Lukas 2:1-52
2 Li vaʼ kʼakʼale, li Sesar* Augustoe* laj yal mantal ti akʼo yakʼ ta tsakel sbiik skotol li jnaklejetik ta balumile.
2 (Kʼalal laj yichʼ tsakel ta baʼyel velta li sbiike jaʼo ochem ta ajvalil ta Siria* li Kirinioe.)
3 Jaʼ yuʼun bat ta slumalik skotol li krixchanoetik sventa chakʼ ta tsakel li sbiike.
4 Jech ek li Josee lokʼ batel ta jteklum Nasaret ta Galilea, bat ta Judea ta steklumal David ti Belen sbie, yuʼun jaʼ yutsʼ yalal xchiʼuk snitilulal* li Davide.
5 Bat yakʼ ta tsakel sbi xchiʼuk li Mariae, yuʼun jaʼ xaʼox yajnil li vaʼ kʼakʼale, xchiʼuk jutuk xaʼox skʼan xvokʼ* yol li Mariae.
6 Kʼalal jaʼo te oyike, kʼot yorail* ti chvokʼ yole.
7 Vaʼun vokʼ li yole, li sba yole,* la xpix ta pokʼ xchiʼuk la xpuchʼan* ta veʼeb vakax, yuʼun muʼyuk xa xokol la staik li na sventa vayebale.
8 Jech xtok, li ta lum taje te nakalik ta osiltik jchabichijetik ti chchabi xchijik ta akʼobaltike.
9 Ta ora te vinaj tal yaj-anjel Jeova ta stojolalik, vaʼun joyobtabil kʼotik ta xojobal Jeova xchiʼuk xiʼik tajek.
10 Pe xi albatik yuʼun li anjele: «Mu xaxiʼik, yuʼun ¡kʼelo avilik!, tal kalboxuk lekil aʼyejetik, tsta jun mukʼta kuxetel oʼontonal* skotol li krixchanoetike.
11 Yuʼun vokʼ xa jun jkoltavanej avuʼunik li avie, jaʼ li Kajvaltik Kristoe,* te vokʼ ta steklumal David.
12 Jaʼ chtun ta senyail liʼe: pixil ta pokʼ chataik jun olol xchiʼuk te puchʼul chataik ta veʼeb vakax».
13 Ta ora te vinaj tal yan epal anjeletik ti jaʼ soltaroetik ta vinajele, yakal tskʼupil kʼoptaik Dios xchiʼuk xi chalike:
14 «Akʼo junuk yutsil slekilal li Dios ti te oy ta toyole xchiʼuk junuk yoʼontonik li krixchanoetik ta sba balumil ti lek ilbilike».
15 Jech oxal chaʼa, kʼalal sutik muyel ta vinajel li anjeletike, xi lik yalbe sbaik li jchabichijetike: «Skʼan tukʼ xijbat ta ora li ta Belene, bat jkʼeltik li kʼusi kʼot ta pasel ti laj yakʼ jnaʼtik Jeovae».
16 Jech oxal batik ta anil, te la staik li Maria xchiʼuk Josee, vaʼun te puchʼul la staik ta veʼeb vakax li olole.
17 Kʼalal laj yilik taje, laj yakʼik ta naʼel li kʼusi albatik ta sventa li uni olole.
18 Toj labal sba laj yaʼiik* skotol li buchʼutik laj yaʼiik li kʼusi laj yal jchabichijetike,
19 yan li Mariae lik snakʼ ta yoʼonton skotol li kʼusitik taje, te tsnopilan-o ta yoʼonton kʼusi smelolal.
20 Vaʼun sutik batel li jchabichijetike, laj yalbeik yutsil slekilal Dios xchiʼuk la skʼupil kʼoptaik ta skoj li kʼusitik laj yaʼiik xchiʼuk laj yilike, jech onoʼox kʼuchaʼal albatike.
