Efesios 1:1-23
1 Voʼon Pabloun, yajtakbolun* Kristo* Jesus ti jech tskʼan yoʼonton Diose, ta sventa li buchʼutik chʼul* ti te oyik ta Efeso ti jmoj tukʼ oyik xchiʼuk li Kristo Jesuse:
2 Oyuk slekil yutsil oʼontonal* xchiʼuk jun oʼontonal ta atojolalik ti jaʼ chakʼ li Jtotik Dios xchiʼuk li Kajvaltik Jesukristoe.
3 Muyubtabiluk li Dios ti jaʼ Stot li Kajvaltik Jesukristoe, yuʼun laj yakʼbunkutik bendisionetik, jaʼ li bendisionetik ta mantal te ta vinajel ti jmoj oyunkutik xchiʼuk Kristo
4 kʼalal la stʼujunkutik sventa jmojuk oyunkutik xchiʼuk Kristo kʼalal muʼyuk toʼox bu pasbil li balumile, sventa chʼulunkutik xchiʼuk chʼabaluk jpaltailkutik ta stojolal Dios ta skoj li kʼanelale.
5 Yuʼun laj xa onoʼox stʼujutik sventa xijkʼot ta xnichʼnab ta stojolal Jesukristo, jech kʼuchaʼal oy ta yoʼonton xchiʼuk ti jech tskʼan yoʼontone,
6 sventa chichʼ kʼupil kʼoptabel li smukʼul slekil yutsil yoʼonton ti laj yakʼbutik ta slekil yoʼonton ta stojolal li buchʼu skʼanoje.
7 Ta stojolal Dios la jtatik kolebal ta skoj pojelal* ta sventa li xchʼichʼel Xnichʼone, jech, la jtatik perton ta skoj li jmultike, jaʼ ta skoj li skʼulejal slekil yutsil yoʼontone.
8 Ep laj yakʼbutik pʼijilal xchiʼuk yaʼibel smelolal ta skoj slekil yutsil yoʼonton
9 yoʼ xkojtikintik li kʼusi chʼul ti mukul skʼoplal* ta sventa li kʼusi tskʼan yoʼontone. Yuʼun jaʼ jech ta yoʼonton ti jech la snop tspas
10 ti tsventain li kʼusitik kʼalal mi tsuts* skʼakʼalil ti kʼusi ora albile. Taje jaʼ sventa tstsob skotol ta stojolal Kristo li kʼusitik oy ta vinajel xchiʼuk li kʼusitik oy ta sba balumile. Ta melel, tstsob skotol ta stojolal,
11 jech, jaʼ li buchʼu jmoj oyunkutik xchiʼuke, jech xtok laj yichʼ alel ti chkichʼ jpartekutike, yuʼun laj xa onoʼox kichʼkutik tʼujel jech kʼuchaʼal onoʼox tskʼan tspas li buchʼu tʼujvan ti chkʼot ta pasel yuʼun skotol li kʼusi tsnop tspas jech kʼuchaʼal tskʼan yoʼontone,
12 sventa xikʼotkutik ta skʼupil kʼoptabel smukʼulal ti voʼonkutik baʼyel xa onoʼox ta jmalakutik li Kristoe.
13 Pe la amalaik ek kʼalal laj xaʼox avaʼiik ta sventa li kʼusi melele, ti jaʼ li lekil aʼyejetik* sventa akolebalike. Laj avichʼ aseyoalik* ek ta stojolal chʼul espiritu* ti yaloj xa onoʼox chakʼ Dios ta stojolal Kristo kʼalal mi laj xaʼox avakʼ xchʼunel avoʼontonike,
14 ti jech kʼuchaʼal jun prental ti albil xa onoʼox skʼoplal ta sventa li jpartetike, ti jaʼ sventa chichʼ koltael ta pojelal li kʼusi yuʼun Dios sventa chichʼ kʼupil kʼoptabel li smukʼulale.
15 Jech oxal li voʼon eke, ti laj kaʼi li xchʼunel avoʼontonik ta stojolal Kajvaltik Jesus xchiʼuk li kʼanelal chavakʼik ta ilel ta stojolal skotol li buchʼutik chʼule,
16 jech muʼyuk bu kiktaoj jba ta stojel ta vokol ta aventaik. Chkalilanoxuk-o ta j-orasion,
17 sventa xuʼ xakʼboxuk ajuʼelik li Totil ti oy smukʼulale, ti jaʼ li Sdios Kajvaltik Jesukristoe, yoʼ xapʼijubik xchiʼuk sventa xavaʼibeik smelolal li kʼusi chakʼ ta naʼel ta sventa li lek yojtikinobil yuʼune.
18 La sjamboxuk anopbenik li stuke sventa xavojtikinik li spatobil oʼontonale xchiʼuk xavojtikinik li mukʼtikil kʼulejal chakʼbe spartein li buchʼutik chʼule,
19 jech xtok, mu xa noʼox stakʼ albel smelolal li stsatsal sjuʼelal ta jtojolaltik ti jchʼunolajelutike. Jech kʼuchaʼal tsots ch-abtej li yipe,
20 ti jaʼ la stunes kʼalal la xchaʼkuxes* Kristo xchiʼuk kʼalal la xchotan ta sbatsʼikʼob te ta vinajele,
21 jaʼ mas toyol skʼoplal kʼot, jaʼ mu sta skotol li ajvaliletike, li buchʼutik oy yabtele, li buchʼutik oy sjuʼele, li buchʼutik tspasvanik ta mantale xchiʼuk skotol li biiletik ti chichʼ alele, maʼuk noʼox ta skotol li kʼusitik oy ta balumil* liʼe, jaʼ jech ta sventa xtok li kʼusitik chtal ta mas tsʼakale.
22 Jech xtok laj yakʼbe ta yok ta skʼob skotol li kʼusitike xchiʼuk laj yakʼ kʼotuk ta jolil ta sventa skotol li kʼusitik oy ta sventa li tsobobbaile,*
23 ti jaʼ sbekʼtale, ti nojem ta stalelaltak li tsobobbaile xchiʼuk ti jaʼ tstsʼaki yuʼun skotol li kʼusitike.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «laj».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
