Lukas 11:1-54
11 Vaʼun, kʼalal oy bu yakal tspas orasione, xi albat yuʼun jun yajchankʼop kʼalal laj yoʼontone: «Kajval, chanubtasunkutik kʼuxi ta pasel orasion, jech kʼuchaʼal la xchanubtas yajchankʼoptak li Juane».
2 Vaʼun xi albatike: «Xi xavalik kʼalal chapasik orasione: ‹Tot, akʼo yichʼ chʼultajesel* li abie. Akʼo taluk li Ajvalilal avuʼune.
3 Akʼbun li jpankutik* ti kʼu yepal chtun kuʼunkutik avi kʼakʼale.
4 Xchiʼuk pasbunkutik perton jmulkutik jech kʼuchaʼal ta jpasbekutik perton ek li buchʼutik oy yil kuʼunkutike xchiʼuk mu me xavakʼ xiyalkutik ta mulil›».
5 Vaʼun xi laj yal xtoke: «Jnoptik avaʼiik ti oy junuk avamigoik ti chbat akʼoponik ta oʼlol akʼobal ti xi chavalbeike: ‹Amigo, jkʼextik oxibuk apan,
6 yuʼun tal jun kamigo ti jaʼ to vul tal ta nome, vaʼun muʼyuk kʼusi xkakʼbe slajes›.
7 Pe xi tstakʼ tal ta yut nae: ‹Anchan xa. Jmakoj xa lek stiʼ jna, puchʼulun* xa ta tem xchiʼuk kuni nichʼnab. Mu xa xuʼ xilik xchiʼuk mu xuʼ kʼusi xkakʼbot jutebuk›.
8 Chkalboxuk avaʼiik ti chlik yakʼbe li kʼusitik chtun yuʼun li yamigoe, pe maʼuk ta skoj ti yuʼun jaʼ yamigoe, jaʼ ta skoj ti solel te xkʼankʼune.
9 Jaʼ yuʼun chkalboxuk avaʼiik ti xakʼanilanike, vaʼun cha-akʼbatik; saʼilanik, vaʼun chataik; kʼojilanik li tiʼ nae, vaʼun chajambatik.
10 Yuʼun skotol li buchʼu tskʼane ch-akʼbat, skotol li buchʼu tsaʼe tsta xchiʼuk skotol li buchʼu tskʼojilan tiʼ nae chjambat.
11 Melel onoʼox, ¿buchʼu junukal totil avuʼunik ti chon* chakʼbe xnichʼon kʼalal chkʼanbat choye?
12 ¿O mi tsek van chakʼbe kʼalal chkʼanbat ton alakʼe?*
13 Jaʼ yuʼun chaʼa, mi lek li matanaletik xanaʼ xavakʼbeik anichʼnabik akʼo mi toj chopoloxuk li voʼoxuke, ¡buuk xa jech tspas li Atotik te oy ta vinajele, chʼul espiritu chakʼbe li buchʼutik tskʼanike!».
14 Ta mas jelavele la slokʼes jun pukuj ti tspas ta umaʼ li buchʼu chuʼunine. Vaʼun kʼopoj li umaʼ kʼalal lokʼ xaʼox li pukuje xchiʼuk labal sba tajek laj yilik.
15 Pe oy buchʼutik xi lik yalike: «Ta stsatsal Beelsebub* tslokʼes pukujetik, jaʼ li ajvalil yuʼun pukujetike».
16 Pe oy junantik ti persa tskʼanik ti akʼo yakʼ ta ilel junuk senyail* ta vinajel sventa chakʼik ta prevae.
17 Ta skoj ti snaʼoj li kʼusi tsnopike, xi laj yale: «Skotol li ajvalilal ti xchʼakoj skontrainoj sba stuke ta xlaj, xchiʼuk li jpʼej na ti xchʼakoj skontrainoj sba stuke ta xlom.
18 Jaʼ jech ek mi xchʼakoj skontrainoj sba stuk li Satanase, ¿kʼuxi te vaʼal-o li ajvalilal yuʼune? Yuʼun chavalik ti ta stsatsal Beelsebub ta jlokʼes li pukujetike.
19 Mi ta stsatsal Beelsebub ta jlokʼes li pukujetike, ¿buchʼu ta stsatsal tslokʼes pukujetik li anichʼnabike chaʼa? Ta skoj taje, jaʼ chchapanoxuk li anichʼnabike.
20 Pe mi jaʼ ta sniʼ skʼob Dios ta jlokʼes li pukujetike, ta melel liʼ xa me chʼayal avoʼonton la staoxuk li Ajvalilal yuʼun Diose.
21 Kʼalal chchabi spasob mantal jun tsatsal vinik ti lek chapal xchiʼuk yabtejebe, muʼyuk kʼusi chopol tsnuptan li kʼusitik oy yuʼune.
22 Pe kʼalal oy buchʼu chtal kontrainatuk ti jaʼ mas tsotse xchiʼuk ti tstsalate, chpojbat batel skotol li yabtejeb ti spatoj-o yoʼontone, vaʼun vokʼilanbil chbat li kʼusitik oy yuʼun ti pojbate.
