Galatas 4:1-31
4 Vaʼun chaʼa, chkalboxuk avaʼiik ti xkoʼolaj kʼuchaʼal mosoil kʼalal olol to li buchʼu chichʼ spartee, manchuk mi jaʼ yajval skotol li kʼusitike,
2 yuʼun ventainbil to yuʼun jchabivanejetik xchiʼuk ventainbil yuʼun li jchabinaetike, jaʼ to mi kʼot skʼakʼalil ti kʼusi ora yaloj li stote.
3 Jaʼ jechutik ek kʼalal ololutik toʼoxe, yuʼun mosoinbilutik toʼox yuʼun li snopben balumile.
4 Pe kʼalal tsuts* skʼakʼalil ti kʼusi ora albile, li Diose la stak talel Xnichʼon ti vokʼ* ta stojolal jun antse xchiʼuk ventainat yuʼun li mantale,
5 sventa tsman yoʼ tskolta lokʼel li buchʼutik ventainbilik yuʼun mantale, sventa xkichʼtik chʼamel kʼuchaʼal nichʼnabil.
6 Vaʼun chaʼa, ta skoj ti nichʼnabiloxuke, li Diose la stak talel ta koʼontontik li xchʼul espiritu Xnichʼone, xi tsots chale: «¡Abba,* Tot!».
7 Jaʼ yuʼun maʼuk xa mosoilot, nichʼonilot xa, vaʼun chata aparte ek ta stojolal Dios mi nichʼonilot xae.
8 Pe kʼalal mu toʼox xavojtikinik li Diose, mosoinbiloxuk toʼox yuʼun li buchʼutik maʼuk melel diosetike.
9 Pe avi ti laj xa avojtikinik li Diose, o ti mas lek xkaltike, ti ojtikinbiloxuk xa yuʼun li Diose, ¿kʼuxi xa noʼox ti chasutik yan velta ta stojolal li kʼusitik kʼune xchiʼuk ta stojolal li snopben balumil ti toj chopole xchiʼuk ti chakʼan chakʼotik ta smoso yan veltae?
10 Yakal chachabiik ta jyalel li kʼakʼaletike, li uetike, li yorailtake xchiʼuk li jabiletike.
11 Chixiʼ mi jecheʼ noʼox laj kakʼ kipal ta atojolalike.
12 Ta jkʼanboxuk vokol kermanotak: jech xapas abaik jech kʼuchaʼal voʼone, yuʼun jech toʼox la jpas jba jech kʼuchaʼal li voʼoxuke. Pe muʼyuk kʼusi chopol la apasbeikun.
13 Pe anaʼojik ti la jcholboxuk lekil aʼyejetik ta sba velta ta skoj ti ipun toʼoxe.
14 Akʼo mi kʼot kʼuchaʼal preva ta atojolalik ti li-ipaje, muʼyuk la alabanikun mi jaʼuk bu la apʼajikun;* ti kʼusi noʼoxe, lek la achʼamikun jech kʼuchaʼal jun yaj-anjel Dios, jech kʼuchaʼal Kristo Jesus.
15 ¿Kʼu yuʼun ti muʼyuk xa bu xamuyubajike* chaʼa? Yuʼun laj kil jtuk ti chalokʼes avaʼi sbekʼ asatik sventa chavakʼbeikun ti oyuk kʼuxi xuʼ avuʼunike.
16 Jaʼ yuʼun chaʼa, ¿mi lipas ta avajkontraik ti vaʼ yelan jamal chkalboxuke?
17 Oy tajek ta yoʼontonik ti akʼo lekuk xavilike —pe mu ta slekiluk yoʼontonik ti jech tspasike—, yuʼun oy ta yoʼontonik tsnamajesoxuk ta jtojolal sventa oyuk ta avoʼontonik ti jaʼuk xatsʼakliik batele.
18 Pe lek onoʼox tajek mi oy buchʼu chlokʼ ta yoʼonton tsaʼoxuk ta sventa alekilalike, xchiʼuk mi maʼuk noʼox tsaʼoxuk ti kʼalal te oyun ta atojolalike,
19 kuni nichʼnab, yakal chkaʼibe xkʼuxul alajel yan velta, jaʼ to mi vinaj li stalelal Kristo ta atojolalike.
20 Oy ta koʼonton ti teuk oyun ta atojolalik li avie, xchiʼuk ti jelel kʼu yelan xuʼ jchiʼinoxuk ta loʼile, yuʼun chʼayal tajek koʼonton avuʼunik chkaʼi.
21 Albeikun kaʼi voʼoxuk ti chakʼan tsventainoxuk li mantale: ¿mi yuʼun muʼyuk bu avaʼiojik li Mantale?
22 Jech kʼuchaʼal liʼe, tsʼibabil onoʼox ti oy chaʼvoʼ xnichʼon li Abraane, li june jaʼ yol kiara ants, li yane jaʼ yol kolemal ants;
23 pe li yol kiara antse vokʼ kʼuchaʼal stalel onoʼox chvokʼ li ololetike; yan li yol kolemal antse jaʼ ta sventa li kʼusi albil xa onoʼox skʼoplale.
24 Li kʼusitik taje xuʼ xichʼ tsakel kʼuchaʼal jun lokʼolkʼop; yuʼun jaʼ skʼan xal chaʼtos trato li antsetik taje, li baʼyele jaʼ li Vits Sinai ti chil yalab sventa chkʼotik ta mosoile, taje jaʼ li Agare.
25 Vaʼun chaʼa, li Agare jaʼ smelolal Sinai ti jaʼ jun vits ti te oy ta Arabiae, li ants taje jaʼ skʼoplal li Jerusalen avie, yuʼun oyik ta mosoil xchiʼuk li yalabtake.
26 Pe kolem li Jerusalen ta akʼole xchiʼuk jaʼ jmeʼtik.
27 Yuʼun xi tsʼibabile: «Ants ti mu xanaʼ xa-alaje, kuxetuk avoʼonton; avanan ta muyubajel, ants ti mu xanaʼ kʼu yelan li xkʼuxul alajele; yuʼun jaʼ mas ep yalab li buchʼu iktabile, jaʼ mu sta li buchʼu oy smalale».
28 Jaʼ yuʼun li voʼoxuke kermanotak, jaʼoxuk xnichʼnab li kʼusi albile, jech kʼuchaʼal li Isaake.
29 Jech kʼuchaʼal kʼot ta pasel ta voʼnee, li buchʼu vokʼem ta sventa noʼox bekʼet ti lik skontrain li buchʼu vokʼem ta sventa chʼul espiritue, jaʼ jech li avi eke.
30 Pe ¿kʼusi chal li tsʼibe? «Nutso lokʼel xchiʼuk yol li kiarae, yuʼun li yol kiarae mu xuʼ xichʼ jsetʼuk sparte jech kʼuchaʼal chichʼ li yol kolemal antse.»
31 Jaʼ yuʼun kermanotak, maʼuk yalabutik li kiarae, jaʼ yalabutik li kolemal antse.
Tsʼibetik ta yok vun
^ O: «laj».
^ O: «ayan».
^ Taje jaʼ jpʼel kʼop ta arameo ti jaʼ skʼan xal totile. Jaʼ jech chalik li uni kʼox ololetik kʼalal tskʼopon stotike.
^ O: «mi jaʼuk bu la atubtaikun».
^ O: «pʼij avoʼnike»; «nichim avoʼontonike».
