Lukas 20:1-47
-
Laj yakʼbeik ta preva li yabtel Jesuse (1-8)
-
Lokʼolkʼop ta sventa jtsʼunolajeletik ti jmilvanejetike (9-19)
-
Dios xchiʼuk Sesar (20-26)
-
Oy kʼusi laj yichʼ jakʼel ta sventa li chaʼkuxesele (27-40)
-
¿Mi jaʼ xnichʼon David li Kristoe? (41-44)
-
Kʼelo me abaik ta stojolal li jchanubtasvanejetik ta Mantale (45-47)
20 Oy jun kʼakʼal kʼalal jaʼo yakal chchanubtas krixchanoetik ta templo xchiʼuk kʼalal jaʼo yakal chcholbe skʼoplal li lekil aʼyejetike, te talik li bankilal paleetik, li jchanubtasvanejetik ta Mantal xchiʼuk li moletike,
2 xi laj yalbeike: «Albun kaʼikutik, ¿bu la ata avabtel ti jech chapas li kʼusitik liʼe o buchʼu laj yakʼbot avabtel?».
3 Xi la stakʼe: «Oy kʼusi ta jakʼboxuk ek. Takʼbeikun tal:
4 ¿Bu lik tal li yabtel Juan ti laj yakʼ ichʼvoʼe, mi ta vinajel o mi ta stojolal krixchanoetik?».
5 Vaʼun xi lik yalbe sbaike: «‹Ta vinajel›, mi xkutike, xi chalbutike: ‹¿Kʼu yuʼun muʼyuk xachʼunbeik chaʼa?›.
6 Pe ‹Ta stojolal krixchanoetik›, mi xkutike, chakʼbutik ton skotol li krixchanoetike, yuʼun xchʼunojik ti jaʼ jun j-alkʼop li Juane».
7 Jaʼ yuʼun laj yalik ti mu snaʼik bu likem tale.
8 Xi albatik yuʼun li Jesuse: «Muʼyuk chkalboxuk bu la jta kabtel ek ti jech ta jpas li kʼusitik liʼe».
9 Te une, lik yalbe jun lokʼolkʼop li krixchanoetike: «Oy jun vinik la stsʼun tsʼusub, vaʼun laj yakʼbe slokʼ* jtsʼunolajeletik, laje lek jal lokʼ batel ta nom.
10 Kʼalal kʼot yoraile, la stak batel jun mosoil ta stojolal li jtsʼunolajeletik sventa ch-akʼbat jvokʼuk li tsʼusube. Pe akʼbat majel yuʼun li jtsʼunolajeletike, vaʼun xokol skʼob takat sutel.
11 Pe jaʼ noʼox jech la spas yan velta li yajval tsʼusube, la stak batel yan smoso. Tsots la smajik ek, la xkʼexlaltasik xchiʼuk xokol skʼob la stakik sutel ek.
12 Laj to stak batel yan xtok, yoxvoʼal xa; la syayijesik ek xchiʼuk la snutsik lokʼel.
13 Vaʼun xi laj yal li yajval tsʼusube: ‹¿Kʼusi van skʼan jpas? Jaʼ xa ta jtak batel li jkerem ti jkʼanoje. Xuʼ van jaʼ xichʼik ta mukʼ›.
14 Xi laj yalbe sbaik li jtsʼunolajeletik kʼalal la staik ta ilel li nichʼonile: ‹Leʼe jaʼ li buchʼu chichʼ komel kʼusitike; bat jmiltik sventa voʼotik xkichʼtik li kʼusitik chuʼunine›.
15 Jech oxal la sjipik lokʼel li ta tsʼusubtike, vaʼun la smilik. Jaʼ yuʼun, ¿kʼusi van tspasbatik yuʼun li yajval tsʼusube?
