Filipenses 3:1-21
3 Ta slajebal xa une kuni ermanotak, jechuk-o me xkuxet avoʼontonik* ta stojolal li Kajvaltike. Muʼyuk bu chopol chkaʼi ti ta jtsʼibaboxuk talel yan velta li kʼusi laj xa onoʼox jtsʼibae, yuʼun jaʼ sventa alekilalik.
2 Kʼelo me abaik ta stojolal li tsʼiʼetike,* kʼelo me abaik ta stojolal li buchʼutik tspasik choplejale, kʼelo me abaik ta stojolal li buchʼutik chtuchʼilanik bekʼtalile.
3 Yuʼun voʼotik kichʼojtik li melel sirkunsisione* yakalutik spasel chʼul abtelal ta xchʼul espiritu Dios xchiʼuk jaʼ xijmuyubaj-o yuʼun li Kristo Jesuse xchiʼuk maʼuk jpatoj koʼontontik ta sventa li bekʼete.
4 Akʼo mi jech, voʼon oy jrason ti jech jpatoj koʼonton ta sventa li bekʼete.
Voʼon mas oy jrason, jaʼ mu sta li yantik viniketike, yuʼun
5 laj kichʼ sirkunsision kʼalal vaxakib toʼox kʼakʼal kichʼoje, yutsʼ yalalun Israel,* snitilulalun* Benjamin, j-evreoun* xchiʼuk j-evreo li jtot jmeʼe; jfariseoun toʼox ta sventa li mantale;*
6 la jkontrain tsobobbail* ta sventa ti oy ta koʼonton spasel li kʼusitike xchiʼuk la jpas skotol li kʼusi tukʼ* chal mantale.
7 Akʼo mi jech, li kʼusi tsots toʼox tajek skʼoplal laj kile mu xa kʼusi stu chkil ta skoj li Kristoe.
8 Ta sventa taje, ta melel mu kʼusi xtun-o skotol chkil xtok ta skoj ti toj echʼ xa noʼox ep sbalil li yojtikinel Kristo Jesus ti jaʼ Kajvale. Jaʼ ta skoj ti kiktaoj skotol li kʼusitike xchiʼuk jech xa chkil kʼuchaʼal jtsop kʼaʼep sventa jaʼ chkʼot ta jkanal li Kristoe
9 xchiʼuk ti jmojuk oyun xi-ilat xchiʼuke, pe maʼuk ta sventa jtukʼilal jtuk ta sventa ti ta jpas li kʼusi chal Mantale, jaʼ ta skoj li tukʼilal ta sventa xchʼunel oʼontonal ta stojolal li Kristoe, li tukʼilal yuʼun Dios ta skoj xchʼunel oʼontonale.
10 Ti kʼusi ta jkʼane jaʼ ti xkojtikin li stuke xchiʼuk li juʼelal ta sventa li xchaʼkuxesele* xchiʼuk ti xkil jvokol jech kʼuchaʼal laj yil svokole, ti xicham jech kʼuchaʼal chame,
11 sventa xkil mi jta ta persa ti voʼon baʼyel xichaʼkuxi talele.
12 Maʼuk skʼan xal ti yuʼun jtaoj xae o ti yuʼun tukʼibtasbilun xae, moʼoj, jnutsoj-o batel sventa xkil mi jta ek li kʼusi la stʼujun-o li Kristo Jesuse.
13 Ermanoetik, maʼuk ti yuʼun jtaoj xa chkile; pe oy jtos kʼusi ti jpʼel skʼoplale: jaʼ ti ta jchʼay ta jol li kʼusi komem xa ta patile, jaʼ chkakʼ persa ti chi-anilaj batel sventa ta jta li kʼusi oy ta jelavele,
14 jnutsoj batel li matanal ta jkʼan ta jta sventa li takel ta ikʼel ta akʼol yuʼun Dios ta stojolal Kristo Jesuse.
15 Jaʼ yuʼun li voʼotik ti yijutik xa ta mantale, jechuk me jnopbentik kʼuchaʼal taje; mi oy yan-o kʼu yelan chbat anopbenike, jaʼ chakʼ anaʼik Dios li talelalil ti laj kalbetik skʼoplale.
16 Akʼo mi jech, ti bu xa kʼalal chʼiemutike, jaʼuk me jech lek xchapet jpastik batel li kʼusi jtamojtik xa batele.
17 Ermanoetik, jmojuk me xachanbeikun batel xchiʼuk akʼo me asatik ta stojolal li buchʼutik jech yakal tspasik batel jech kʼuchaʼal laj kakʼkutik avilike.
18 Yuʼun oy ep buchʼutik —chkalilanbe onoʼox skʼoplalik, pe chi-okʼ xa chkalbe skʼoplalik li avie— ti skontrainojik li jtel teʼ sventa vokolil* yuʼun Kristoe.
19 Jaʼ slajebik li lajelale, jaʼ sdiosik li xchʼutike,* jaʼ smukʼulalik li xkʼexlalike xchiʼuk jaʼ yakʼoj ta snopbenik li kʼusitik ta balumile.
20 Pe te oy ta vinajel li jlumaltike, oy tajek ta koʼontontik jmalaojtik jun jkoltavanej ti jaʼ te chlik talele, ti jaʼ li Kajvaltik Jesukristoe,
21 ti tstunes stsatsal juʼel sventa tskʼatajes li jbekʼtaltik ti kʼune, sventa xkoʼolaj kʼuchaʼal li sbekʼtal ti jun yutsile xchiʼuk ti x-och ta yok ta skʼob skotol li kʼusitike.
Tsʼibetik ta yok vun
^ O: «pʼij avoʼnik»; «nichim avoʼontonik».
^ Jaʼ xkaltik, krixchanoetik ti toj ibal xa noʼox sba stalelalike.
^ Kʼelo glosario.
^ Kʼelo glosario.
^ O: «smomnichʼonun»; «stsʼunbalun»; «stsʼakalulalun».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «li kʼusi tskʼan bekʼtalile».
