Filipenses 2:1-30
2 Ta skoj ti jmoj oyoxuk xchiʼuk li Kristoe, ta skoj ti chatsatsubtasbeik yoʼonton xchiʼuk chapatbeik yoʼonton yantik ta skoj ti akʼanojike, ta skoj ti oy ta avoʼontonik li yantike, ti akʼanojik xchiʼuk ti kʼux ta avoʼontonike,
2 kuxetuk me lek koʼonton* avuʼunik ta skoj ti koʼol anopbenike, ti koʼol akʼanoj abaike, ti koʼol lek oyoxuke xchiʼuk ti koʼol kʼusi chanopike.
3 Mu me kʼusi xapasik ti jaʼ tstij avoʼontonik li kontrainejbaile xchiʼuk ti jaʼ noʼox tsots akʼoplal chavaʼi aba atukike, jaʼ lek bikʼit xavakʼ abaik, jaʼ masuk tsots skʼoplal xavilik li yantike.
4 Oyuk-o me ta avoʼontonik li yantike, maʼuk noʼox me xanop akʼoplal atukik.
5 Jechuk me anopbenik jech kʼuchaʼal snopben echʼ li Kristo Jesuse,
6 yuʼun manchuk mi jech toʼox oy kʼuchaʼal jun Dios, muʼyuk bu la snop ti tskʼan tspoj abtelale, jaʼ xkaltik, ti tskʼan tskoʼoltas sba jech kʼuchaʼal li Diose.
7 Moʼoj; mu jechuk la spas, yuʼun laj yikta komel skotol li kʼusi oy yuʼune, kʼot jech kʼuchaʼal jun mosoil xchiʼuk pas ta jun krixchano.
8 Maʼuk noʼox taje, yuʼun la sbikʼtajes sba kʼalal tal kʼuchaʼal jun krixchanoe xchiʼuk laj onoʼox xchʼun mantal manchuk mi chichʼ milel, jech, cham ta jtel teʼ sventa vokolil.*
9 Ta skoj taje toybat yabtel yuʼun Dios xchiʼuk ta slekil yoʼonton laj yakʼbe li biil ti mas toyol kʼot skʼoplal ti jaʼ mu sta li yan biiletike,
10 sventa skejan sba skotolik ta sbi Jesus —li buchʼutik te oy ta vinajele, li buchʼutik te oy ta sba balumile xchiʼuk li buchʼutik te oy ta yut balumile—
11 xchiʼuk akʼo yalik ta jamal skotolik ti jaʼ Kajvaltik li Jesukristo sventa smukʼulal li Dios ti jaʼ Totile.
12 Jaʼ yuʼun chaʼa, voʼoxuk ti jkʼanojoxuke, ti nopem onoʼox xavaʼiik xchʼunel mantal kʼalal te oyune, ti mas anil chachʼunik kʼalal muʼyuk te oyune, pasik-o me li kʼusi chata-o akolebalike, xiʼanik xchiʼuk nikanik.
13 Yuʼun jaʼ chakʼboxuk avipalik li Diose, chakʼ ti oyuk ta avoʼontonik spasele xchiʼuk chakʼ ti xuʼuk avuʼunik spasel li kʼusitik lek chile.
14 Jechuk-o me mu ta bikʼtal kʼopojeluk xapasik li kʼusitike o ti chavut abaike,
15 sventa mu xatabat amulik xchiʼuk manxoukoxuk, xnichʼnaboxuk Dios li ta jkʼol kuxlejal* ti toj chopol ti muʼyuk tspas li kʼusi tukʼe, li voʼoxuke chaxojobajik ta stojolal liʼ ta balumile.
16 Tsots me xatsakik li aʼyej sventa kuxlejale. Vaʼun oyuk kʼusi ximuyubaj-o li ta skʼakʼalil Kristoe: jaʼ jech ta jnaʼ ti mu altikuk noʼox li-anilaj xchiʼuk ti mu jecheʼuk noʼox tsots li-abteje.
17 Manchuk mi jech laj kichʼ malel jech kʼuchaʼal matanal vino* li ta sba milbil matanal* ta skoj li chʼul abtelal* ti jaʼ la sbeiltasoxuk ta sventa li xchʼunel oʼontonale, jaʼ chimuyubaj yuʼun xchiʼuk chijmuyubaj jkotoltik.
18 Jaʼ jech skʼan xamuyubajik ek xchiʼuk jmojuk noʼox kuxetuk koʼontontik.
19 Jaʼ yuʼun oy ta koʼonton ta jtakboxuk noʼox talel Timoteo mi jech skʼan Kajvaltik Jesuse, sventa jta spatobil koʼonton kʼalal chkaʼi akʼoplalike.
20 Yuʼun muʼyuk buchʼu yan ti lek baxbol* kʼuchaʼal stuke, ti oy ta yoʼonton chchabioxuke.
21 Yuʼun skotol li yantike jaʼ noʼox tsaʼik li kʼusi tskʼan stukike, maʼuk tsaʼik li kʼusi tskʼan Jesukristoe.
22 Pe li voʼoxuke anaʼojik ti laj yakʼ ta ojtikinel ti lek sta-oe, ti xkoʼolaj kʼuchaʼal jun nichʼonil xchiʼuk stot kʼalal la xchiʼinun ta abtel sventa chichʼ akʼel ta ojtikinel li lekil aʼyejetike.
23 Jaʼ yuʼun chaʼa, jaʼ ta jkʼan ta jtakboxuk talel ta ora kʼalal mi laj kil ti kʼu yelan xbat jkʼoplale.
24 Ta melel jpatoj koʼonton ta stojolal Kajvaltik ti jutuk xa skʼan xbat jkʼeloxuk eke.
25 Pe li avie tsots skʼoplal chkil ti ta jtakboxuk talel li Epafroditoe, ti jaʼ kermanoe, ti jaʼ jchiʼil ta abtel xchiʼuk ti jaʼ yajsoltaro Kristoe, ti jaʼ la atakik talel sventa chakʼbun li kʼusitik chtun kuʼune,
26 yuʼun tskʼan tajek tskʼeloxuk akotolik xchiʼuk chat tajek yoʼonton* ta skoj ti laj avaʼiik ti ipaje.
27 Ta melel, ipaj onoʼox xchiʼuk jutuk xa mu cham; pe kʼuxubinat yuʼun Dios; mu stukuk noʼox kʼuxubinat, yuʼun la xkʼuxubinun ek sventa mu xa jta mas yatel koʼonton.
28 Jaʼ yuʼun ta ora noʼox ta jtakboxuk talel sventa xkuxet noʼox avoʼontonik yan velta mi laj avilike xchiʼuk sventa mu xa masuk ta jvul koʼonton ek.
29 Kuxetuk me avoʼontonik xachʼamik ta sventa Kajvaltik jech kʼuchaʼal nopem onoʼox xavaʼiik spasele; jechuk-o me xakʼuxubinik li viniketik ti jech tspasik kʼuchaʼal stuke,
30 yuʼun jutuk xa mu cham ta spasbel li yabtel Kristoe, ti laj yakʼ ta vokol xkuxlejale jaʼ sventa tskoltaun ta sventa li kʼusitik chtun kuʼune xchiʼuk jaʼ kʼot ta akʼexolik ti muʼyuk bu liʼ oyoxuke.
Tsʼibetik ta yok vun
^ O: «echʼem pʼijuk koʼn»; «nichimuk noʼox koʼonton».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «ti lek chakʼ persa».
^ Kʼelo glosario.