16 Ta xtal xchiʼuk tsmil li jtsʼunolajeletike, vaʼun yan xa-o buchʼutik chakʼbe li tsʼusubtike».
Xi laj yalik kʼalal laj yaʼiik taje: «¡Mu me jechuk xkʼot ta pasel!».
17 Pe kʼelbat satik yuʼun li Jesuse xchiʼuk xi albatike: «Vaʼun chaʼa, ¿kʼusi skʼan xal li kʼusi xi tsʼibabile: ‹Li ton ti la spʼajik li jvaʼanej naetike jaʼ li ton ta chikin na* ti mas tsots skʼoplal kʼoteme›?
18 Lilijem chkom skotol li buchʼu kajal chkʼot li ta sba ton taje. Yan li buchʼu chyal tal ta sbae pukuk* chkom ta jyalel».
19 Ta ora ox tskʼan tstsakik Jesus li bankilal paleetik xchiʼuk li jfariseoetike, pe chiʼik ta skoj li krixchanoetike, yuʼun laj yakʼik venta ti jaʼ skʼoplalik kʼalal laj yal li lokʼolkʼop taje.
20 Kʼalal laj xaʼox skʼelik leke, la stojik jayvoʼuk viniketik ta mukul, vaʼun la stakik batel ta stojolal Jesus sventa xakʼik ta ilel ti tukʼik xa tajek yilele, yuʼun tskʼelik kʼuxi tstsakik ta skoj li kʼusitik chale, vaʼun jech chbat yakʼik ta skʼob j-abteletik xchiʼuk ta skʼob ajvalil.
21 Oy kʼusi la sjakʼbeik, xi laj yalike: «Jchanubtasvanej, jnaʼojkutik ti tukʼ kʼusi chaval, ti tukʼ xanaʼ xachanubtasvan xchiʼuk ti mu tʼujbiluk noʼox yajval avuʼune, moʼoj, yuʼun jaʼ jech chavakʼ ta chanel li sbe Dios jech kʼuchaʼal li kʼusi melele:
22 ¿Mi stakʼ xichʼ tojbel patan li Sesare* o mi moʼoj?».
23 Pe laj yakʼ venta ti oy smanyaike, jaʼ yuʼun xi albatike:
24 «Akʼbeikun kil jsepuk denario, ¿buchʼu slokʼol liʼe xchiʼuk kʼusi ti liʼ tsʼibabile?». «Jaʼ li Sesare», xiik.
25 Xi albatike: «Vaʼun chaʼa, tojbeik ta persa Sesar li kʼusitik jaʼ yuʼun Sesare, yan li kʼusitik jaʼ yuʼun Diose tojbeik Dios».
26 Pe muʼyuk kʼu xut stsakik ta sat krixchanoetik ta skoj li kʼusitik laj yale, kʼajomal noʼox toj labal sba laj yaʼiik ti jech la stakʼe, jaʼ yuʼun muʼyuk xa kʼusi laj yalik.
27 Pe oy jlom jsaduseoetik,* ti chalik ti chʼabal chaʼkuxesele, talik ta stojolal Jesus xchiʼuk xi la sjakʼbeike:
28 «Jchanubtasvanej, li Moisese xi la stsʼibabutik komele: ‹Mi oy buchʼu cham sbankil, ti stuk chikta komel li yajnile xchiʼuk ti chʼabal to xnichʼnabe, skʼan xikʼbe yajnil sbankil li itsʼinal* sventa oyuk snitilulal* li sbankile›.
29 Kʼelo avil un, oy toʼox vukvoʼ viniketik ti sbankil yitsʼin sbaike. La saʼ yajnil li bankilale, pe cham kʼalal chʼabal toʼox xnichʼnabe.
30 Jaʼ jech la snuptan ek li xchaʼvoʼale,
31 vaʼun laj yikʼ li yoxvoʼale. Laj yikʼ svukvoʼalik; pe chʼabal xnichʼnab komik, yuʼun chamik.