23 Skontrainojun li buchʼu muʼyuk oy ta jtojolale, xchiʼuk li buchʼu mu skoltaun ta stsobele ta stani* batel.
24 »Kʼalal chlokʼ ta stojolal jun vinik li jun ibal sba pukuje, te chjelav batel ta taki osiltik sventa tsaʼ bu chkux yoʼonton, pe ta skoj ti chʼabal tstae, xi chale: ‹Chisut batel ta jna ti bu lilokʼ tale›.
25 Pe kʼalal kʼote lek mesbil xchiʼuk lek chapal la sta li nae.
26 Jaʼ yuʼun bat xchiʼuk bat yikʼ tal yan vukvoʼ pukujetik ti mas to toj chopolike, ti jaʼ mu sta li stuke, vaʼun ochik batel xchiʼuk te nakiik. Jaʼ yuʼun mas to toj tsots bat svokol li vinike, jaʼ mu sta li ta baʼyele».
27 Pe kʼalal jaʼo yakal chal taje, te tsots kʼopoj tal jun ants ta oʼlol epal krixchanoetik, xi laj yale: «¡Xmuyubaj noʼox* li ants ti la svokʼesote* xchiʼuk ti la xchuʼuntasote!».
28 Pe xi laj yal li Jesuse: «Moʼoj, ¡jaʼ xmuyubajik noʼox li buchʼutik chaʼiik li skʼop Diose xchiʼuk ti tspasik li kʼusi chale!».
29 Xi lik yal kʼalal lik stsob sbaik tal li epal krixchanoetik ta stojolale: «Toj chopol li jkʼol kuxlejal liʼe; tsabeik junuk senyail, pe muʼyuk bu ch-akʼbat yilik junuk senyail, jaʼ noʼox li senyail Jonase.
30 Jech kʼuchaʼal jaʼ senyail kʼot ta stojolal jniniveetik li Jonase, li Xnichʼon krixchanoe jaʼ me senyail chkʼot ek ta stojolal li jkʼol kuxlejal liʼe.
31 Li meʼ ajvalil ta sure chchaʼkuxi tal ta Skʼakʼalil Chapanel* xchiʼuk li krixchanoetik ta jkʼol kuxlejal liʼe, vaʼun chakʼ ta ilel ti oy smulike, yuʼun li stuke nom tajek bu lik tal sventa tal yaʼibe li spʼijil Salomone, pe ¡kʼelo avilik!, oy to buchʼu liʼ oy ti mas mukʼ skʼoplale, ti jaʼ mu sta li Salomone.
32 Li krixchanoetik ta Ninivee chchaʼkuxiik tal ta Skʼakʼalil Chapanel xchiʼuk li jkʼol kuxlejal liʼe, vaʼun chakʼik ta ilel ti oy smul li jkʼol kuxlejal liʼe, yuʼun li stukike la sutes yoʼontonik kʼalal cholbatik mantal yuʼun Jonase. Pe ¡kʼelo avilik!, oy to buchʼu liʼ oy ti mas mukʼ skʼoplale, ti jaʼ mu sta li Jonase.
33 Kʼalal tstsan kantil li jun krixchanoe, maʼuk te chakʼ ti bu mukule xchiʼuk muʼyuk bu tsnujanbe moch,* moʼoj, tskajan ta skajleb sventa xilbeik xojobal li buchʼutik ch-och batel ta yut nae.
34 Li slusal abekʼtale jaʼ li sbekʼ asate. Kʼalal tukʼ skʼeloj batel* li sbekʼ asate xojobaj noʼox sjunul li abekʼtal eke, pe mi ch-itʼixaje,* ta ikʼal osil me oy li abekʼtal eke.
35 Kʼelo me aba chaʼa, ti mu me jaʼuk ikʼal osil li sakil osil oy avuʼune.
36 Jech oxal chaʼa, mi xojobaj noʼox sjunul li abekʼtale, ti muʼyuk jutebuk ikʼal osil ta stojolale, xojobaj noʼox sjunul jech kʼuchaʼal xjapet noʼox xojobal kantil ta atojolale».
37 Kʼalal laj xaʼox yal taje, kʼanbat yuʼun jun jfariseo ti akʼo xbat veʼuk ta snae. Vaʼun och batel, te choti ta veʼel ta mexa.
38 Pe labal to sba laj yil li jfariseo kʼalal laj yil ti muʼyuk bu baʼyel la spok skʼob* kʼalal yuʼun xa chveʼe.
39 Pe xi albat yuʼun li Kajvaltike: «Kʼelo avil, li voʼoxuk ti jfariseooxuke, chapokbeik lek li spat xokon kopa xchiʼuk platoe, pe li yut avoʼontonike nojem ta xpichʼetel oʼontonal xchiʼuk ta kʼusitik toj chopol.
