Efesios 5:1-33
5 Jaʼ yuʼun chanbeik li kʼusi tspas Diose, yuʼun skʼanbil nichʼnaboxuk
2 xchiʼuk jechuk-o me xakʼan abaik jech kʼuchaʼal la skʼanutik* li Kristoe, ti laj yakʼ sba stuk ta jkojtik* jech kʼuchaʼal matanal xchiʼuk milbil matanal* ti lek xmuet chaʼi li Diose.
3 Mu me xavalbeik skʼoplal jsetʼuk li mulivajele,* skotol li kʼusitik ibal sbae o li kʼusitik mu x-echʼ ta oʼontonal spasele, yuʼun mu jechuk stalelal tspasik li buchʼutik chʼule;
4 jech xtok mu me xavalbeik skʼoplal li talelal ti toj kʼexlal sbae,* li bol kʼopojele, li bol ixtol loʼile —skotol li kʼusitik muʼyuk slekile—, li kʼusi mas lek xuʼ xapasike jaʼ ti xatojbeik ta vokol li Diose.
5 Yuʼun xavojtikinik xchiʼuk anaʼojik lek li kʼusi liʼe: li jmulivajele, li buchʼu ibal sba kʼusi tspase xchiʼuk li buchʼu mu x-echʼ yoʼonton ta skʼanel li kʼusitike, ti jaʼ skʼan xal yichʼel ta mukʼ santoetike,* mi junuk buchʼu xuʼ xichʼ sparteik ta Ajvalilal yuʼun Kristo xchiʼuk li ta Ajvalilal yuʼun Diose.*
6 Mu me buchʼu sloʼlaoxuk ta skʼopojel ti muʼyuk sbalile, yuʼun ta skoj li kʼusitik taje chtal skʼakʼal yoʼonton Dios ta stojolal li xnichʼnab toybaile.
7 Jaʼ yuʼun mu me teuk kapal akʼoplalik xchiʼukik;
8 yuʼun oy toʼox kʼuk sjalil ti oyoxuk ta ikʼal osile, pe li avie oyoxuk xa ta sakil osil ta skoj ti jmoj oyoxuk xchiʼuk li Kajvaltike. Jechuk-o me xa xanavik jech kʼuchaʼal xnichʼnab lus,
9 yuʼun li luse jaʼ chakʼ skotol li yutsil oʼontonale, li tukʼilale xchiʼuk li kʼusi melele.
10 Jechuk-o me xavakʼik batel venta li kʼusi lek chil Kajvaltike;
11 mu xa me xapasik li abtelal ti mu snaʼ satin ti jaʼ sventa ikʼal osile; jaʼ mas lek akʼik ta ilel ti kʼu yelanike.
12 Yuʼun kʼexlal sba akʼo mi kʼajomal noʼox chavalbeik skʼoplal li kʼusi tspasik ta mukule.
13 Jaʼ yuʼun, skotol li kʼusi akʼbil ta ilele jaʼ ch-akʼat ta ilel yuʼun li luse, yuʼun lus xa chkʼot skotol li kʼusi chichʼ akʼel ta ilele.
14 Jaʼ yuʼun xi laj yichʼ alele: «Voʼot ti te vayalote, julavan* xchiʼuk likan talel ti bu oy animaetike, vaʼun chojobaj Kristo ta atojolal».
15 Jaʼ yuʼun kʼelik me lek ti mu me bol* krixchanouk ti kʼu yelan chapas abaike, jaʼ lek pʼij xapas abaik,
16 lek me xatunesik li jujun kʼakʼal chjelav avuʼunike, yuʼun sok xa tajek li kʼakʼale.
17 Jaʼ yuʼun iktaik xa ti mu xanaʼ xarasonajike, jaʼ lek jechuk-o me xavakʼik venta li kʼusi tskʼan yoʼonton Jeovae.
18 Jech xtok, mu me xayakubik ta skoj vino ti muʼyuk xa stukʼil smelolal yuʼun li talelale, jaʼ lek jechuk-o xanojes abaik ta chʼul espiritu.
19 Ta salmoetik* xakʼopon abaik ta jujuntal, ta kʼupil kʼoptael xchiʼuk ta kʼejimoletik sventa yichʼobil ta mukʼ Dios, kʼejinanik xchiʼuk kʼejintaik kʼejojetik ta avoʼontonik ta stojolal Jeova,
20 skotol li kʼusitike jechuk-o xatojbeik ta vokol Jdiostik ti jaʼ Totile, jaʼ jech xapasik ta sbi li Kajvaltik Jesuse.
21 Ichʼo abaik ta mukʼ ta jujuntal ta skoj ti axiʼtaojik li Kristoe.
22 Akʼo yichʼ ta mukʼ smalal li ajnilaletik jech kʼuchaʼal chichʼik ta mukʼ li Kajvaltike,
23 yuʼun li malalile jaʼ jolil ta stojolal li yajnile jech kʼuchaʼal jaʼ jolil ta stojolal tsobobbail li Kristoe, ti jaʼ la skolta li bekʼtalil taje.
24 Jech ta melel, jech kʼuchaʼal yichʼojik ta mukʼ Kristo li tsobobbaile, li ajnilaletik eke skʼan xichʼ ta mukʼ smalalik ta skotol ora.
25 Malaliletik, jechuk-o me xakʼan avajnilik jech kʼuchaʼal la skʼan tsobobbail li Kristo eke xchiʼuk ti laj yakʼ sba ta stojolal
26 sventa xchʼultajese, la sakubtas* ta voʼ, jaʼ xkaltik, ta skʼop Dios.
27 Ti jech la spase jaʼ sventa junuk yutsil ta sat li tsobobbaile, ti muʼyukuk yikʼobale, ti muʼyukuk xchopolile, mi jtosuk tskʼan taje, jaʼ tskʼan ti chʼuluke xchiʼuk ti muʼyukuk spaltaile.
28 Jaʼuk me jech akʼo skʼan yajnilik li malaliletik jech kʼuchaʼal skʼanoj sbekʼtal stukike. Skʼanoj sba stuk li buchʼu skʼanoj yajnile,
29 yuʼun muʼyuk buchʼu spʼajoj li sbekʼtal stuke, ti kʼusie tsmakʼlin xchiʼuk chkʼuxubin, jech kʼuchaʼal tspas Kristo ta stojolal li tsobobbaile,
30 yuʼun jaʼutik stsʼakbenal li sbekʼtale.
31 «Jaʼ yuʼun ta xikta stot xchiʼuk smeʼ li vinike, xchiʼuk jaʼ xa te chkom-o* xchiʼuk li yajnile, vaʼun tspas ta jun sbekʼtalik li chaʼvoʼike.»
32 Toj mukʼ skʼoplal li kʼusi chʼul ti mukul skʼoplale. Ta melel, jaʼ yakal chkalbe skʼoplal li Kristo xchiʼuk li tsobobbaile.
33 Akʼo mi jech, ta jujuntaloxuk skʼan me xakʼan avajnilik jech kʼuchaʼal akʼanoj aba atukike; jech xtok, akʼo me yichʼ lek ta mukʼ smalal li ajnilale.
Tsʼibetik ta yok vun
^ O: «la skʼanoxuk».
^ O: «ta akojik».
^ Kʼelo glosario.
^ Por·nei·a ta griego. Kʼelo glosario.
^ «Aseljeia» ta griego. Kʼelo glosario.
^ Kʼelo glosario.
^ Kʼelo glosario.
^ O: «vikʼo asat».
^ O: «sonso».
^ Kʼelo glosario.
^ Kʼelo glosario.
^ O: «ta xnapʼi».
