Lukas 13:1-35
-
Tsutes yoʼontonik o mi chlajik (1-5)
-
Lokʼolkʼop ta sventa li igo ti mu xakʼ sate (6-9)
-
Poxtaj ta skʼakʼalil Savado jun ants ti ipe (10-17)
-
Lokʼolkʼop ta sventa bekʼ mostasa xchiʼuk levadura (18-21)
-
Skʼan tsots xichʼ akʼbel yipal sventa xij-och li ta bikʼit tiʼ nae (22-30)
-
«Vet» li Erodese (31-33)
-
Laj yat yoʼonton ta stojolal Jerusalen li Jesuse (34, 35)
13 Li vaʼ kʼakʼale, oy buchʼutik te laj yalbeik Jesus kʼu yelan milatik yuʼun Pilato li jgalileaetik kʼalal jaʼo te chakʼik milbil matanale.
2 Jech oxal xi takʼbatike: «¿Mi chanopik ti jaʼ mas to toj tsots smulik li jgalileaetik ta skoj ti vaʼ yelan tsots vokol la snuptanike, ti jaʼ mu sta jech smulik li yan jgalileaetike?
3 Chkalboxuk avaʼiik ti mu jechuke; jech oxal chaʼa, mi mu xasutes avoʼontonike jaʼ me jech chalaj akotolik ek.
4 O ti vaxaklajunvoʼ chamik ta skoj ti lajik ta netʼel ta toyol kʼelob osil ta Siloame, ¿mi chanopik ti jaʼ mas to toj tsots smulik ti vaʼ yelan la snuptanike, ti jaʼ mu sta jech skotol li yan krixchanoetik te nakalik ta Jerusalene?
5 Chkalboxuk avaʼiik ti mu jechuke; jech oxal chaʼa, mi mu xasutes avoʼontonike jaʼ me jech chalaj akotolik ek».
6 Vaʼun xi lik yal jun lokʼolkʼope: «Oy jun vinik ti te tsʼunul jtekʼ igo ta stsʼusubtake, tal stulbe sat, pe chʼabal bu la sta.
7 Jech oxal xi laj yalbe li jtsʼuntsʼusube: ‹Oy xa ta oxib jabil liʼ xivaʼvun ta sabel sat li teʼel igoe, pe chʼabal bu jta. ¡Tsʼeto lokʼel! ¿Kʼu yuʼun ti jecheʼ liʼ tsmak balumile?›.
8 Vaʼun xi takʼav li jtsʼuntsʼusube: ‹Kajval, akʼo to te oyuk li jabil liʼe, ta jokʼbe baʼyel li xokontak yoke xchiʼuk chkakʼbe skʼaʼal.
9 Mi laj yakʼ sat ta tsʼakale, lek un bi; pe mi muʼyuke tsʼeto lokʼel›».
10 Vaʼun te chchanubtasvan ta jun nail tsobobbail ta skʼakʼalil Savado.
11 Pe ¡kʼelo avil!, oy jun ants ti oy xa ta vaxaklajuneb jabil ip ta skoj ti uʼuninbil yuʼun jun pukuje, xvujvun chanav xchiʼuk mu stakʼ tukʼ xvaʼi.
12 Kʼalal laj yil li Jesuse, la skʼopon, xi laj yalbee: «Ants, chkol li achamele».
13 Laj yakʼ skʼob ta stojolal xchiʼuk ta ora noʼox tukʼ vaʼi, jaʼ yuʼun lik stoybe skʼoplal Dios.
14 Pe chopol laj yil li bankilal jpasmantal ta nail tsobobbail ta skoj ti poxtavan ta Savado li Jesuse, jaʼ yuʼun xi laj yalbe li epal krixchanoetike: «Oy vakib kʼakʼal sventa xij-abtej; jaʼo xatalik sventa xavichʼik poxtael, pe mu xatalik maʼ ta skʼakʼalil Savadoe».
15 Pe xi takʼbat yuʼun li Kajvaltike: «Jloʼlavanejetik, ¿mi muʼyuk chatitun lokʼel ta sna stot avakaxik o avuroik ta skʼakʼalil Savado sventa chbat avakʼbeik yuchʼ voʼ?
16 Jaʼ yuʼun chaʼa, ¿mi mu lekuk xanaʼik ti xkol lokʼel ta mosoil ta skʼakʼalil Savado li ants liʼe, ti jaʼ stseb Abraan, ti oy xa ta vaxaklajuneb jabil chukbil yuʼun li Satanase?».
17 Vaʼun lik kʼexavuk skotol li yajkontratak ta skoj li kʼusitik laj yale, pe skotol li epal krixchanoetike xkuxet noʼox yoʼontonik* ta skoj li kʼusitik jun yutsil la spase.