40 ¡Bol* krixchanoetik! Li Buchʼu la spasbe spat xokone jaʼ la spasbe xtok li yute, ¿mi mu jechuk?
41 Jech oxal chaʼa, lokʼuk ta avoʼontonik xapasbeik kʼusitik lek li buchʼutik abol sbaike, ¡kʼelo avilik! sakoxuk me ajunulik mi jech chapasike.
42 Pe ¡toj abol abaik, jfariseoetik, yuʼun chavakʼik li diesmo* ta sventa alavena,* lula xchiʼuk skotol li itajetike, pe jaʼ muʼyuk yakaloxuk spasel li tukʼilal xchiʼuk li kʼanelal ta stojolal Diose! Persa onoʼox skʼan pasel maʼ taje, pe maʼuk skʼan xal ti jaʼ muʼyuk xa bu chapasik li yan kʼusitike.
43 ¡Toj abol abaik, jfariseoetik, yuʼun jaʼ akʼanojik tajek li sbacholal chotlebal ta nail tsobobbailetike xchiʼuk lek xa chavaʼiik ti chakʼoponatik ta chʼivite!
44 ¡Toj abol abaik, yuʼun xakoʼolajik kʼuchaʼal mukinal ti mu xvinaj leke xchiʼuk ti te chanavik ta sba li krixchanoetike, pe mu snaʼik!».
45 Oy buchʼu xi laj yal ti lek chanem ta mantale: «Jchanubtasvanej, chopol chkaʼikutik ek li kʼusi laj avale».
46 Vaʼun xi laj yale: «¡Toj abol abaik ek li voʼoxuk ti lek chanemoxuk ta Mantale, yuʼun alal ikatsil chavakʼbeik xkuch li krixchanoetike, pe li voʼoxuke mi jaʼuk jsetʼ xakʼan xapik ta junuk sniʼ akʼobik li ikatsile!
47 »¡Toj abol abaik, yuʼun chavaʼanbeik smukinal li j-alkʼopetike, pe jaʼ la smilik j-alkʼopetik li amoltotakik ta voʼnee!
48 Ta melel, anaʼojik lek li kʼusitik la spas amoltotakik ta voʼnee; akʼo mi jech, koʼol avoʼontonik xchiʼukik, yuʼun jaʼ la smilik j-alkʼopetik li amoltotakik ta voʼnee, yan li voʼoxuke chavaʼanbeik smukinalik.
49 Ta skoj taje, xi laj yal li spʼijil Dios eke: ‹Ta jtak batel j-alkʼopetik xchiʼuk jtakboletik ta stojolalik, pe oy junantik ti tsmilik xchiʼuk ti tskontrainike,
50 sventa jaʼ sbainbeik* xchʼichʼel skotol j-alkʼopetik li jkʼol kuxlejal liʼe, ti lik yichʼ malel tal kʼalal lik tal stsʼunbal krixchanoetike,
51 ti te lik tal ta xchʼichʼel Abel kʼalal to ta xchʼichʼel Sakariase, ti te laj yichʼ milel ta stsʼel skajleb matanal, ta yeloval nae›.* Jech, chkalboxuk avaʼiik ti jaʼ tsbain* li jkʼol kuxlejal liʼe.
52 »¡Toj abol abaik li voʼoxuk ti lek chanemoxuk ta Mantale, yuʼun la apojbeik li syaveal yojtikinobile. Muʼyuk la-ochik li voʼoxuke xchiʼuk la amakik ta be xtok li buchʼutik yakal xaʼox ch-ochike!».
53 Jaʼ yuʼun kʼalal lokʼ batel tee, li jchanubtasvanejetik ta Mantal xchiʼuk li jfariseoetike lik svoliik sventa chilbajinik xchiʼuk ep tajek kʼusitik lik sjakʼilanbeik,
54 yuʼun tskʼelik kʼuxi xuʼ stsakik ta skoj li kʼusitik chale.
Tsʼibetik ta yok vun
^ O: «chʼul ilbil; chʼul chichʼ tsakel ta mukʼ».
^ Kʼelo glosario.
^ O: «metselun»; «mocholun»; «taʼalun».
^ O: «kiletel chon».
^ O: «ton kaxlane»; «ton mute».
^ Kʼelo glosario.
^ Kʼelo glosario.
^ O: «staki»; «sten».
^ O: «Pʼij noʼox yoʼn»; «Nichim noʼox yoʼonton».
^ O: «ti la-ayan yuʼune».
^ Kʼelo glosario.
^ S.gr.: «tsnujanbe jun moch ti chtun ta spʼisobil kʼusitike».
^ O: «melel; lek noʼox».
^ S.gr.: «chopol; toj chopol».
^ Jaʼ skʼoplal ti muʼyukuk yikʼobalik jech kʼuchaʼal chal Mantale.
^ O: «Sonso».
^ Kʼelo glosario.
^ O: «tulnichim»; «tuilnichim»; «tunichim»; «yaraveno».
^ O: «xkʼanbatik».
^ O: «temploe».
^ O: «chkʼanbat».
