Lukas 24:1-53
24 Pe li ta sba kʼakʼal ta xemanae, sob tajek talik li ta mukinale, yichʼojik tal li muil tsʼiʼleletik la smeltsanike.
2 Pe tselelinbil* xaʼox lokʼel la staik li ton ta mukinale,
3 kʼalal ochik batele muʼyuk xa bu te la stabeik li sbekʼtal Kajvaltik Jesuse.
4 Kʼalal mu xa snaʼ kʼusi tspasik ta skoj taje, ¡kʼelo avil!, te vaʼi ta stsʼelik chaʼvoʼ viniketik ti xleblun xojobal skʼuʼike.
5 Ta skoj ti xiʼik tajek li antsetike xchiʼuk ti snijanoj yalel satik ta lume, xi albatike: «¿Kʼu yuʼun tal asaʼik yoʼ bu oy animaetik li buchʼu kuxul xae?
6 Muʼyuk xa bu liʼ oye, yuʼun laj xa yichʼ chaʼkuxesel. Vuleso ta ajolik kʼu yelan laj yalboxuk kʼalal te toʼox oy ta Galileae,
7 ti laj yal ti chichʼ akʼel ta skʼob jpasmuliletik li Xnichʼon krixchanoe xchiʼuk ti chichʼ milel ta jtel teʼe, pe ti chchaʼkuxi ta yoxibal kʼakʼale».
8 Vaʼun vul ta sjolik li kʼusitik laj yale,
9 jech oxal lokʼik batel li ta mukinale, bat yalbeik skotol kʼusitik kʼot ta pasel li buluchvoʼike xchiʼuk skotol li yantike.
10 Jaʼ li Maria Magdalena, Juana xchiʼuk li Maria ti jaʼ smeʼ Santiagoe. Jech xtok, jaʼ jech laj yalbeik jtakboletik kʼusitik kʼot ta pasel li yan antsetik eke.
11 Akʼo mi jech, chuvaj kʼop noʼox laj yaʼiik, muʼyuk la xchʼunik li kʼusi laj yal li antsetike.
12 Pe lik li Pedroe, bat ta anil li ta mukinale, vaʼun kʼalal la stsuban* sbae, laj yil ti jaʼ xa noʼox te votsajtik li pokʼ ti ta lino pasbile. Jech oxal sut batel, toj labal sba laj yil ti kʼusi kʼot ta pasele.
13 Pe ¡kʼelo avil!, li vaʼ kʼakʼale jaʼo te chanavik batel chaʼvoʼik ta jun bikʼit lum ti Emaus sbie, te van buluchibuk kilometro xil Jerusalen,
14 te yakal chalbeik batel skʼoplal skotol li kʼusitik kʼot ta pasele.
15 Vaʼun kʼalal yakal chalbeik batel skʼoplal li kʼusitik taje te nopaj tal ta stojolalik li Jesuse, te chiʼinatik batel ta xanbal,
16 pe makbil satik sventa mu xakʼik venta ti jaʼe.
17 Xi albatike: «¿Kʼusi ti yakal chavalik tal ta bee?». Vaʼun te vaʼiik, xvinaj ti chat tajek yoʼontonike.
18 Xi takʼav li jun ti Kleopas sbie: «¿Mi atuk xa noʼox van ti j-echʼelbeot ta Jerusalen ti mu xanaʼ li kʼusitik kʼot ta pasel voljechabje tee?».
19 Xi jakʼbatike: «¿Kʼusitik ti kʼot ta pasele?». Xi laj yalbeike: «Jaʼ li kʼusitik kʼot ta pasel ta stojolal Jnasaretal Jesuse, ti kʼot ta j-alkʼop ti oy sjuʼel sventa tspas skʼelobiltak juʼelal xchiʼuk ti oy stsatsal skʼopojel ta stojolal Dios xchiʼuk ta stojolal jteklume,
20 xchiʼuk ti kʼu yelan laj yalik li bankilal paleetik xchiʼuk li ajvaliletik kuʼunkutik sventa chichʼ milel xchiʼuk ti chichʼ bajel ta jtel teʼe.
21 Pe li voʼonkutike jpatoj ox koʼontonkutik ti jaʼ li buchʼu tspoj Israele. Jech, maʼuk noʼox taje, yuʼun oy xa ta yoxibal kʼakʼal ti jech kʼot ta pasele.
22 Jech xtok, oy jayvoʼuk antsetik ta jtojolalkutik ti toj chʼayal to kʼot koʼontonkutik yuʼunike, yuʼun sob tajek batik li ta mukinale
23 pe kʼalal muʼyuk xa te la stabeik li sbekʼtale, sutik tal xchiʼuk laj yalik ti laj yilik anjeletike xchiʼuk albatik ti kuxul la li Jesuse.
24 Vaʼun batik ta mukinal jlom li buchʼutik te toʼox jchiʼukutike, batsʼi jech yelan laj yilik ek jech kʼuchaʼal laj yal li antsetike, pe muʼyuk bu laj yilik li Jesuse».
25 Jaʼ yuʼun xi albatike: «¡Muʼyuk apʼijilik xchiʼuk kʼun ch-abtej avoʼontonik sventa chachʼunik skotol li kʼusitik yaloj j-alkʼopetike!
26 ¿Mi mu persauk onoʼox jech chichʼ svokol li Kristo sventa tsta smukʼulale?».
