Kolosenses 1:1-29
1 Voʼon Pabloun, yajtakbolun* Kristo* Jesus ti jech tskʼan yoʼonton Diose. Voʼon xchiʼuk li kermanotik Timoteoe,
2 ta sventa li chʼul* tukʼil ermanoetik ti te oyik ta Kolosas ti jmoj oyik xchiʼuk Kristoe:
Oyuk slekil yutsil oʼontonal* xchiʼuk jun oʼontonal ta atojolalik ti jaʼ chakʼ li Jtotik Diose.
3 Skotol ora ta jtojbekutik ta vokol Dios li Stot Kajvaltik Jesukristo kʼalal ta jpaskutik orasion ta atojolalike,
4 yuʼun laj kaʼikutik ti oy xchʼunel avoʼontonik ta stojolal li Kristo Jesuse xchiʼuk ti akʼanojik skotol li buchʼutik chʼul
5 ta skoj li spatobil avoʼontonik ti te kʼejbil ta vinajele. Li spatobil oʼontonal taje laj xa onoʼox avaʼibeik skʼoplal ta sventa li lekil aʼyejetik* ti jaʼ melel
6 ti te oy ta atojolalike. Jech kʼuchaʼal chchʼi batel li lekil aʼyejetike xchiʼuk ti chpuk batel ta spʼejel balumile, jaʼ jech yakal chkʼot ta atojolalik ek kʼalal laj avaʼibeik skʼoplale xchiʼuk ti lek laj avojtikinik li slekil yutsil yoʼonton Dios ti jaʼ melele.
7 Taje jaʼ li kʼusi la achanik yuʼun Epafras ti jkʼanojkutik xchiʼuk ti jaʼ jchiʼilkutik ta mosoile, jaʼ jun tukʼil jtunel yuʼun Kristo ti jaʼ sventa jlekilalkutike.
8 Jaʼ laj yalbunkutik xtok ti chakʼanvanik ta sventa li chʼul espiritue.*
9 Jaʼ yuʼun, kʼalal laj kaʼibekutik skʼoplale mi jutebuk kiktaoj jbakutik ta spasel orasion ta atojolalik xchiʼuk ta skʼanel ti akʼo xavojtikinik lek li kʼusi tskʼan yoʼonton Dios sventa oyuk lek apʼijilik xchiʼuk ti xavaʼibeik lek smelolal li yojtikinel chakʼ li chʼul espiritue,
10 sventa oyuk lek amelolalik ta stojolal Jeova* yoʼ lekuk tajek xiloxuk kʼalal jech-o tsatin batel lek avuʼunik li lekil abtelale xchiʼuk ti x-epaj batel avuʼunik li yojtikinel lek ta stojolal Diose;
11 jech xtok ichʼik tsatsubtasel ta juʼelal ti yan sba yutsil li yipe, sventa stsʼik avuʼunik skotol li kʼusitike xchiʼuk kuchuk avuʼunik ta muyubajel*
12 kʼalal chatojbeik ta vokol Totil ti jaʼ la stʼujoxuk sventa xata aparteik jech kʼuchaʼal chichʼik li buchʼutik chʼul ti oyik ta luse.
13 Jaʼ la skoltautik lokʼel li ta sjuʼel ikʼal osile, vaʼun jaʼ te laj yakʼutik li ta ajvalilal yuʼun skʼanbil Nichʼone,
14 jaʼ ta stojolal ti kolemutik ta skoj pojelale,* ti laj kichʼtik pasbel perton li jmultike.
15 Li stuke jaʼ slokʼol li Dios ti mu xvinaj ta kʼelele, jaʼ baʼyel* laj yichʼ pasel ta skotol li kʼusitike;
16 jech oxal jaʼ ta stojolal ti laj yichʼ pasel skotol li kʼusitik yantik ta vinajele, li kʼusitik ta sba balumile, li kʼusitik xvinaje, li kʼusitik mu xvinaje, li chotlebaletik sventa ajvalilale, li buchʼutik tspasvanik ta mantale, li ajvaliletike xchiʼuk li buchʼutik oy yabtelike. Jaʼ ta stojolal xchiʼuk jaʼ ta sventa ti laj yichʼ pasel skotol li yan kʼusitike.
