Lukas 12:1-59
-
Slevadurail jfariseoetik (1-3)
-
Jaʼ xiʼtaik li Diose, maʼuk li krixchanoetike (4-7)
-
Chal ti xojtikin Kristoe (8-12)
-
Lokʼolkʼop ta sventa jun bol jkʼulej vinik (13-21)
-
Mu xa xavul avoʼontonik (22-34)
-
Uni jtsop chij (32)
-
-
Vikʼiluk jsatik (35-40)
-
Li tukʼil jchabina xchiʼuk li buchʼu maʼuk tukʼil jchabinae (41-48)
-
Tal chʼakvankun, maʼuk tal kakʼ jun oʼontonal (49-53)
-
Skʼan snaʼik skʼelel li kʼusi chkʼot ta pasele (54-56)
-
Chapano akʼopik (57-59)
12 Vaʼun chaʼa, kʼalal jaʼo la stsob sbaik tal ta smilal noʼox krixchanoetik ti chpechʼilan xa sbaik ta tekʼele, xi lik yalbe baʼyel li yajchankʼoptake: «Kʼelo me abaik ta skoj slevadurail* li jfariseoetike, ti jaʼ li loʼlavaneje.
2 Pe muʼyuk kʼusi lek nakʼal ti muʼyuk chichʼ vinajesele xchiʼuk muʼyuk kʼusi mukul ti muʼyuk chichʼ akʼel ta naʼele.
3 Jech oxal chaʼa, li kʼusi chavalik ta ikʼal osile chichʼ aʼiel ta sakil osil, li kʼusi chavalbe abaik ta achikinik ta akuartoike luchul ta joljol na chichʼ alel batel.
4 Jech xtok, chkalboxuk kamigotak ti mu xaxiʼtaik li buchʼu xmil yuʼun abekʼtalike pe ti mu xa kʼusi xuʼ yuʼun spasel ta tsʼakale.
5 Pe chkalboxuk avaʼiik li buchʼu skʼan xaxiʼtaike: jaʼ xiʼtaik li Buchʼu xuʼ sjipoxuk ochel ta Jeena* kʼalal smilojoxuk xaʼoxe. Jech, chkalboxuk avaʼiik, jaʼ xiʼtaik li Buchʼu taje.
6 Xman-o voʼkot saktarin* ta uni chaʼsep takʼin* ti jutuk sbalile, ¿mi mu jechuk? Akʼo mi jech, mi jkotuk chʼayem ta sjol li Diose.
7 Pe li voʼoxuke kʼalal to ta stsotsil ajolik chapbil skotol. Mu xaxiʼik; yuʼun voʼoxuk mas tsots akʼoplalik, jaʼ xkom to li epal saktarine.
8 »Chkalboxuk ti buchʼu chal ta stojolal krixchanoetik ti xojtikinune, jaʼ jech chal ek li Xnichʼon krixchano ta stojolal yaj-anjeltak Dios ti xojtikin taje.
9 Pe li buchʼu tspʼajun ta stojolal krixchanoetike jaʼ jech ta xichʼ pʼajel ta stojolal yaj-anjeltak Dios ek.
10 Jech xtok, li buchʼu chchopol kʼopoj ta stojolal Xnichʼon krixchanoe ta xichʼ pasbel perton, yan li buchʼu chchopol kʼopoj ta stojolal chʼul espiritue muʼyuk chichʼ pasbel perton.
11 Kʼalal chavichʼik ikʼel batel ta stojolal epal krixchanoetik,* ta stojolal buchʼutik tsots yabtelik yuʼun ajvaliletik xchiʼuk ta stojolal j-abteletike, mu xavat avoʼontonik ta sventa ti kʼuxi o ti kʼusi chavalik sventa chapoj abaike,
12 yuʼun jaʼ chchanubtasoxuk chʼul espiritu kʼusi skʼan xavalik li vaʼ orae».
13 Vaʼun xi albat yuʼun jun vinik ti te kapal ta epal krixchanoetike: «Jchanubtasvanej, albo li jbankil ti akʼo koʼol jchʼakbe jbakutik li kʼusi chkichʼkutike».*
14 Xi la stakʼbe li vinike: «Chiʼiltik, ¿buchʼu la svaʼanun ta jchapanvanej avuʼunik o ti voʼon ta jchʼak li kʼusitik oy avuʼunike?».
