Lukas 3:1-38
3 Kʼalal oy xaʼox ta voʼlajuneb jabil ch-ajvalilaj li Tiberio Sesare,* kʼalal jaʼo tikʼil ta ajvalil ta Judea li Ponsio Pilatoe, te ch-ajvalilaj ta yosilal Galilea li Erodese,* li sbankil ti Filipo sbie te ch-ajvalilaj ta yosilal Iturea balumil xchiʼuk ta Trakonitide, xchiʼuk te ch-ajvalilaj ta yosilal Abilene li Lisanias
2 ta skʼakʼalil Kaifas xchiʼuk kʼalal jaʼo ochem ta bankilal pale* li Anase, kʼalal jaʼo taje laj yichʼ akʼbel jun aʼyej yuʼun Dios ta takixokol balumil li Juan ti jaʼ xnichʼon Sakariase.
3 Jaʼ yuʼun bat ta lumetik ta sjoylejal Jordan, yuʼun chcholbe skʼoplal li ichʼvoʼ ti jaʼ svinajeb ti tsutes yoʼontonike,* sventa staik perton ta skoj smulik,
4 jech onoʼox kʼuchaʼal xi tsʼibabil skʼoplal ta slivro li j-alkʼop Isaiase: «Oy buchʼu xi tsots ch-avan ta takixokol balumile: ‹¡Chapanbeik li sbe Jeovae! Tukʼibtasbeik li sbee.
5 Skʼan xichʼ nojesel skotol li jemeltike; skʼan xichʼ pasel ta stenlejal skotol li mukʼta vitstik xchiʼuk li bikʼtal vitstike, skʼan xkʼot ta tukʼil be li xotxot beetike xchiʼuk skʼan xkʼot ta stenlejal li chʼentike,
6 xchiʼuk ta me xilik skotol krixchanoetik ti chkoltavan li Diose›».
7 Jaʼ yuʼun xi lik yalbe li epal krixchanoetik ti lokʼemik tal sventa x-akʼbat yichʼik voʼe: «Stsʼunbaltak veneno chon,* ¿buchʼu la spʼijubtasoxuk sventa xajatavik li ta skʼakʼal oʼontonal chtale?
8 Jech oxal chaʼa, akʼo vinajuk ta avabtelik ti asutesoj avoʼontonik ta melele. Mu me xiuk xlik aval ta avoʼontonike: ‹Jaʼ jtotkutik li Abraane›. Yuʼun chkalboxuk avaʼiik ti oy sjuʼel Dios sventa tskʼatajesbe ta xnichʼnab Abraan li tonetik liʼe.
9 Jech onoʼox, te xa metsel ta yibel teʼetik li ekʼele. Jaʼ yuʼun chichʼ tsʼetel skotol li teʼ ti mu xakʼ lek sate xchiʼuk chichʼ jipel ochel ta kʼokʼ».
10 Xi jakʼbat yuʼun li epal krixchanoetike: «¿Kʼusi skʼan jpaskutik un chaʼa?».
11 Xi takʼbatike: «Li buchʼu oy chaʼlik skʼuʼ spokʼe* akʼo yakʼbe jlikuk li buchʼu chʼabal yuʼune, xchiʼuk li buchʼu oy kʼusi tslajese akʼo yakʼbe ek li buchʼu chʼabal yuʼune».
12 Kʼalal ta jtsobpatanetik tal yichʼik voʼ xchiʼuk xi laj yalbeike: «Jchanubtasvanej, ¿kʼusi skʼan jpaskutik?».
13 Xi albatike: «Jaʼ noʼox me jech yepal xakʼanik ti kʼu yepal albil skʼoplal li patane».
14 Xi la sjakʼik ek li buchʼutik ochemik ta soltaroale: «¿Kʼusi skʼan jpaskutik?». Xi takʼbatike: «Mu me xavilbajinik li krixchanoetike o mu me jecheʼuk xasabeik smul, moʼoj, yuʼun skʼan me junuk avoʼontonik yuʼun ti kʼu yepal cha-akʼbatike».
15 Oy kʼusi yakal tsmala li jteklume xchiʼuk xi tsnopilan ta yoʼonton skotolik ta stojolal li Juane: «¿Mi jaʼ van Kristo leʼe?».