32 Ta slajebal une, cham ek li antse.
33 Jaʼ yuʼun li ta chaʼkuxesele, ¿buchʼu junukal ta xkʼot ta yajnil? Yuʼun laj yikʼ svukvoʼalik».
34 Xi albatik yuʼun li Jesuse: «Li xnichʼnab kʼusitik oy ta balumile* tsaʼ yajnilik xchiʼuk chmalijik,
35 pe li buchʼutik staik-o sventa chuʼuninik li kʼusitik oy ta balumil taje xchiʼuk ti sta-o chchaʼkuxiik tal ti bu oy animaetike, muʼyuk bu tsaʼ yajnilik xchiʼuk muʼyuk bu chmalijik.
36 Jech xtok, muʼyuk xa bu chchamik, yuʼun jaʼ jechik kʼuchaʼal anjeletik, xchiʼuk jaʼik xnichʼnab Dios xtok ta skoj ti jaʼik xnichʼnab chaʼkuxesele.
37 Pe ti chchaʼkuxi li buchʼutik chamemike kʼalal ta Moises laj yalbe skʼoplal, li ta loʼil ta sventa li jpets chʼixe, kʼalal chalbe skʼoplal Jeova ti jaʼ ‹Dios yuʼun li Abraane, li Dios yuʼun li Isaake xchiʼuk li Dios yuʼun li Jakobe›.
38 Leʼe jaʼ li Dios yuʼun li buchʼutik kuxulike, maʼuk li buchʼutik chamemike, yuʼun kuxul chil skotolik».
39 Vaʼun oy jlom jchanubtasvanejetik ta Mantal ti xi la stakʼike: «Jchanubtasvanej, lek lakʼopoj».
40 Jaʼ yuʼun muʼyuk xa buchʼu kʼusi la skʼan sjakʼbe jpʼeluk.
41 Vaʼun xi jakʼbatike: «¿Kʼuxi ti chalik ti jaʼ xnichʼon David li Kristoe?
42 Yuʼun xi chal stuk David li ta slivroal Salmose:* ‹Xi albat yuʼun Jeova li Kajvale: «Chotlan ta jbatsʼikʼob
43 jaʼ to mi laj kakʼ ta skajleb avok li avajkontratake»›.
44 Jaʼ yuʼun chaʼa, mi ‹Kajval›, xi li Davide, ¿kʼuxi xa noʼox ti jaʼ xnichʼone?».
45 Vaʼun, kʼalal jaʼo yakal chaʼi skotol krixchanoetik taje, xi laj yalbe li yajchankʼoptake:
46 «Kʼelo me abaik ta stojolal li jchanubtasvanejetik ta Mantal ti buyuk noʼox tskʼan chbatik ti slapoj snatil kʼuʼike xchiʼuk ti tskʼanik tajek ti lek xa chkʼoponatik ta chʼivite xchiʼuk ti te chchotiik ta sbacholal chotlebal ta nail tsobobbailetike xchiʼuk ti bu mas tsotsik skʼoplal li ta jujun kʼine
47 xchiʼuk ti tspojbeik kʼusitik oy yuʼun li meʼon antsetike xchiʼuk ti jal tajek tspasik orasion sventa tsmakbeik sat* li krixchanoetike. Mas tsots chichʼik chapanel maʼ leʼe».
Tsʼibetik ta yok vun
^ O: «laj yakʼbe xchʼamun».
^ Kʼelo glosario.
^ O: «polvo»; «tsʼubil lum»; «tan».
^ Kʼelo glosario.
^ Kʼelo glosario.
^ Li Vivliae muʼyuk bu chal buchʼu bankilal o buchʼu itsʼinal yuʼunik ti chame.
^ O: «smomnichʼon»; «stsʼunbal»; «stsʼakalul».
^ Kʼelo glosario.
^ Kʼelo glosario.
^ O: «tspak-o skʼoplalik ta stojolal».
