Lukas 4:1-44
4 Vaʼun ta skoj ti ventainbil yuʼun chʼul espiritu li Jesuse, lokʼ batel li ta Jordane, beiltasat batel yuʼun chʼul espiritu ti bu xtal xbat ta takixokol balumil
2 ti 40 kʼakʼal te oye, vaʼun te akʼat ta preva yuʼun li Diabloe.* Jech xtok, muʼyuk kʼusi la slajes ti kʼu sjalil taje, jaʼ yuʼun kʼalal tsʼaki li skʼakʼalile, viʼnaj.
3 Vaʼun xi albat yuʼun li Diabloe: «Mi jaʼ xnichʼonot Diose, albo ti akʼo xkʼataj ta pan* li ton liʼe».
4 Pe xi takʼbat yuʼun li Jesuse: «Xi tsʼibabile: ‹Maʼuk noʼox ta pan kuxul li krixchanoe›».
5 Jech oxal laj yikʼ muyel ta toyol xchiʼuk laj yakʼbe yil uni jlikel skotol li mukʼtik lumetik ta balumile.
6 Vaʼun xi albat yuʼun li Diabloe: «Chkakʼ aventain skotol liʼe xchiʼuk chkakʼbot li yutsilalike, yuʼun akʼbil ta kok ta jkʼob, xchiʼuk jaʼ chkakʼbe li buchʼu oy ta koʼonton chkakʼbee.
7 Jaʼ yuʼun mi chavichʼun ta mukʼ junuk veltae, chavichʼ skotol taje».
8 Xi la stakʼ li Jesuse: «Xi tsʼibabile: ‹Jaʼ noʼox skʼan xavichʼ ta mukʼ li Jeova Dios avuʼune xchiʼuk jaʼ noʼox stuk skʼan xapasbe xchʼul abtel›».
9 Vaʼun laj yikʼ batel ta Jerusalen xchiʼuk te la svaʼan ta jol templo ti bu toyole, xi laj yalbee: «Mi jaʼ xnichʼonot Diose, jipo aba yalel liʼe,
10 yuʼun xi tsʼibabile: ‹Ta stak talel yaj-anjeltak ta atojolal sventa chchabiot›,
11 xchiʼuk ‹chaxchʼamik batel ta skʼobik sventa mu xamaj avok ta ton›».
12 Xi takʼbat yuʼun li Jesuse: «Xi albile: ‹Mu stakʼ xapas ta preva li Jeova Dios avuʼune›».
13 Kʼalal laj yoʼonton ta yakʼel ta preva Jesus li Diabloe, lokʼ batel te, la smalabe yan yorail.
14 Vaʼun li Jesuse beiltasbil ta sjuʼel chʼul espiritu, sut batel ta Galilea. Puk batel slekil kʼoplal ta skotol jteklumetik ta sjoylejal taje.
15 Jech xtok, lik chanubtasvanuk ta snailtak stsobobbailik* xchiʼuk lek laj yalbeik skʼoplal skotolik.
16 Te bat ta Nasaret ti bu chʼie, xchiʼuk jech onoʼox kʼuchaʼal nopem xaʼi ta skʼakʼalil Savadoe* te och batel ta nail tsobobbail xchiʼuk vaʼi sventa tskʼel li Tsʼibetike.*
17 Vaʼun laj yichʼ akʼbel li balbalvun* yuʼun j-alkʼop Isaiase, te une la xjilchʼun li balbalvune xchiʼuk la sta ti bu xi tsʼibabile:
18 «Liʼ oy ta jtojolal li xchʼul espiritu Jeovae, yuʼun la stʼujun* sventa chkalbe lekil aʼyejetik li buchʼutik abol sbaike. La stakun tal sventa ta jcholbe skʼoplal skolebal li buchʼutik chukbilike xchiʼuk sventa chilik osil yan velta li maʼsatetike xchiʼuk sventa chkakʼbe skolebal li buchʼutik lilijem yoʼontonike,
19 sventa ta jcholbe skʼoplal li sjabilal ti lek ch-ilvan li Jeovae».
20 Kʼalal laj yoʼontone la sbal li balbalvune, laj yakʼbe sutel li jtunele, vaʼun choti; tukʼ kʼelat batel yuʼun li buchʼutik te chotolik ta nail tsobobbaile.
21 Vaʼun xi lik yalbe skotolike: «Chkʼot ta pasel avi li kʼusi tsʼibabil laj avaʼiike».
22 Lek kʼusitik lik yal skotolik ta stojolal li Jesuse xchiʼuk labal sba chaʼiik ti oy lek smuil li kʼusitik chale, xi chalike: «Jaʼ xnichʼon Jose maʼ leʼe, ¿mi mu jechuk?».
23 Vaʼun xi laj yale: «Ta melel jaʼ jkʼoplal avuʼunik li kʼusi albil liʼe: ‹Doktor, poxta aba atuk; li kʼusi laj kaʼikutik apasoj ta Kapernaume, paso liʼ ta alumal eke›».