15 Vaʼun xi albatike: «Vikʼiluk me lek asatik xchiʼuk kʼelo me abaik ta sventa skotol li xpichʼetel oʼontonale, yuʼun kʼalal ep kʼusitik oy yuʼun li jun krixchanoe, maʼuk tsta-o xkuxlejal li kʼusitik oy yuʼune».
16 Vaʼun albatik jun lokʼolkʼop, xi laj yale: «Oy jun jkʼulej vinik ti lek laj yakʼ li kʼusitik la stsʼun ta yosile.
17 Jech oxal chaʼa, xi lik snop ta yoʼontone: ‹¿Kʼusi van ta jpas? Mu xa jnaʼ bu chkakʼ li kʼusitik lokʼ kuʼune›.
18 Jech oxal xi laj yale: ‹Laj xa jnaʼ kʼusi ta jpas: ta jlomes li snail kʼusitik oy kuʼune, vaʼun ta jvaʼan mas mukʼtik, te ta jtsob skotol li kʼusitik la jtsʼune xchiʼuk skotol li kʼusitik oy kuʼune,
19 xchiʼuk xi chkalbe jbae: «Vinik, oy ep kʼusitik kʼejel avuʼun sventa jayibuk jabil; junuk avoʼonton, veʼan noʼox, uchʼbolajan, kʼupino avaʼi li kʼusitik oy avuʼune»›.
20 Pe xi albat yuʼun li Diose: ‹Bol* vinik, chacham ta akʼobaltik tana. Vaʼun chaʼa, ¿buchʼu chichʼ komel li kʼusitik la atsobe?›.
21 Jaʼ jech chkʼot ta stojolal li buchʼu tstsob skʼulejal stuke, pe ti maʼuk jkʼulej ta stojolal li Diose».
22 Vaʼun xi laj yalbe li yajchankʼoptake: «Jaʼ yuʼun chkalboxuk ti mu xa xavul avoʼontonik kʼuxi chakuxiik ta sventa ti kʼusi chalajesik o ta sventa li abekʼtalik ti kʼusi chalapike.
23 Yuʼun jaʼ mas tsots skʼoplal li akuxlejalike jaʼ mu sta li aveʼelike, xchiʼuk jaʼ mas tsots skʼoplal li abekʼtalike jaʼ mu sta li akʼuʼ apokʼike.
24 Nopbeik skʼoplal li jojetike: leʼe mu snaʼ x-ovolajik mi jaʼuk snaʼ stsob sveʼelik; jech xtok chʼabal snail sveʼelik. Akʼo mi jech, makʼlinbilik yuʼun Dios. ¿Mi mu jaʼuk mas tsots akʼoplalik li voʼoxuke, ti jaʼ mu sta li mutetike?
25 ¿Buchʼu junukal avuʼunik ti xuʼ snatubtas jlikeluk xkuxlejal ta skoj ti chavul avoʼontonike?
26 Yuʼun mi mu xuʼ avuʼunik spasel li kʼusi toj bikʼit taje, ¿kʼu yuʼun chavul avoʼontonik ta skoj li yan kʼusitike?
27 Nopik kʼuxi chchʼi li nichimetike:* muʼyuk bu tsots ch-abtejik xchiʼuk muʼyuk bu chnaujik; pe chkalboxuk avaʼiik ti mi jaʼuk sta jech yutsil skʼuʼ spokʼ la slap Salomon ta sjunul smukʼulal kʼuchaʼal li nichimetik taje.
28 Jaʼ yuʼun chaʼa, mi jaʼ jech chakʼbe skʼuʼ spokʼ tsʼiʼleletik ta osiltik li Diose, ti liʼ to oyik avie, pe ti chichʼ tikʼel ta orno okʼome, ¡buuk xa jech chakʼ akʼuʼ apokʼik li voʼoxuke, krixchanoetik ti jutuk xchʼunel avoʼontonike!
29 Jech oxal chaʼa, mu xa xavul avoʼontonik ta saʼel li kʼusi chalajesik xchiʼuk li kʼusi chavuchʼike, mu xa xavul tajek avoʼontonik.