17 Jech xtok, te xa onoʼox oy kʼalal chʼabal toʼox skotol li yan kʼusitike xchiʼuk jaʼ ta stojolal ti vul ta lokʼel skotol li yan kʼusitike
18 xchiʼuk jaʼ kʼotem ta jolil yuʼun li bekʼtalile, ti jaʼ li tsobobbaile.* Li stuke jaʼ slikebal, jaʼ baʼyel chaʼkuxi* ta stojolal animaetik sventa jaʼ xkʼot ta baʼyel ta skotol li kʼusitike;
19 yuʼun li Diose lek laj yil ti tsʼakaluk skotol ta stojolal li Jesuse,
20 jech xtok jaʼ ta stojolal ti chchaʼta yav ti kʼu yelan xil sbaik xchiʼuk Dios skotol li yan kʼusitike, jaʼ laj yakʼ jun oʼontonal ta skoj ti la smal xchʼichʼel ta jtel teʼ sventa vokolile,* manchuk mi jaʼ li kʼusitik oy ta sba balumile o mi jaʼ li kʼusitik oy ta vinajele.
21 Ta melel nom toʼox oyoxuk xchiʼuk jkontrainvanejoxuk toʼox, yuʼun jaʼ toʼox te avakʼoj anopbenik li ta abtelal ti toj chopole,
22 la xchaʼta yav yuʼun Dios ti kʼu yelan xavil abaik xchiʼuke, taje jaʼ ta skoj li sbekʼtal Jesus ti chame, sventa chʼul xakʼotik, chʼabaluk apaltailik xchiʼuk muʼyukuk chavichʼ tabel amulik ta stojolal,
23 taje jaʼ sventa mi jech-o li xchʼunel avoʼontonike, ti lekuk-o tsots vaʼaloxuk li ta snakleb nae, ti jechuk-o xapasike, ti mu xavakʼ abaik ta nikesel ta sventa li spatobil oʼontonal ta sventa li lekil aʼyejetik laj avaʼiike xchiʼuk ti laj xa yichʼ cholbel skotol li kʼusitik pasbil ti oy ta yolon vinajele. Ta sventa li lekil aʼyejetik taje jaʼ kʼot ta kabtel ti voʼon Pabloune.
24 Xkuxet koʼonton avi ti chkil jvokol ta akojike, jech xtok voʼon yakal chkilbe stsatsal vokol li Kristoe xchiʼuk skʼan to xkil batel jvokol ta jbekʼtal ta sventa slekilal li sbekʼtale, ti jaʼ li tsobobbaile.
25 Likʼot ta jtunel yuʼun li tsobobbail taje, ti laj yakʼbun kabtel Dios jech kʼuchaʼal jun jchabina ti jaʼ sventa alekilalike, ti lek tsʼakal ta jcholbe li skʼop Diose,
26 ti jaʼ li kʼusi chʼul ti mukul toʼox skʼoplal* ta stojolal li kʼusitik oy ta balumil* ta voʼnee xchiʼuk ta stojolal li jaykʼol kuxlejal* ta voʼnee. Pe li avie akʼbat xa yilik li buchʼutik chʼul yuʼune,
27 yuʼun lek laj yil li Dios ti laj yakʼbe yojtikin jyanlumetik li skʼulejal smukʼulal li kʼusi chʼul ti mukul skʼoplale, taje jaʼ Kristo ti jmoj oy achiʼukike. Jech xtok, li spatobil avoʼontonike jaʼ ti jmoj chavichʼ amukʼulalike.
28 Li buchʼu taje jaʼ yakal ta jpukbekutik skʼoplal, skotolik ta jtojobtaskutik xchiʼuk ta jchanubtaskutik ta sventa skotol li pʼijilale, sventa lekuk yijik ta mantal ta jvaʼankutik ta stojolal Dios skotol krixchanoetik ti jmoj oyik xchiʼuk Kristoe.
29 Jech oxal tsots chi-abtej ta melel, kakʼojbe-o yipal ta skoj li koltael chakʼ ti tsots ch-abtej ta jtojolale.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «pʼijil oʼnal»; «nichim oʼontonal».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