24 Vaʼun xi laj yale: «Ta melel chkalboxuk avaʼiik ti mi junuk j-alkʼop chʼambil li ta slumale.
25 Jech kʼuchaʼal liʼe, chkalboxuk avaʼiik ta melel: oy toʼox ep meʼon antsetik ta Israel ta skʼakʼalil Elias kʼalal laj yichʼ makel oxib jabil xchiʼuk vakib u li vinajele, jech xtok tal tsatsal viʼnal ta sjunul balumil.
26 Akʼo mi jech, li Eliase muʼyuk bu laj yichʼ takel batel ta stojolal mi junuk li antsetik taje, moʼoj, jaʼ te takat batel ta stojolal jun meʼon ants ta Sarepta ta yosilal Sidon.
27 Jech xtok, oy toʼox ep buchʼutik ip ta kʼaʼemal chamel* ta Israel li ta skʼakʼalil j-alkʼop Eliseoe; pe mi junuk buchʼu laj yichʼ poxtael, jaʼ noʼox laj yichʼ poxtael li Naamane, li jsiria vinike».
28 Vaʼun kʼalal laj yaʼiike, lik skʼakʼal yoʼonton skotolik li buchʼutik te oyik ta nail tsobobbaile,
29 jech oxal vaʼi skotolik xchiʼuk la slokʼesik ta anil li ta jteklume, te une laj yikʼik batel ta jol vits ti jaʼ te spasoj slumalike, yuʼun tskʼan ox te tsjipik yalel.
30 Pe te xvaʼvun echʼel ta oʼlol ti bu oyike, jech la stam batel sbe.
31 Vaʼun yal batel ta Kapernaum, ti jaʼ jun jteklum ta yosilal Galileae. Te chchanubtasvan ta skʼakʼalil Savado,
32 vaʼun chʼayal to kʼot yoʼontonik ta skoj ti kʼu yelan chchanubtasvane, yuʼun tsots yabtel ti kʼu yelan chkʼopoje.
33 Pe te ta nail tsobobbaile, te oy jun vinik ti ochem jun pukuj* ta yoʼontone, jun ibal sba* pukuj, vaʼun xi tsots avane:
34 «¡Ay! ¿Kʼusi chasaʼ liʼ eke, Jnasaretal Jesus? ¿Mi yuʼun tal alajesunkutik? Lek xakojtikin buchʼuot, voʼot li Buchʼu chʼul yuʼun Diose».
35 Pe li Jesuse la stsak ta utel, xi laj yalbee: «¡Anchan, lokʼan ta yoʼonton li vinike!». Jech oxal kʼalal laj xaʼox sjip ta lum ta oʼlol ti bu oyike, li pukuje lokʼ batel ta stojolal li vinike xchiʼuk muʼyuk la syayijes.
36 Toj labal sba laj yil skotolik taje xchiʼuk xi lik yalbe sbaike: «¡Kʼelo avilik, kʼu to yelan li skʼopojele! ¡Tsots yabtel xchiʼuk oy sjuʼel tspas ta mantal li ibal sba pukujetike, vaʼun ta xlokʼik batel!».
37 Jech oxal puk batel skʼoplal ta buyuk noʼox li ta sjoylejal jteklume.
38 Kʼalal lokʼ batel li ta nail tsobobbaile, och ta sna Simon. Li smeʼniʼ Simone tsots ip ta kʼokʼ, jech oxal laj yalbeik ti akʼo skoltae.
39 Jaʼ yuʼun te vaʼi ta stsʼel xchiʼuk la stsak ta utel li kʼokʼe, jech tupʼ li skʼakʼale. Ta anil noʼox vaʼi xchiʼuk lik meltsanbatuk sveʼelik.
40 Pe kʼalal ta xchʼay xaʼox batel Kʼakʼale, skotol li buchʼutik oy yajchamelike laj yikʼbeik tal ta stojolal, kʼusiuk noʼox chamelal ti ip chaʼiike. Kʼalal la skajan skʼob ta sba li buchʼutik ipike, kolik.
41 Jech xtok, ep buchʼutik lokʼ pukujetik ta stojolalik, xi x-avet chalike: «Voʼot Xnichʼonot li Diose». Pe la stsak ta utel li pukujetike, mu xakʼ akʼo xkʼopojik, yuʼun snaʼojik ti jaʼ li Kristoe.
42 Pe kʼalal sakub osil ta yokʼomale, lokʼ batel, bat ta nom ti bu stuktuk bu chʼikile. Pe te yakal tsaʼat yuʼun epal krixchanoetik, vaʼun te kʼotik ti bu oye xchiʼuk laj ox spajesik sventa mu xbat.
43 Pe xi albatike: «Jech xtok persa skʼan ta jchol li lekil aʼyejetik ta sventa Ajvalilal yuʼun Dios* li ta yan jteklumetik eke, yuʼun jaʼ ta sventa ti takbilun tale».
44 Jech oxal chaʼa, te chchol-o mantal li ta nail tsobobbailetik ta Judeae.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ O: «skʼakʼalil kuxob oʼontonal». Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