30 Yuʼun taje jaʼ li kʼusitik batem tajek ta yoʼonton saʼel li krixchanoetik ta balumile, pe li Atotike snaʼoj me ti chtun avuʼunik li kʼusitik taje.
31 Jaʼ mas lek saʼilanik li Ajvalilal yuʼune, vaʼun ta me xakʼboxuk li kʼusitik taje.
32 »Mu xaxiʼ, uni jtsop chij, yuʼun li Atotike snopoj xa chakʼboxuk li Ajvalilale.
33 Chonik li kʼusitik oy avuʼunike, akʼik matanal sventa chakʼuxubinvanik.* Paso yav atakʼinik ti mu snaʼ xlaje, jaʼ xkaltik, tsobo akʼulejalik ta vinajel ti mu xlaj skʼoplale, ti bu mu xnopaj batel li j-elekʼe xchiʼuk ti bu mu x-och xchanule.
34 Yuʼun ti bu oy akʼulejalike jaʼ te oy ek li avoʼontonike.
35 »Alapojuk me akʼuʼ apokʼik xchiʼuk chapalukoxuk me* xchiʼuk tsanaluk me li akantilike,
36 xchiʼuk skʼan me jechoxuk kʼuchaʼal viniketik ti tsmala yajvalik kʼalal tsut tal ta skʼinal nupunele, yuʼun kʼalal mi kʼot skʼojilan tiʼ nae, ta anil noʼox tsjambeik.
37 ¡Xmuyubajik noʼox* li mosoiletik ti vikʼil sat chkʼot taatikuk yuʼun li yajvalike! Ta melel chkalboxuk avaʼiik ti yajvalike tslap skʼuʼ spokʼ* sventa chtun ta stojolalik xchiʼuk chakʼ akʼo xchotiik ta veʼel ta mexa, vaʼun chnopaj tal ta stojolalik xchiʼuk ch-akʼbat sveʼelik.
38 Manchuk mi ta yorail xchaʼkojal chabivanej* ta akʼobaltik chkʼot, o mi ta yorail yoxkojal chabivanej* ta akʼobaltik chkʼot, ¡xmuyubajik noʼox me mi jech vikʼil-o satike!
39 Pe naʼik me liʼe: ti lajuk snaʼ yajval na jayib ora ta akʼobal chtal li j-elekʼe, muʼyuk bu xakʼ akʼo x-och j-elekʼ ta sna ti jechuke.
40 Li voʼoxuk eke akʼik ta ilel ti chapaloxuke, yuʼun jaʼo chtal li Xnichʼon krixchano kʼalal maʼuk yorail anopojike».
41 Vaʼun xi laj yal li Pedroe: «Kajval, ¿mi voʼonkutik noʼox chavalbunkutik li lokʼolkʼop taje, o mi jkotolkutik?».
42 Vaʼun xi la stakʼ li Kajvaltike: «¿Buchʼu jaʼ ta melel li tukʼil jchabina, ti pʼije, ti ch-akʼbat sbain skotol li yaj-abteltak yajval sventa chakʼbe sveʼel ta yorail ti kʼu yepal chtun yuʼunike?
43 ¡Xmuyubaj noʼox me mi jech yakal tspas ta xtaat yuʼun yajval li mosoil taje!
44 Ta melel chkalboxuk avaʼiik ti ta me svaʼan sventa chakʼbe sbain skotol li kʼusitik oy yuʼune.
45 Pe mi oy junuk velta xi chlik snop ta yoʼonton li mosoil taje: ‹Muʼyuk to chtal li Kajvale›, vaʼun chlik smaj li yan jtuneletike, chlik ta veʼel, ta uchʼbolajel xchiʼuk ta yakubel,
46 pe kʼalal maʼuk skʼakʼalil snopoj xchiʼuk ti maʼuk yorail snaʼoj chkʼot yajval li mosoile jaʼo me chkʼot, jaʼ yuʼun, tsots chakʼbe stoj smul xchiʼuk jaʼ te chbat yakʼbe xchiʼin li buchʼutik muʼyuk tukʼike.