21 Kʼalal lokʼ xaʼox vaxakib kʼakʼale, kʼalal kʼot skʼakʼalil chichʼ sirkunsision li olole, Jesus laj yichʼ akʼbel sbi, jaʼ li biil laj yal anjel kʼalal skʼan toʼox xkom ta alajebale.
22 Jech xtok, kʼalal kʼot skʼakʼalil tsakubtas sbaik jech kʼuchaʼal chal Smantal Moisese,* laj yikʼik muyel ta Jerusalen sventa chakʼbeik yil Jeova ti jaʼ yuʼun li olole,
23 jech onoʼox kʼuchaʼal tsʼibabil ta Smantal* Jeovae: «Skotol li sba olol chvokʼ ti kereme skʼan me chʼul skʼoplal ta stojolal Jeova».
24 Vaʼun laj yakʼik milbil matanal* jech onoʼox kʼuchaʼal chal Smantal Jeovae: «Chaʼkot paloma ti staoj xa xchʼiele o chaʼkot chʼiom paloma».
25 Vaʼun ¡kʼelo avil!, oy jun vinik ta Jerusalen ti Simeon sbie, jaʼ jun tukʼil vinik xchiʼuk yichʼoj ta mukʼ Dios, smalaoj chtal spatobil yoʼonton Israel xchiʼuk oy chʼul espiritu ta stojolal.
26 Jech xtok, akʼbat snaʼ yuʼun Dios ta chʼul espiritu ti muʼyuk bu chil lajelal mi muʼyuk to bu yiloj li Kristo stakoj tal Jeovae.
27 Ta skoj ti ventainbil yuʼun sjuʼel li chʼul espiritue och batel ta templo,* vaʼun jaʼo te yikʼojik ochel uni olol Jesus li stot smeʼe, yuʼun tspasbeik li kʼusi nopem xaʼiik spasel jech kʼuchaʼal chal Mantale,
28 la spet li olole, la skʼupil kʼopta Dios xchiʼuk xi laj yale:
29 «Li avie Mukʼul Jpasmantal, chavakʼ akʼo junuk yoʼonton kolem xbat li amoso jech kʼuchaʼal avaloje
30 yuʼun laj yil jsat li kʼusi chatunes sventa chakoltavan
31 ti achapanoj ta sat skotol li jteklumetike,
32 jaʼ lus ti tslokʼesbe smakobil sat li jteklumetike xchiʼuk jaʼ yutsil slekilal li ateklumal Israele».
33 Vaʼun li stot smeʼ olole jech-o labal sba chaʼiik li kʼusitik laj yichʼ alel ta stojolal li olole.
34 Jech xtok, li Simeone la skʼan bendision ta stojolalik xchiʼuk xi laj yalbe li Mariae: «¡Kʼelo avil!, li olol liʼe jaʼ ta skoj ti ep buchʼutik chyalik ta lum ta Israele, ti chlikik yan veltae xchiʼuk ta xichʼ pʼajel xtok
35 (jech, jun natil espada ch-echʼ xtuchʼ avoʼonton) sventa xvinaj skʼoplal li kʼusi tsnop ta yoʼontonike».
36 Vaʼun, oy jun meʼ j-alkʼop ti Ana sbie, jaʼ stseb Fanuel ti jaʼ snitilulal li Asere. Oy xa sjabilal li ants taje xchiʼuk vukub jabil la xchiʼin ta naklej smalal kʼalal laj yikʼ sbaike,*
37 vaʼun li avie jaʼ xa jun meʼon ants ti yichʼoj xa 84 jabile. Muʼyuk bu yiktaoj sba chbat ta templo, ta kʼakʼal-akʼobal chkʼot yichʼ ta mukʼ Dios, tspas ayuno* xchiʼuk tskʼan vokol.
38 Li vaʼ orae nopaj batel xchiʼuk lik stojbe ta vokol Dios, lik yalbe skʼoplal li olole, laj yalbe skotol li buchʼutik tsmalaik chichʼ koltael li Jerusalene.