18 Vaʼun xi albatike: «¿Kʼusi xkoʼolaj-o li Ajvalilal yuʼun Diose, o kʼusi ta jkoʼoltas-o?
19 Jaʼ xkoʼolaj kʼuchaʼal jpʼej bekʼ mostasa* ti laj yichʼ batel jun vinik sventa chbat stsʼun ta yosile, vaʼun chʼi, pas ta mukʼta teʼ, jech oxal te tal spas stasik ta skʼobkʼobtak li mutetike».
20 Xi to laj yal xtoke: «¿Kʼusi ta jkoʼoltas-o li Ajvalilal yuʼun Diose?
21 Jaʼ xkoʼolaj kʼuchaʼal levadura* ti laj yichʼ batel jun ants sventa chbat svotsʼ ta arina ti oxpʼis spʼisol ti lek mukʼtike, vaʼun la sitʼes skotol li arinae».
22 Vaʼun lik xanavuk ta skotol jteklumetik xchiʼuk ta bikʼit lumetik sventa chbat ta Jerusalen, vaʼun te chchanubtasvan batel.
23 Te une, xi albat yuʼun jun vinike: «Kajval, ¿mi jutuk noʼox li buchʼu chkolike?». Xi albatike:
24 «Tsots xavakʼbeik yipal sventa jaʼ te xa-ochik batel li ta bikʼit tiʼ nae, yuʼun chkalboxuk avaʼiik ti ep buchʼutik tskʼan ch-ochike pe mu me xuʼ yuʼunik.
25 Yuʼun kʼalal likem xaʼox smak lek tiʼ na li yajval nae, te vaʼal chakomik ta pana, chakʼojik li tiʼ nae xchiʼuk xi chavalike: ‹Kajval, jamo li tiʼ nae›. Pe xi tstakʼboxuke: ‹Mu jnaʼ bu likemoxuk tal›.
26 Vaʼun xi chlik avalike: ‹La jchiʼinotkutik ta veʼel, ta uchʼbolajel xchiʼuk te la chanubtasvan li ta mukʼtik kaye kuʼunkutike›.
27 Pe xi chalboxuke: ‹Mu jnaʼ bu likemoxuk tal. ¡Lokʼanik batel, voʼoxuk ti chapasik li kʼusi muʼyuk tukʼe!›.
28 Vaʼun jaʼ te ti bu cha-okʼik xchiʼuk ti chakʼux stanal* aveik ta skoj ti chavilik batel li Abraan, Isaak, Jakob xchiʼuk skotol li j-alkʼopetik ta Ajvalilal yuʼun Diose, yan li voʼoxuke chavichʼik jipel lokʼel.
29 Jech xtok, chtal chotiikuk ta veʼel ta Ajvalilal yuʼun Dios li krixchanoetik ta slokʼeb Kʼakʼal, ta smaleb Kʼakʼal, ta norte xchiʼuk ta sure.
30 Pe ¡kʼelo avilik!, li buchʼutik ta slajeb oyike jaʼ chkʼotik ta baʼyel, li buchʼutik ta baʼyel oyike jaʼ chkʼotik ta slajeb».
31 Jaʼo te nopaj tal jlom jfariseoetik li vaʼ orae xchiʼuk xi laj yalbeike: «Lokʼan batel liʼe, batan, yuʼun tskʼan tsmilot li Erodese».
32 Vaʼun xi albatike: «Batanik, xi xavalbeik li vet* taje: ‹¡Kʼelo avil!, ta jlokʼes pukuj xchiʼuk chipoxtavan li avi xchiʼuk okʼome, chaʼej to chlaj koʼonton›.
33 Pe skʼan xibat li avi, okʼom xchiʼuk chaʼeje, yuʼun mu lekuk ti chichʼ milel junuk j-alkʼop ti maʼuk ta Jerusalene.
34 Jerusalen, Jerusalen, ti jaʼ li jmilvanej yuʼun j-alkʼopetike xchiʼuk ti chakʼbe ton li buchʼutik chichʼ takbel batel ta stojolale..., ¡ep ta velta la jkʼan la jtsob avalab jech kʼuchaʼal tstsob ta yolon xikʼ yalab li meʼ alakʼe!* Pe muʼyuk bu xakʼanik li voʼoxuke.
35 ¡Kʼelo avilik! Iktabil chkom li anaike. Xi chkalboxuk avaʼiike: muʼyuk xa me bu chavilikun-o jaʼ to me mi xi laj avalike: ‹¡Akʼo sta bendision li buchʼu chtal ta sbi Jeovae!›».
Tsʼibetik ta yok vun
^ O: «pʼij noʼox yoʼnik»; «nichim noʼox yoʼontonik».
^ Jaʼ jtos bikʼit bekʼ tsʼunobil ti chchʼi ta Palestinae. Taje te van chanibuk metro staylej chchʼi xchiʼuk oy skʼobkʼobtak.
^ Kʼelo glosario.
^ O: «sbakil».
^ Li ta Israele toj manya ilbil li vete.
^ O: «meʼ kaxlane»; «meʼ mute».