47 Vaʼun li mosoil ti laj yaʼibe smelolal li kʼusi tskʼan yoʼonton yajvale, pe ti muʼyuk bu la xchapan sbae xchiʼuk ti muʼyuk bu la spas li kʼusi kʼanbat yuʼun yajvale ep chichʼ majel.
48 Yan li buchʼu muʼyuk bu laj yaʼibe smelolal xchiʼuk ti la spas li kʼusitik ti sta-o majele, jutuk noʼox chichʼ majel. Ta melel, skotol li buchʼu ep kʼusi ch-akʼbate, ep kʼusi chkʼanbat; li buchʼu ep kʼusi ch-akʼbat sventaine, mas to ep kʼusi chkʼanbat ti mu xa staleluk jeche.
49 »Tal jtsan kʼokʼ ta balumil, pe ¿kʼusi to mas tskʼan koʼonton mi tsan xaʼoxe?
50 Ta melel, oy jun ichʼvoʼ ti persa chkichʼe, ¡kʼu to yepal chkil-o jvokol jaʼ to mi tsutse!*
51 ¿Mi chanopik ti tal kakʼ jun oʼontonal ta balumile? Moʼoj, chkalboxuk avaʼiik ti mu jechuke, yuʼun tal chʼakvankun.
52 Yuʼun liʼ ta ora xchiʼuk ta jelavele ta xchʼak sbaik li voʼob ti nakalik ta jpʼej nae, li oxvoʼe tskontrainik li chaʼvoʼe, li chaʼvoʼe tskontrainik li oxvoʼe.
53 Ta xchʼak sbaik, li totile tskontrain xnichʼon, li nichʼonile tskontrain stot; li meʼile tskontrain stseb, li tsebe tskontrain smeʼ; li meʼalibale tskontrain yalib, li alibale tskontrain smeʼalib».
54 Vaʼun chaʼa, xi laj yalbe ek li epal krixchanoetike: «Kʼalal chavilik chlik tal tok ta smaleb Kʼakʼale, xi chavalik ta orae: ‹Ta xtal ikʼaloʼ›, vaʼun jech chkʼot ta pasel.
55 Kʼalal chavilik ti xjumet tal ikʼ ta sure, xi chavalike: ‹Toj kʼux kʼakʼal tana›,* vaʼun jech chkʼot ta pasel.
56 Jloʼlavanejetik, xanaʼik skʼelel kʼu yelan li balumil xchiʼuk vinajele, pe ¿kʼuxi ti mu xanaʼik skʼelel li kʼusi chkʼot ta pasel li avie?
57 ¿Kʼu yuʼun mu xanop atukik ek ta sventa li kʼusi tukʼe?
58 Jech kʼuchaʼal liʼe, kʼalal chbat achapan akʼopik ta stojolal ajvalil xchiʼuk li avajkontrae, kʼelo kʼusi xuʼ xapas sventa xchapaj akʼopik kʼalal yakal to chaxanavik batel ta bee, sventa mu xbat yakʼot ta skʼob jchapanvanej, vaʼun li jchapanvaneje chakʼot ta skʼob jtunel,* te une tstikʼot ta chukel li jtunele.
59 Chkalbot avaʼi ti ta melel mi jaʼuk me bu chalokʼ ta chukel jaʼ to mi toj avuʼun li slajeb sentavoe».
Tsʼibetik ta yok vun
^ Kʼelo glosario.
^ Jaʼ ti bu chchikʼik kʼaʼep ta spat Jerusalene. Kʼelo glosario.
^ O: «chʼipchʼip».
^ S.gr.: «chaʼsep asarion».
^ O: «ta yeloval nail tsobobbailetik».
^ O: «li jrextokutike»; «li jpartekutike».
^ O: «Sonso».
^ S.gr.: «lirio nichim».
^ Kʼelo glosario.
^ S.gr.: «chukuluk me lek achʼutik».
^ O: «Pʼij noʼox yoʼnik»; «Nichim noʼox yoʼontonik».
^ O: «chchuk lek xchʼut».
^ Chlik van ta baluneb ora ta akʼobal jaʼ to tstsuts ta oʼlol akʼobal.
^ Chlik van ta oʼlol akʼobal jaʼ to tstsuts ta oxib ora ta sob.
^ O: «laje».
^ O: «Toj kʼixin tana».
^ O: «mayol».