39 Jech oxal chaʼa, kʼalal laj xaʼox spasik skotol li kʼusitik jech kʼuchaʼal chal Smantal Jeovae, sutik batel ta steklumalik ta Nasaret ta Galilea.
40 Vaʼun lik chʼiuk li uni olole xchiʼuk lik tsatsubuk, la sta batel lek spʼijil xchiʼuk lek ilbil-o yuʼun li Diose.
41 Li stot smeʼe nopem xaʼi chbatik ta jujun jabil ta kʼin Koltael* ta Jerusalen.
42 Vaʼun kʼalal yichʼoj xaʼox lajcheb jabile, muyik batel ta kʼin jech onoʼox kʼuchaʼal nopem xaʼiike.
43 Kʼalal tsʼaki skʼakʼalil li kʼine xchiʼuk ti sutik batele, te kom ta Jerusalen li kerem Jesuse, pe muʼyuk laj yakʼ venta li stot smeʼe.
44 La snopik ti te kapal batel ta stojolal li xchiʼiltakik ta xanbale, jaʼ yuʼun kʼalal jun xaʼox kʼakʼal xanavemik batele lik saʼik mi te oy ta stojolal li yutsʼ yalalike xchiʼuk ta stojolal li buchʼutik xojtikinike.
45 Pe ta skoj ti muʼyuk la staike, sutik batel ta Jerusalen xchiʼuk lik saʼik lek.
46 Vaʼun, kʼalal echʼem xaʼox oxib kʼakʼale te la staik ta templo, te chotol ta oʼlol ti bu oy jchanubtasvanejetike, yakal chaʼi li kʼusitik chalike xchiʼuk oy kʼusitik tsjakʼilan.
47 Pe toj labal sba chaʼiik skotol li buchʼutik te yakal chaʼiik ta skoj ti lek xaʼibe smelolal xchiʼuk ti kʼu yelan tstakʼe.
48 Vaʼun kʼalal laj yilik li yutsʼ yalale chʼayal to kʼot yoʼontonik, jech oxal xi albat yuʼun li smeʼe: «Jkerem, ¿kʼu yuʼun ti jech la apasbunkutike? Li voʼon xchiʼuk atote la jsaʼotkutik tajek, ep laj kat koʼontonkutik* avuʼun».
49 Pe xi laj yale: «¿Kʼu yuʼun la asaʼikun? ¿Mi mu xanaʼik ti skʼan liʼ oyun ta sna Jtote?».
50 Pe muʼyuk bu laj yaʼibeik smelolal li kʼusi albatike.
51 Vaʼun yal batel xchiʼukik, sutik batel ta Nasaret, lek snaʼ xchʼunbe smantal li stot smeʼe. Jech xtok, li smeʼe la snakʼ lek ta yoʼonton skotol li kʼusitik taje.
52 Vaʼun lik pʼijubuk mas li Jesuse xchiʼuk lik chʼiuk, lek ilbil-o yuʼun li Diose xchiʼuk li krixchanoetike.
Tsʼibetik ta yok vun
^ Kʼelo glosario.
^ Taje jaʼ jech chichʼ albel jun ajvalil, maʼuk sbi jun krixchano.
^ Kʼelo glosario.
^ O: «smomnichʼon»; «stsʼunbal»; «stsʼakalul».
^ O: «x-ayan».
^ O: «tsʼaki skʼakʼalil».
^ Kʼelo glosario.
^ O: «smetsan»; «xmochan»; «staʼan».
^ O: «pʼijil oʼnal»; «nichim oʼontonal».
^ Kʼelo glosario.
^ O: «chʼayal to kʼot yoʼontonik».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «ti te lik tal kʼalal maʼuk xaʼox tojol tsebe».
^ O: «chikta sveʼel»; «chikta yixim»; «chikta yot»; «chtuchʼ xchʼut». Kʼelo glosario.
^ Kʼelo glosario.
^ Kʼelo glosario.