27 Vaʼun xcholet lik yalbe skʼoplal li kʼusi la stsʼiba Moises xchiʼuk li kʼusitik yaloj J-alkʼopetike, laj yalbe smelolal li Tsʼibetik ti jaʼ skʼoplal stuke.
28 Vaʼun nopajik batel li ta bikʼit lum ti bu chbatike, pe li stuke mas to nom chbat yileluk la spas.
29 Pe mu xlaj tajek yoʼontonik xchiʼuk xi laj yalbeike: «Jaʼ lek koman liʼe, yuʼun ch-och xa akʼobal xchiʼuk chnel xa li kʼakʼale». Vaʼun, och batel sventa te chkom xchiʼukik.
30 Vaʼun kʼalal te chveʼike, la stsak jun pan,* la skʼan jun bendision, la svokʼ,* vaʼun laj yakʼbe xchaʼvoʼalik.
31 Vaʼun laj yichʼ jambel lek satik xchiʼuk laj yakʼik venta ti jaʼe, pe sakchʼay batel ta satik.
32 Vaʼun xi lik yalbe sbaike: «¿Mi mu xtiltunuk koʼontontik kʼalal yakal chchiʼinutik tal ta loʼil ta bee, kʼalal lek tsʼakal tsjambutik tal smelolal li Tsʼibetike?».
33 Li vaʼ orae likik xchiʼuk la stam sutel sbeik ta Jerusalen, te tsobol kʼot staik li buluchvoʼike xchiʼuk li yan xchiʼilike,
34 xi laj yalike: «¡Chaʼkuxiem xa ta melel li Kajvaltike, yuʼun laj xa yakʼ sba ta ilel ta stojolal li Simone!».
35 Vaʼun lik yalik ek li kʼusitik kʼot ta pasel ta bee xchiʼuk ti kʼu yelan laj yakʼik venta ti jaʼ Jesus kʼalal la svokʼ li pane.
36 Kʼalal jaʼo yakal chalik li kʼusitik taje, te kʼot svaʼan sba ta stojolalik xchiʼuk xi albatike: «Junuk avoʼontonik».
37 Ta jkoj ti xiʼemik ta jyalele xchiʼuk ti chʼayal to kʼot yoʼontonike la snopik mi jaʼ jun anjel ti laj yilike.
38 Jaʼ yuʼun xi albatike: «¿Kʼu yuʼun chaxiʼik xchiʼuk kʼu yuʼun xchibet avoʼontonik?
39 Kʼelo avilik li kok jkʼobe, voʼonun; pikikun xchiʼuk kʼelikun, yuʼun chʼabal sbekʼtal xchiʼuk sbakil li jun anjele, pe li voʼone oy jbekʼtal xchiʼuk jbakil jech kʼuchaʼal chavilike».
40 Kʼalal jech laj yale laj yakʼanbe yil li yok skʼobe.
41 Pe mu xchʼunik ta skoj ti xmuyubajik tajek* xchiʼuk ti toj labal sba chaʼiike, jaʼ yuʼun xi albatike: «¿Mi oy kʼusi jlajestik avuʼunik?».
42 Vaʼun laj yakʼbeik jutuk vobil choy,
43 la stsak, vaʼun te skʼelojik kʼalal lik stiʼe.
44 Te une xi albatike: «Liʼe jaʼ li kʼusitik laj kalboxuk kʼalal liʼ toʼox jchiʼukoxuke, ti persa onoʼox ta xkʼot pasel skotol li jkʼoplal tsʼibabil ta Smantal Moises xchiʼuk li kʼusitik yaloj J-alkʼopetik xchiʼuk li kʼusitik tsʼibabil ta Salmose».*
45 Vaʼun jambat lek snopbenik sventa xaʼibeik smelolal li Tsʼibetike,
46 xi albatike: «Jaʼ jech tsʼibabil ti chichʼ svokol li Kristoe xchiʼuk ti chchaʼkuxi ta yoxibal kʼakʼale,
47 xchiʼuk ti jaʼ ta sbi chichʼ cholbel skʼoplal skotol jteklumetik ti akʼo sutes yoʼontonik sventa tspasbat perton smulike... ti baʼyel chlik ta Jerusalene.
48 Voʼoxuk chavalik batel skotol li kʼusitik taje.
49 Pe ¡kʼelo avilik!, ta jtak tal ta atojolalik li kʼusi onoʼox yaloj Jtote. Pe liʼ me oyanik li ta jteklum jaʼ to mi laj avichʼik pixel ta juʼelal ti likem tal ta toyole».
50 Vaʼun ikʼatik lokʼel, batik kʼalal ta Betania, vaʼun la stoy skʼob xchiʼuk akʼbatik bendision.
51 Kʼalal jaʼo yakal ch-akʼbatik bendisione, chʼakat lokʼel ta stojolalik xchiʼuk lik ikʼatuk muyel ta vinajel.
52 Vaʼun laj yichʼik ta mukʼ,* te une xkuxet tajek yoʼontonik sutik batel ta Jerusalen.
53 Vaʼun skotol kʼakʼal te tskʼupil kʼoptaik Dios ta templo.
Tsʼibetik ta yok vun
^ O: «setetinbil»; «balchʼunbil».
^ O: «skujan»; «snijan»; «stsapan».
^ Kʼelo glosario.
^ O: «la xetʼ»; «la xut».
^ O: «echʼem pʼij yoʼnik»; «nichim noʼox yoʼontonik».
^ Kʼelo glosario.
^ O: «la snijan sbaik ta stojolal».
