʼ li viniketik xchiʼuk li antsetike.
13 Kʼot ta jchʼunolajel ek li Simone, vaʼun kʼalal laj yichʼ voʼe te la xchiʼin-o li Felipee; xchiʼuk chʼayal tajek chkom yoʼonton kʼalal chil li senyailtak xchiʼuk li mukʼtik skʼelobiltak juʼelal tspase.
14 Kʼalal laj yaʼiik li jtakboletik ti te oyik ta Jerusalen ti laj xa xchʼamik skʼop Dios ta Samariae, la stakik batel li Pedro xchiʼuk Juane;
15 vaʼun yalik batel xchiʼuk la spasik orasion sventa chichʼik chʼul espiritu li jsamariaetike.*
16 Yuʼun mi junuk to buchʼu yichʼoj yuʼunik, kʼajomal noʼox yichʼojik voʼ ta sbi li Kajvaltik Jesuse.
17 Vaʼun laj yakʼ skʼobik ta stojolalik, jaʼ jech lik yichʼik li chʼul espiritue.
18 Kʼalal laj yakʼ venta Simon ti chichʼik chʼul espiritu kʼalal chakʼ skʼobik* li jtakboletike, laj yal ti chakʼ takʼine,
19 xi lik yale: «Akʼbeikun juʼel ek, yoʼ akʼo yichʼik chʼul espiritu li buchʼutik chkakʼbe jkʼobe».
20 Pe xi laj yalbe li Pedroe: «Batan ta chʼayel xchiʼuk li aplatae, yuʼun la anop ti stakʼ manel ta takʼin li matanal ti muʼyuk tojbil chakʼ Diose.
21 Li voʼote mu xata-o xchiʼuk mi jaʼuk oy aparte li ta abtelal liʼe, yuʼun muʼyuk tukʼ ta sat Dios li avoʼontone.
22 Jaʼ yuʼun suteso avoʼonton ta skoj li choplejal taje xchiʼuk tsots kʼanbo vokol Jeova, yuʼun mi xuʼ chile akʼo spasbot perton li kʼusi chopol tskʼan avoʼontone;
23 yuʼun chkile chʼail venenoot xchiʼuk smosoot li kʼusi muʼyuk tukʼe».
24 Xi la stakʼ li Simone: «Kʼanbeik vokol Jeova ta jtojolal sventa mu xkʼot ta pasel ta jtojolal mi jtosuk li kʼusitik laj avalike».
25 Jaʼ yuʼun kʼalal lek xaʼox tsʼakal laj yalbeik skʼoplal li mantale* xchiʼuk kʼalal laj xaʼox xcholik li skʼop Jeovae, sutik tal ta Jerusalen, la xcholik tal lekil aʼyejetik ta epal bikʼtal lumetik ta Samaria.
26 Pe kʼoponat yuʼun yaj-anjel Jeova li Felipee, xi albate: «Likan, batan ta sur, jaʼ li be ti chyal batel ta Gasa ti chlik tal ta Jerusalene». (Taje jaʼ jun be ti ch-echʼ ta takixokol balumile.)
27 Kʼalal laj yaʼi taje vaʼi, bat, vaʼun ¡kʼelo avil!, oy jun kapon* vinik ti likem ta Etiopiae,* jun vinik ti yichʼoj tsots yabtel ta stojolal Kandase* ti jaʼ meʼ ajvalil ta Etiopiae xchiʼuk jaʼ sbainojbe skotol li skʼulejale. Li vinik taje ay yichʼ ta mukʼ Dios ta Jerusalen,
28 pe yakal xa tsut tal, te chotol tal ta skareta* xchiʼuk tsots yakal chaptabe li svun j-alkʼop Isaiase.
29 Vaʼun xi albat yuʼun chʼul espiritu li Felipee: «Nopajan batel, bat tao li karetae».
30 Vaʼun anilaj batel ta xokon kareta li Felipee xchiʼuk laj yaʼi ti tsots chaptabe li svun j-alkʼop Isaiase, jech oxal xi laj yalbee: «¿Mi xavaʼibe smelolal ta melel li kʼusi yakal chakʼele?».
31 Xi laj yale: «¿Kʼuxi xa noʼox chkaʼibe smelolal ta melel mi muʼyuk buchʼu tsbeiltasune?». Vaʼun albat Felipe ti akʼo xmuye xchiʼuk ti akʼo jmoj xchotiike.
32 Li loʼil ta Tsʼibetik ti tskʼel batele jaʼ liʼe: «Laj yichʼ ikʼel batel kʼuchaʼal jkot chij ti chichʼ milele; xchiʼuk jech kʼuchaʼal jkot chʼiom chij ti chʼan xi te puchʼul kʼalal chichʼ lokʼbel stsotsile, jaʼ jech muʼyuk bu tsjam ye ek li stuke.
33 Kʼalal laj yichʼ kʼexlaltasele muʼyuk bu tukʼ laj yichʼ chapanel. ¿Buchʼu xchapet chalbe skʼoplal li yutsʼ yalale? Yuʼun chichʼ tupʼbel ta balumil li xkuxlejale».
34 Xi la stakʼbe Felipe li kapon vinike: «Avokoluk tajek albun: ¿Buchʼu yakal chalbe skʼoplal li j-alkʼope? ¿Mi jaʼ skʼoplal stuk o mi yan vinik yakal chalbe skʼoplal?».
35 Lik kʼopojuk li Felipee, te lik yalbe skʼoplal li tsʼib taje, laj yalbe skʼoplal li lekil aʼyejetik ta sventa Jesuse.
36 Vaʼun, kʼalal te xbatik ta bee, kʼotik ti bu oy voʼe, jech oxal xi laj yal li kapon vinike: «¡Kʼelo avil! Oy voʼ leʼe; ¿kʼusi tsmakun sventa chkichʼ voʼ?».
37 *——
38 Vaʼun laj yal mantal ti akʼo xkoti li karetae, jech oxal yalik batel ti bu oy voʼ li Felipe xchiʼuk li kapon vinike; vaʼun akʼbat yichʼ voʼ.
39 Kʼalal lokʼik ta voʼe, li xchʼul espiritu Jeovae ta anil noʼox la sbeiltas batel ta yan be li Felipee, muʼyuk xa bu ilat yan velta yuʼun li kapon vinike, pe xmuyubaj noʼox la stam batel sbe li kapon vinike.
40 Pe te kʼot ta Asdod li Felipee, te echʼ li ta yosilal jteklume xchiʼuk la xchol-o batel li lekil aʼyejetik ta skotol jteklumetik jaʼ to ti kʼalal kʼot ta Sesareae.
Tsʼibetik ta yok vun
^ Kʼelo glosario.
^ O: «echʼem pʼij likel yoʼnik»; «nichim noʼox likel yoʼontonik».
^ Kʼelo glosario.
^ Kʼelo glosario.
^ O: «kʼalal lek xaʼox tsʼakal la xcholik li mantale».
^ Kʼelo glosario.
^ Kʼelo glosario.
^ Jaʼ jech chalbeik li meʼ ajvaliletik ta Etiopiae.
^ Kʼelo glosario.
^ Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
