Efesios 3:1-21
3 Jech oxal chaʼa, voʼon Pabloun, jchukelun ta skoj Kristo Jesus ta aventaik ti voʼoxuk jyanlum krixchanooxuke...
2 ta melel, mi yuʼun avaʼiojbeik skʼoplal li kʼusi jbainoj ta sventa li slekil yutsil yoʼonton Dios ti li-akʼbat ta akojike,
3 ti li-akʼbat kojtikin li kʼusi chʼul ti mukul skʼoplal kʼalal oy kʼusi li-akʼbat jnaʼe, jech kʼuchaʼal laj xa onoʼox kalboxuk jutuk skʼoplale.
4 Jaʼ yuʼun ta skoj taje, kʼalal mi la akʼelik li karta liʼe, te chavakʼik venta ti xkaʼibe lek smelolal li kʼusi chʼul ti mukul skʼoplal ta sventa li Kristoe.
5 Ti kʼu xa sjalil echʼem tal li jaykʼol kuxlejale,* muʼyuk bu laj yichʼ akʼbel yojtikinik li xnichʼnab krixchanoetik li kʼusi mukule, yan li avie akʼbil xa snaʼik yuʼun chʼul espiritu li chʼul jtakboletik xchiʼuk li j-alkʼopetik yuʼune,
6 jaʼ xkaltik, li jyanlumetik ti jmoj oyik xchiʼuk li Kristoe xchiʼuk ta sventa li lekil aʼyejetike, persa onoʼox skʼan jech xichʼ sparteik ek jech kʼuchaʼal voʼonkutike, ti xkʼotikuk ta stsʼakbenaltak bekʼtalile xchiʼuk ti teuk skʼoplalik ek kʼuchaʼal voʼonkutik ta sventa li kʼusi albile.
7 Likʼot ta jtunel ta sventa li kʼusi chʼul ti mukul skʼoplale, taje jaʼ ta skoj li matanal muʼyuk tojbil ti ta slekil yutsil yoʼonton laj yakʼbun ta sjuʼel li Diose.
8 Li voʼon ti mas bikʼit jkʼoplal ta stojolal skotol li buchʼutik chʼul ti bikʼit skʼoplalike, laj kichʼ akʼbel li slekil yutsil oʼontonal taje, sventa chkalbe jyanlumetik li lekil aʼyejetik ta sventa li kʼulejaletik yuʼun Kristo ti mu tabajuk spajebe,
9 xchiʼuk sventa chkakʼbe yil skotol krixchanoetik kʼuxi ch-abtej li kʼusi chʼul ti mukul skʼoplale, ti voʼne xa onoʼox tajek mukul yuʼun li Dios ti jaʼ la spas skotol li kʼusitike.
10 Taje jaʼ ta stojolal tsobobbail akʼo yichʼ akʼbel snaʼ ajvaliletik xchiʼuk li buchʼutik oy yabtelik ta vinajel ti ep tajek ta chop kʼu yelan chvinaj li spʼijil Diose.
11 Jaʼ ta skoj li kʼusi tskʼan tspas sbatel osil ti jech kʼot ta nopel yuʼun tspas ta sventa li Kristoe, ti jaʼ li Kajvaltik Jesuse,
12 jaʼ ta sventa ti jech jamal chijkʼopoje xchiʼuk ti jpatoj koʼontontik chijnopaj ta stojolal Dios ta skoj ti oy xchʼunel koʼontontik ta stojolal Kristoe.
13 Jech oxal chaʼa, ta jkʼanboxuk vokol ti mu me xalubtsajik ta skoj ti chkil tsots jvokol ta akojike, yuʼun jaʼ sventa avichʼobilik ta mukʼ li jvokoltake.
14 Jaʼ yuʼun ta jkejan jba ta stojolal Totil ta skoj taje.
15 Ti jaʼ koliyal ti oy skotol li utsʼ alaliletik ta vinajel xchiʼuk li ta sba balumile.
16 Ta jkʼanbe ta orasion Dios ta skoj ti oy ep smukʼulale, ti akʼo stsatsubtas avoʼontonik ta sjuʼel xchʼul espiritue,
17 ta jkʼanbe ta orasion Dios ti oyuk ta avoʼontonik Kristo xchiʼuk ti akʼanojikuk yantik ta skoj li xchʼunel avoʼontonike. Lekuk tsʼunuloxuk-o xchiʼuk teuk oyoxuk-o li ta snakleb nae,
18 sventa koʼol lekuk tajek xavaʼibeik smelolal xchiʼuk li buchʼutik chʼul ti kʼu sjamleje, ti kʼu snatile, ti kʼu stayleje, ti kʼu snatil xyale
19 xchiʼuk ti xavojtikinik li kʼanelal yuʼun Kristo ti jaʼ mas to toj mukʼe, ti jaʼ mu sta li yojtikinobile, sventa xakʼboxuk Dios skotol li stalelale.
20 Li avi une, li buchʼu yakal ch-abtej sjuʼel ta jtojolaltike, x-echʼ to ta xakʼbutik ti kʼusi ta jkʼantike o li kʼusi jnopojtike,
21 jaʼuk akʼo yichʼ albel smukʼulal Dios ta stojolal li tsobobbaile xchiʼuk ta stojolal li Kristo Jesuse, jechuk-o akʼo yichʼ albel skʼoplal sbatel osil ta skotol li jaykʼol kuxlejale. Jechuk.*
