Kolosenses 2:1-23
2 Yuʼun oy ta koʼonton ti akʼo xavakʼik venta ti tsots tajek chkakʼ persa ta atojolalike xchiʼuk ta stojolal li buchʼutik te oy ta Laodisea xchiʼuk ta stojolal skotol li buchʼutik muʼyuk bu yilojbeikun jsate.
2 Taje jaʼ sventa xpatbat yoʼontonik xchiʼuk ti jmojuk tajek oyik ta skoj ti skʼanoj sbaike xchiʼuk ti oyuk yuʼunik skotol li kʼulejal ta sventa li batsʼi melel yaʼiobil smelolale, sventa xojtikinik lek li kʼusi chʼul ti mukul skʼoplal yuʼun Diose, jaʼ xkaltik, li Kristoe.
3 Jaʼ te nakʼal lek ta stojolal skotol li kʼulejal ta sventa pʼijilal xchiʼuk ta sventa yojtikinele.
4 Ti jech chkalboxuke jaʼ sventa muʼyukuk buchʼu sloʼlaoxuk ta skoj ti chakʼik ta chʼunel li kʼusi chalike.
5 Akʼo mi chʼabal te oyun, te oyoxuk ta koʼonton, xkuxet koʼonton* chkil ti lek xcholet kʼusi chapasike xchiʼuk ti staoj-o yav li xchʼunel avoʼontonik ta stojolal Kristoe.
6 Jech oxal, jech kʼuchaʼal achʼamojik li Kristo Jesus ti jaʼ Kajvaltike, jechuk-o me jmoj oyoxuk xchiʼuk,
7 akʼo me lek avibelik ta stojolal xchiʼuk vaʼano me abaik lek ta stojolal xchiʼuk lekuk-o tsots li xchʼunel avoʼontonike, jaʼ jech kʼuchaʼal laj avichʼik chanubtasele, akʼo vinajuk lek ti chatojik ta vokole.
8 Kʼelo me abaik lek ti mu me buchʼu chukul xikʼoxuk batel ta sventa li spʼijil krixchanoetike xchiʼuk ta sventa li loʼlael ti mu kʼusi xtun-o ti jaʼ li kʼusitik nopem xaʼi tspasik krixchanoetike, ti jaʼ li snopben balumile, maʼuk li chanubtasel yuʼun Kristoe;
9 yuʼun lek tsʼakal skotol stalelal Dios ta stojolal li Kristoe.
10 Jech oxal ataojik xa skotol ta stojolal, ti jaʼ jolil yuʼun skotol ajvalil xchiʼuk li buchʼutik oy yabtele.
11 Jech oxal laj avichʼik sirkunsision* ta sventa ti kʼu yelan xavil abaik xchiʼuke, pe maʼuk li sirkunsision ti ta skʼob noʼox krixchano chichʼ akʼele, moʼoj, jaʼo kʼalal la ajip atenik komel li abekʼtalike. Laj avichʼik sirkunsision ta sventa li sirkunsision ti jaʼ yuʼun Kristoe.
12 Yuʼun li voʼoxuke jmoj laj avichʼik mukel xchiʼuk Kristo, taje jaʼ ta sventa li ichʼvoʼ yuʼune xchiʼuk jaʼ ta sventa ti lek xavil abaik xchiʼuk ti jmoj lachaʼkuxiik talel ta sventa li xchʼunel avoʼontonik li ta yabtel Dios ti toj echʼ xa noʼox tsotse, ti jaʼ la xchaʼkuxes li Kristoe.
13 Jech xtok, li Diose jmoj laj yakʼ akuxlejalik xchiʼuk li taje, akʼo mi chamemoxuk toʼox ta sventa li amulike xchiʼuk manchuk mi muʼyuk avichʼojik sirkunsision ta abekʼtalik. Ta slekil yoʼonton la spas perton skotol li jmultike
14 xchiʼuk la stupʼ li vun tsʼibabil ta skʼob krixchanoetik ti jaʼ te tsʼibabil li mantaletike xchiʼuk ti skontrainojutik toʼoxe. La slokʼes ta be kʼalal la sbaj ta laux ta jtel teʼ sventa vokolile.*
15 La stsal ta jyalel li ajvaliletik xchiʼuk li buchʼutik oy yabtele, laj yakʼ ta ilel ta stojolal skotol krixchanoetik sventa chakʼ ta ilel ti tsalbilik xae xchiʼuk laj yikʼ batel kʼuchaʼal jchukeletik ta skoj taje.*
16 Jech oxal chaʼa, mu me xavakʼ buchʼu xchapanoxuk ta sventa li kʼusi chalajesike xchiʼuk ta sventa li kʼusi chavuchʼike o ta sventa li xchabiel kʼine, o mi jaʼ ta sventa li xchabiel achʼ Ue* o mi jaʼ ta sventa li xchabiel Savadoe.*
17 Taje jaʼ snakʼobal li kʼusi chtale, pe jaʼ yuʼun Kristo li kʼusi melele.
18 Mu me smak amotonik li buchʼu kʼupil chil ti bikʼit chakʼ sba ta alele xchiʼuk ti jech ch-ichʼvan ta mukʼ kʼuchaʼal ch-ichʼvanik ta mukʼ li anjeletike.* Li krixchano taje mu stakʼ nikesel ta skoj li kʼusi yiloje xchiʼuk muʼyuk srasonal ti xtoyet tajek ta skoj ti jpasmulil krixchanoe,
19 li stuke muʼyuk bu lek te napʼal ta stojolal li jolile, li jolil taje jaʼ chakʼbe li kʼusi chtun yuʼun sjunul li bekʼtalile xchiʼuk ti lek snitanoj sba ta sventa li stsʼakaliltake xchiʼuk ta sventa li xchʼuxuviltake xchiʼuk ti jech chchʼi-o batel ta sventa li Diose.
20 Mi yuʼun jmoj lachamik xchiʼuk Kristo ta sventa li snopben balumile, ¿kʼu yuʼun jech to kuxuloxuk kʼuchaʼal balumil kʼalal jech-o chachʼunik li mantaletik liʼe:
21 «Mu xapikik, mu xapasik preva, mi jaʼuk xajaxilanik»,
22 ti jaʼ skʼoplal skotol li kʼusitik ti chlaj skʼoplal kʼalal chichʼ tunesele, ti smantal noʼox krixchanoetik xchiʼuk ti chanubtasel noʼox yuʼunike?
23 Skotol li kʼusitik taje jaʼ jech ti kʼu yelan tskʼan chichʼ ta mukʼ Dios stuk li jun krixchanoe, bikʼit chakʼ sba yilel xchiʼuk tsots chakʼbe svokol li sbekʼtale, pʼijilal yilel skotol li kʼusitik taje, pe muʼyuk sbalil sventa tspajes li kʼusi tskʼan sbekʼtale.
Tsʼibetik ta yok vun
^ O: «pʼij koʼn»; «nichim koʼonton».
^ Kʼelo glosario.
^ Kʼelo glosario.
^ Jaʼ xkaltik, li jtel teʼ sventa vokolile.
^ Kʼelo glosario.
^ O: «skʼakʼalil kuxob oʼontonal». Kʼelo glosario.
^ Kʼelo glosario.