16 Xi la stakʼ li Juane, xi laj yalbe skotol li krixchanoetike: «Li voʼone chkakʼ avichʼik voʼ, yan li Buchʼu tsʼakal chtal kuʼune jaʼ mas tsots yabtel, mu jta-o ti ta jtitunbe li yakʼil xonobe. Li stuke chakʼ avichʼik voʼ ta chʼul espiritu xchiʼuk chakʼ avichʼik voʼ ta kʼokʼ.*
17 Te xa stsakoj ta skʼob li yikʼaobil* trigo sventa chchʼuba lek li yavil bu chichʼ ikʼaele,* yuʼun ta skʼej ta snail li strigoe, yan li spate* ta xchikʼbe ta kʼokʼ ti bu mu xtupʼe».
18 Jech xtok, li Juane ep laj yal mantal xchiʼuk laj yalilanbe lekil aʼyejetik li jteklume.
19 Pe li ajvalil Erodes ta yosilal Galileae tsots akʼbat mantal yuʼun Juan ta skoj li Erodiase, ti jaʼ li yajnil sbankil ti Filipo sbie xchiʼuk ta skoj skotol li kʼusitik toj chopol spasoj li Erodese,
20 ta skotol li kʼusitik chopol spasoje oy to kʼusi yan la spas: la stikʼ ta chukel li Juane.
21 Vaʼun kʼalal laj xaʼox yichʼ voʼ sjunul li jteklume, laj yichʼ voʼ ek li Jesuse, kʼalal jaʼo yakal tspas orasione jam li vinajele,
22 xchiʼuk yal tal ta stojolal chʼul espiritu ti xkoʼolaj kʼuchaʼal jkot palomae, xchiʼuk laj yichʼ aʼiel jun yechʼomal eil ta vinajel: «Voʼot Jnichʼonot, jkʼanojot, ximuyubaj* avuʼun».
23 Kʼalal la slikes yabtel li Jesuse yichʼoj van 30 jabil, chalikejaʼ la xnichʼon Jose,xnichʼon Eli,
24 xnichʼon Matat,xnichʼon Levi,*xnichʼon Melki,xnichʼon Janai,xnichʼon Jose,
25 xnichʼon Matatias,xnichʼon Amos,xnichʼon Naum,xnichʼon Esli,xnichʼon Nagai,
26 xnichʼon Maat,xnichʼon Matatias,xnichʼon Semein,xnichʼon Josek,xnichʼon Joda,
27 xnichʼon Joanan,xnichʼon Resa,xnichʼon Sorobabel,xnichʼon Sealtiel,xnichʼon Neri,
28 xnichʼon Melki,xnichʼon Adi,xnichʼon Kosam,xnichʼon Elmadam,xnichʼon Er,
29 xnichʼon Jesus,xnichʼon Elieser,xnichʼon Jorim,xnichʼon Matat,xnichʼon Levi,
30 xnichʼon Simeon,xnichʼon Judas,xnichʼon Jose,xnichʼon Jonam,xnichʼon Eliakim,
31 xnichʼon Melea,xnichʼon Mena,xnichʼon Matata,xnichʼon Natan,xnichʼon David,
32 xnichʼon Jese,xnichʼon Obed,xnichʼon Boas,xnichʼon Salmon,xnichʼon Nason,
33 xnichʼon Aminadab,xnichʼon Arni,xnichʼon Esron,xnichʼon Peres,xnichʼon Juda,*
34 xnichʼon Jakob,xnichʼon Isaak,xnichʼon Abraan,xnichʼon Tare,xnichʼon Nakor,
35 xnichʼon Serug,xnichʼon Reu,xnichʼon Peleg,xnichʼon Eber,xnichʼon Sela,
36 xnichʼon Kainan,xnichʼon Arpaksad,xnichʼon Sem,xnichʼon Noe,xnichʼon Lamek,
37 xnichʼon Matusalen,xnichʼon Enok,xnichʼon Jared,xnichʼon Maalaleel,xnichʼon Kainan,
38 xnichʼon Enos,xnichʼon Set,xnichʼon Adan,xnichʼon Dios.
Tsʼibetik ta yok vun
^ Kʼelo glosario.
^ Jaʼ skʼoplal li Erodes Antipase. Kʼelo glosario.
^ Kʼelo glosario.
^ Kʼelo glosario.
^ O: «kiletel chon».
^ O: «jchop smasil skʼuʼ spokʼe».
^ Taje jaʼ skʼan xal ti chavichʼik tʼujel ta chʼul espiritue xchiʼuk ti chavichʼik lajesel ta kʼokʼe.
^ O: «sjikʼaobil».
^ Kʼelo glosario.
^ Kʼelo glosario.
^ O: «pʼij koʼn»; «nichim koʼonton».
^ Kʼelo glosario.
^ Kʼelo glosario.
