Efesios 6:1-24
6 Alab nichʼnabiletik, chʼunbo me smantal atot ameʼik jech kʼuchaʼal lek chil li Kajvaltike, yuʼun jaʼ tukʼ li kʼusi taje.
2 «Ichʼo ta mukʼ atot ameʼ» jaʼ li baʼyel mantal ti jmoj te tsakal skʼoplal xchiʼuk li kʼusi albile:
3 «Sventa lekuk xabat xchiʼuk jal xakuxi liʼ ta sba balumile».
4 Totiletik, mu me xasabeik skʼakʼal yoʼonton li anichʼnabike, tukʼibtasik me sventa xachabiik xchiʼuk albeik mantal jech kʼuchaʼal tskʼan Jeovae.
5 Mosoiletik, chʼunbeik me smantal li krixchanoetik ti jaʼ avajvalike, ichʼik me ta mukʼ xchiʼuk xiʼtaik me ta sjunul avoʼontonik jech kʼuchaʼal chachʼunbeik smantal li Kristoe,
6 pe maʼuk noʼox me jech xapasik kʼalal oy buchʼu skʼelojoxuk sventa chalekubtasbeik yoʼonton li krixchanoetike, jechuk me xapasik jech kʼuchaʼal smoso Kristo, ta sjunuluk me avoʼonton xapasik li kʼusi tskʼan yoʼonton Diose.
7 Ta sjunuluk me avoʼonton xatunik ta mosoil ta stojolal Jeova, maʼuk ta stojolal krixchanoetik,
8 yuʼun anaʼojik ti tstojboxuk sutel Jeova li kʼusitik lek chapasik ta jujuntale, akʼo mi mosoiloxuk o mi kolemoxuk.*
9 Jechoxuk ek ti yajvaloxuk mosoile jaʼuk me jech xapasbeik li amosoike xchiʼuk mu xa me xasibtasik, yuʼun anaʼojik ti te oy ta vinajel li Avajvalik xchiʼuk ti jaʼ Yajvalik eke, muʼyuk tʼujbil yajval yuʼun li Ajvalile.
10 Ta slajebal xa une, jechuk me xata-o batel ajuʼelik ta stojolal li Kajvaltike xchiʼuk xatabeik-o batel li stsatsal yipe.
11 Lapik me li abtejebal* likem talel ta stojolal Dios ti lek tsʼakale, sventa mu stsaloxuk li kʼusitik manya tspas Diabloe;
12 yuʼun yakal ta jtsak jbatik ta kʼop, pe maʼuk xchiʼuk li buchʼu oy sbekʼtal xchiʼuk oy xchʼichʼele, jaʼ yakal ta jtsak jbatik ta kʼop xchiʼuk li ajvaliletike, li buchʼutik oy yabtelike, li ajvaliletik ta spʼejel balumil ta sventa ikʼal osile, jaʼ jkontratik li pukujetik* ti toj chopolik ti ta vinajel oyike.
13 Jech oxal, chaʼa tsakik me li abtejebal likem talel ta stojolal Dios ti lek tsʼakale, sventa xkuch avuʼunik kʼalal chkʼot skʼakʼalil ti toj chopole, vaʼun muʼyuk xa bu chavichʼik tsalel mi pas xaʼox avuʼunik skotol taje.
14 Tsotsanik-o me chaʼa, teuk me lek chukul ta achʼutik kʼuchaʼal jun chukil li kʼusi melele, lapik me li tukʼilal jech kʼuchaʼal li smak avoʼontonike
15 xchiʼuk lapik me li axonobik ti lek chapaloxuk chavalik batel li lekil aʼyejetik ta sventa li jun oʼontonale.
16 Pe maʼuk noʼox taje, tsakik me li xchʼunel avoʼontonik jech kʼuchaʼal li mukʼta eskudoe, sventa xtupʼ avuʼunik skotol li skʼakʼal sflecha li buchʼu toj chopole.*
17 Jech xtok lapik me li kolebal jech kʼuchaʼal li smak ajolike xchiʼuk tsakik me li espada chakʼ chʼul espiritue, jaʼ xkaltik, li skʼop Diose,
18 jech xtok, ta kʼusiuk noʼox orasional xchiʼuk vokolajetel, pasik orasion skotol ora jech kʼuchaʼal tskʼan chʼul espiritue. Ta sventa taje vikʼiluk-o me asatik skotol ora, kʼanik vokol ta stojolal skotol li buchʼutik chʼule.
19 Jechuk me xapasik orasion ta jtojolal ek sventa xitojob ta kʼopojel kʼalal ta jam ke sventa tsots koʼonton chkakʼ ta ojtikinel li kʼusi chʼul ti mukul skʼoplal li ta lekil aʼyejetike,
20 yuʼun yajkʼopojelun Dios ti chkal lekil aʼyejetike, ti chukulun ta kadenae, sventa tsotsuk koʼonton chkalbe skʼoplal taje, jech onoʼox kʼuchaʼal skʼan xikʼopoje.
21 Pe sventa xanaʼik ek ti kʼusi ta jnuptane xchiʼuk ti kʼu yelan oyune, oy jun ermano Tikiko sbi ti lek kʼanbil xchiʼuk ti tukʼil jtunel ta stojolal Kajvaltike, jaʼ chakʼ anaʼik skotol.
22 Ta jtakboxuk talel ta skoj li kʼusitik liʼe, sventa xanaʼik kʼu kelankutik xchiʼuk sventa spatboxuk avoʼontonik.
23 Junuk yoʼonton li ermanoetike xchiʼuk oyuk ta stojolalik li kʼanelal ti jmoj oy xchiʼuk xchʼunel oʼontonal ti te likem talel ta stojolal Dios ti jaʼ Totile xchiʼuk ti te likem talel ta stojolal Kajvaltik Jesukristoe.
24 Teuk oy li slekil yutsil oʼontonal ta stojolal skotol li buchʼutik skʼanoj ta melel li Kajvaltik Jesukristoe.
